¹ Cunah ng'thu avan tüptüp Jesuh naw a m'then gui kawnah, angdüihpüi gui awn, ² "Paskha pawi a gawk law nak vaiah hnüp goi bäng a hlü ba ah mawng nami hmat ci. Acun hnüp ung Chang ah Htapa cu kutlamtung ung taih vaiah ap lawk khai gui" ciah pyein na gui ci.

³ A cun sang ung taigü ng'vai gui la khopäng ng'vaihta gui cu Kaiaphas ah ng'ming nak ciah taigütung ah a im ah ng'bum u ne, ⁴ Jesuh cu däk ne pha neta ngon vaiah ng'ge ci gui. ⁵ Cunte, ngami naw, "Chang guiah thüngmang vai ng'ä nak vai kyasei, pawi hnüp ung kä ci cang vä" ciah pyein ci gui.

⁶ Bethany pigaw ung, kheilei naw a ei ah Simon ng'mingnak ciah chang ah imkyong ah Jesuh a om tu sang ung, ⁷ Ng'hnumi tumat naw a phu aknui küi ciah tui ng'ui um cu, ei dawn pei ah ng'han ciah Bawipa ah lu k'khan ah shoi ci. ⁸ Angdüihpüi gui naw hmuh u ne m'lung k'she u neta, "Ikyasei shikcha ah na m'ghoi düt ang? ⁹ Shinah tui ng'ui cu a phu akdäm ah yoi ne dukhaih ci gui awn pek ung nik khai" ciah pyein ci gui.

¹⁰ Jesuh naw hmat gui ne, "Ikyasei shinah hnumi cu nami k'bawkbai ang? Akcang pyein ung ani naw keiah hmawk ah akni ah bik ci. ¹¹ Ikyaseiciung, dukhaih ci gui cu nangmi awn angtäi ah om ci gui. Kei läi cu nangmi awn atäng ah angtäi ah ka om ciah kä kyak ci. ¹² Shinah hnumi naw ka pum khan ah tui ng'ui ana shoi cu kapum phuh-tom vaiah a ng'khäp ah kyak ci. ¹³ Akcang ka pyein cu, Khanpughi ah ng'thu pyeinnak ah hmun gui päng ung, shinah hnumi ah bilawh gui shüm ba u ne pyein lawk khai gui" ciah pyein ci.

¹⁴ Cunkawnah, angdüihpüi ghaleigoi ungka Judah Iskariot cu taigü ng'vaihta guiah hteit ne, ¹⁵ "Jesuh cu nami kutkyong ah kaning ap law gui ung, ngui ichü nami na pek khai ang?" Ciah ng'shi gui sei, ngami naw Judah awn ngui phe thumkip ami pet vaiah ng'thu k'bäi ci gui. ¹⁶ Cungka tüin ne, Judah naw Bawipa a apnak hning vaiah lam cu shuiyap ci.

¹⁷ K'cou kä cawn ciah m'htut poi hnüp akhtükbäi ung, angdüih püi gui naw Jesuh cu k'et law u ne, "Paskha müei na ei nak vaiah a hawi ah na na pyantham sak gui hlü naw?" Ciah ng'shik ci gui.

¹⁸ Bawipa naw, "Mango kyong ah hteit u ne, cunah chang tumat awn, 'Ka khin ng'et lawk ci. Ka ng'düihpüi gui awn atäng ah na im ah paskha pawi ka bik khai' ciah saya naw na m'cäi gui ci ciah pyein na vä" cine pyein ci. ¹⁹ Angdüihpüi gui naw a pyein ah mäih ah bi u ne paskha pawi bi vaiah ng'khämhlem ci gui.

²⁰ Kho a mühün law ung Bawipa cu angdüihpüi ghaleigoi awn atäng ah eidawn kung ah ngok ci. ²¹ Ami eiawk sang ung Bawipa naw, "Akcang kaing pyein nak gui cu, nangmi ungka tumat naw kei cu na ap khai" ciah pyein ci.

²² Cunung, angdüihpüi gui cu aknui ah thüi u ne, "Bawipa, kei ma?" Ciah tumat kawnah tumat naw ng'shik ci gui.

²³ Bawipa naw, "Kei awn atäng ah eidawn ung akut pauk tuk ci naw kei cu na ap khai. ²⁴ Chang ah Htapa cu ani ah mawng Cacim ung a ng'guk ah mäih ah akcang ah hteit khai. Cunte, Chang ah Htapa ap cicu phyunnak om ci. Ani cu kä a ng'tüi tu hnga ung ni tuba khai sü" ciah pyein ci.

²⁵ Bawipa ap khai ah Judas naw cun phi, "Bawipa, kei ma?" Ciah ng'shi sei, Bawipa naw, "Na pyeinah mäih nei" ciah m'shang ba ci.

²⁶ Cunkawnah, ami ei sang ung Jesuh naw m'htut cu la ne, a bäkhäknak a m'hlümtai päng ah, m'htut cu k'bou ne angdüihpüi gui awn pe gui neta, "Shinah m'htut cu kei ah pum ah kyak ci. La ne ei vä" ciah pyein ci. ²⁷ Khap phi la ne, a bäkhänak a m'hlümtai päng ah ngami gui awn pe gui neta, "Nami van naw shinah khap cu aw vä. ²⁸ Shin cu hmakatnak gui phyawn nak vaiah chang k'da guiah phäh ah ka huk ah ng'thukhän thai la ka shitheing ah kyak ci. ²⁹ Kaning pyein nak gui cu, ka pa ah kho ah nangmi awn atäng ah akthai ah mi awk ba vaiah kho hnüp khüt seih, tukbäi tüin ne sapyit ungka lawk ciah shinah a tui cu kä ka aw ba khai" ciah pyein ci.

