¹ Cunkawnah, Khanpughi ah uknak kho cu hta m'umnak ah mei-im kawit ne hteit ci guiah ng'lamihta gha awn täng ci. ² M'hma cu hmuhmat ciah kya u ne, k'hma cu ang ci gui. ³ K'ang ci gui naw mei-im düt kawit u ne, shitui kä thaan lawk ci gui. ⁴ Hmuhmat ci gui läi naw mei-im ung shitui than ge ne hteit ci gui. ⁵ Hta m'dawn khai ah pamihta cu shokshüi sei, ngami gui ami van cu ngam u ne ip ci gui. ⁶ Mü ng'lung ah, 'Teng vä! Hta m'dawn khai ah pamihta gawk lawk ci. Douchan vaiah lut law vä!' Ciah k'aw ng'thang law sei, ⁷ ng'lami gui ami van cu lut law u ne, ami mei-im gui m'dei vaiah ng'khäp ci gui. ⁸ Cunung, k'ang ci gui naw, 'Kami mei-im gui mei shi lawk khai kyasei, nami shitui api na pe tu vä!' Ciah hmuhmat ci guiah ng'yoi tuk ci gui.

⁹ Cunte, hmuhmat ci gui naw, 'Cunah ci ung nangmi ah phäh phi kya, keimi ah phäh phi kya, kä ng'büh khai. Shitui yoi ci gui bäng ah va hteit ne, va k'hleih vä' ciah pyein na ba ci gui. ¹⁰ Ngami va hteit u ne ami va k'hleih sang ung, chumah khai ah pamihta gawk law sei, a kya-ge ah ana ng'khäp ci gui cu pamihta awn atäng ah hta m'um pawi ah va lut ci gui. Cunkawnah, shoh k'khai ci gui.

¹¹ Cunkawnah, a hei ng'lami gui cu gawk law u ne, 'Bawi aw, Bawi aw, shoh na k'hmawn tu pe gui ä!' Cik ci gui.

¹² Cungphih, pamihta naw, 'Akcang kaning pyein na gui khai. Nangmi cu kä kaning hmat gui ci' ciah pyein na gui ci. ¹³ Cunkyasei, m'htei ne ana ngäng vä. Ikyaseiciung, cunah hnüp la cun ah hni-khin cu kä nami hmat ci.

¹⁴ Avaisü, chang tumat naw a kho hei ah hteit khai ah k'pawng ne, akchangshäm gui khü neta, a khawhcham gui cu ap gui ci. ¹⁵ Ani naw akchangshäm phäh phäh awn ami m'khütnäng phäh phäh ah, tumat awn ngui phya hmakip, tumat awn phya m'ku, a hei tumat awn phya gha ci-ah pe gui ci. Cunkawn ah k'dung ah hteit ci. ¹⁶ Ngui phya hmakip gah ci naw a ng'ghit ah hteit ne, acunah ngui gui awn sumlei neta, phya hmakip cu thap ne gah ci. ¹⁷ Acunah mäih ah phya m'ku gah ci naw phi, thap ne phya m'ku gah ci. ¹⁸ Phya gha gah ci naw läi, hteit ne khomdek cawh neta, a bawi ah ngui gui cu thup ci. ¹⁹ Aksho ng'lak na sei, cunah changshäm guiah ami bawi cu law ba ne, ani ah ngui awn a i ami bi gui cu ng'shi gui ci. ²⁰ Cunung, ngui phya hmakip gah ci naw, thap ne a gah ah phya hmakip cu law püi ne, 'Bawi aw, nang naw ngui phya hmakip na na pek ci. Teng ä! Kei naw thap ne phya hmakip ka gah lawk ci nei' ciah pyein ci.

²¹ A bawi naw phi, 'Ni aih ve, bekhüt ciah ka k'changshäm, nang cu amawng ak-yaw ung na bekhüt ci. Amawngma akdämda gui ung kaning tängpang sak khai. Na bawi ah yeikyainak ung eiaw law ä!' Cik ci.

²² Phya m'ku gah ci naw phi, 'Bawi aw, nang naw kei awn phya m'ku na na pek ci. Teng ä! Kei naw thap ne phya m'ku ka gah lawk ci nei' cik ci.

²³ A bawi naw phi, 'Ni aih ve. Bekhüt ciah ka changshäm, nang cu amawng ak-yaw ung na bekhüt ci. Amawng akdämda ung kaning tängpang sak khai. Na bawi ah yeikyainak ung eiaw law ä!' Cik ci.

²⁴ Phya gha gah ci naw et law ne, 'Bawi aw, nang cu kä na geit nak ung khäm ne, kä na phusho nak ung na m'hlep thei ciah chang khak ah na kyak ka hmat ci. ²⁵ Cunkyasei, ning kyih ne, hteit neta na ngui cu m'dek khui ah ka thup ci. Teng ä. Na khawh cu shin ung om ci nei' cik ci.

²⁶ A bawi naw, 'Shekha ne m'dam ciah changshäm, kei cu kä ka geitko nak ung khäm ne, kä ka phusho nak ung ka m'hlep thei ciah mawng na hmat ung, ²⁷ ka ngui cu ngui k'pu thei ci awn na pet vai sü. Cunung, ka law ba ung, ka ngui gui cu a hta awn atäng ah gah vai sü. ²⁸ Cunkyasei, ngui phya gha cu ani ungka la u ne ngui phya ah a phya tha ci awn pe vä. ²⁹ Ikyaseiciung, gah-tang thei ci gui awn khap ne pe neta, ani cu khawh-mah kümpäng lawk khai. Kä gah-tang thei ci ungka läi, om hta ci phi lak ba pek vai. ³⁰ Htungmang ne kä gah ah changshäm cu akpung täng akhmüp khui ah gawittäm vä. Acun ung vungpyangnak la m'nihtui hamhtep nak om ci' cine pyein ci.

³¹ Chang ah hta cu abawimangnak awn akkhankhochang gui van awn a kyum law ung, bawimang ciah a mangkyang ung ngok khai. ³² Cunkawnah, chang pakhui van cu a ma ah ng'bum lawk khai gui. Htoshäm naw hto gui cu me gui awn a m'tai ah mäih ah Bawipa naw ngami cu tumat la tumat m'tai gui khai. ³³ Hto gui cu amät ah akpat täng ah phi kya, me gui cu ak-eng täng ah phi kya, tha gui khai. ³⁴ Cunkawnah, ghangpughang naw akpat täng ah om ci gui awn, 'Ka Pa ungka khriham gah ci gui aw, khomdek a ng'tüin vai ge awn, nangmi ah phäh ah pakhawh ah kyak ciah a kho ah law u ne dou law vä. ³⁵ Ikyaseiciung, kei ana m'cawi law ung nangmi naw ka ei vai nami na pek ci. Tui ana m'gha law ung ka awk vai nami na pek ci. Khin ah ka kyak sang ung, nami nak khinlei nak ci. ³⁶ Ka sui vai kä a om sang ung, nami na m'sui ci. Ka gopyam law ung nami na m'htei ci. Thawng ka kyum law ung nami na k'htäk lawk ci' cine pyein ci.

³⁷ Cunung, chang düng gui naw, 'Bawipa, keimi naw a i yah ung na cawicam ning hmuh u ne, kami ning m'bei man ne ma? Käcung, tui na gha ning hmu u ne, a hawi ciah, kami ning tu man ne ma? ³⁸ A hawi ciah nang Bawipa cu khin ah kya khaseih ning hmu u ne, kami ning khinlei na ne ma? Käcung, suisak kä om ah na om ning hmu u ne, na suisak vai kami ning pe man ne ma? ³⁹ A hawi ciah nang Bawipa na gopyam phi kya, thawng na kyum phi kya, ning hmu u ne, nang bawipa cu kami ning k'htäk law man ne ma?' Ciah ng'shik ci gui.

⁴⁰ Ghangpughang naw phi, 'Akcang kaning pyein na gui ci. Ka phäinau gui ung akhmawpi gui ungka tumatmat ah khan ah nami bilawh gui cu kei ah khan ah nami bilawh ah kyak ci' cine m'shang ba gui ci. ⁴¹ Cunkawnah, ghangpughang naw, ak-eng täng ah om ci gui awn, 'Phyunnak gah ci gui aw, kei ungka lut law u ne, khogam la a paw guiah phäh ah pyan ah m'htemei khui ah hteit vä. ⁴² Ikyaseiciung, ka cawicam law ung nangmi naw ka ei vai kä nami na pek ci. Tui ka gha law ung ka awk vaiah kä nami na pek ci. ⁴³ Khin ah ka kyak sang ung, na douchang u ne kä nami na khinlei nak ci. Ka sui vai kä om ne, ka k'plüi ah ka om sang ung, ka sui vai kä nami na pek ci. Ka gopyam sang ung phi kya, thawng ka kyum sang ung phi kya, kä nami na temken lawk ci' ciah pyein na gui ci.

⁴⁴ Cunung, ngami naw phi, 'Bawipa aw, keimi naw a hawi ciah nang cu aning m'cawi phi kya, tui na gha phi kya, khin ah na kyak phi kya, sui vai kä om ne akplüi ah na kyak phi kya, na gopyam phi kya, thawng na kyum phi kya, ning hmu u ne, kä ning m'htei ah kami om man naw?' Ciah pyein ci gui.

⁴⁵ Ghangpughang naw phi, 'Akcang kaning pyein na gui khai. Shinah akhmawpi gui ungka tumatmat ah khan ah kä nami bilawh phung cu kei ah khan ah kä nami bi ah kyak ci' ciah m'shang ba gui ci. ⁴⁶ Cunung, shin gui cu angtäi ah ng'thumchanak ah hteik khai gui. Ng'düng ci gui cu angtäi ghinnak ah hteit khai gui" cik ci.