³⁰ Cunkawnah, ng'äi m'cu päng u ne Olives khomhtung ah hteit ci gui. ³¹ Cunung Jesuh naw, "'Kei naw htoshäm cu tuthat ne ngon khaseih, hto ng'bum cu ng'phyüngpai khai gui' ciah Cacim ung a ng'guk ah mäih ah, tuhmü ah nangmi naw nami na dawngta khai. ³² Cunte, kei cu ghingthawh ba ne, Kalilee kho ah nangmi ah mä ana ma ne ka na hteit khai" ciah pyein ci.

³³ Cunung Peter naw, "Avan naw nang Bawipa ami ning dawngtah ungphi, kei naw läi ahawi ciah phi kä kaning dawngtah khai" ciah pyein ba ci.

³⁴ Jesuh naw, "Akcang kaning pyein nak cu, atuhmü ge ah, ai kä akhon pha ung nang naw kei cu thum vei na na maa nak khai" ciah pyein ba ci.

³⁵ Peter naw, "Kei cu nang Bawipa awn atäng ah ka shih vai ung phi, a ngawi ah phi kä kaning maa nak khai" ciah pyein ci. Angdüihpüi gui avan naw phi acunah mäih ah pyein tuk ci gui.

³⁶ Cunkawnah, Jesuh cu ngami gui awn atäng ah Gethsemani ciah ng'ming nak ciah gawk ci gui. Bawipa naw angdüihpüi gui awn, "Kei cu capi ah hteit ne ka k'taigü sang ung, shin ung ana ngoh vä" ciah pyein ne, ³⁷ Peter la Zebedee ah a hta goi cu ng'khah püi goi ci. Acunung Bawipa cu a m'lungtha ken bawngbai ne, ³⁸ "Ka ng'mümcha cu a shih awng ah aknui ah thüihlei ci. A shin ung om ne kei awn atäng ah m'htei ne na ngäng vä" ciah pyein ci. ³⁹ Cunkawnah, matäng ah a pi va ng'nawn ne, ng'bawlawk neta, "Kapa aw, na ng'yak hlü a om ung shinah khap cu kei ungka naw m'hnawn ä. Cunte, kei ah ng'yakhlü ah kä kya ne, nang ah ng'yakhlü ah kya sä" ciah taigü ci. ⁴⁰ Cunkawnah angdüihpüi guiah law ba ne, ami ipdä cu a hmuh law ung, Peter awn, "Nangmi gui hnikhin tumat hngaw kei awn atäng ah m'htei ne kä nami ngäng hlawit ci ma? ⁴¹ Tüitoknak ung kä nami ng'lungtäng vaiah m'htei u ne na ngäng u neta taigü vä. Mümcha cu akthaghat hlü pang ung phi, pum cu aktha ken aih ci nei" ciah pyein ci. ⁴² Cunkawnah, akhnih vei nak va hteit ba ne, "Kapa aw, shinah khap cu kä ka awk ah kä ng'gah khai ah a kyak ung, nang ah na ng'yakhlü ah kya sä" ciah taigü ci. ⁴³ Cunkawnah, law ba mä ne, angdüihpüi gui cu ami mik gihgawng sei, ami ipdä a hmuh law ung, ⁴⁴ Ngami gui cu nawng gui shüt ne, va hteit ba ne, akma ah aktaigü ah mäih ah akthumnak ah ng'hle ne taigü ba ci. ⁴⁵ Cunkawnah, Bawipa cu angdüihpüi guiah law ba ne, "A tuhgüt ipdä u ne nami ng'yän ci ang? Teng vä. A khin gawk law pyi ci. Chang ah Htapa cu hmakat chang guiah apnak gah lawk khai. ⁴⁶ Ng'düi law u ne hteit vä. Kei na ap khai cu gawk law pyi ci, "ciah pyein ci.

⁴⁷ Acunah Bawipa naw a pyein sang ung, angdüihpüi ghaleigoi ungka Judah cu gawk lawk ci. Taigü ng'vai gui la khopäng ng'vai gui naw ami tüih law ah chang k'hli cu htung la khim gui kawit u ne, ani awn atäng ah lawk ci gui. ⁴⁸ Bawipa ap ci naw, "Kei naw ka ng'ui cu ani ah kyak ci. Ani cu pha vä" ciah nütbäi ne m'cäi gui shüt ci. ⁴⁹ Cunkyasei, ani naw Jesuh a ng'ghit ah k'et law ne, "Bawipa, phyisänak om sä" ciah pyein ne Bawipa cu ng'ui ci.

⁵⁰ Jesuh naw phi, "Ka teihpüi aw, na law ah a mawngma gui bi ä" ciah pyein nak ci. Cunung chang gui naw k'et law u ne, Jesuh cu pha u ne k'pang ci gui. ⁵¹ Acun sang ung Jesuh awn atäng ah om ci gui ungka chang tumat naw, khim phawng ne taigütung ah akchangshäm tumat cu tu sei, cunah chang ah ng'hngakoi cu pit ci. ⁵² Jesuh naw ani awn, "Na k'khim cu ghon ba ä. Ikyaseiciung khim kawit ci gui van cu khim awn didap khai gui. ⁵³ Atukbäih ge, khankhochang gakap ng'bum ghaleigoi ah ta mä da pi ciah khankhochang gui cu ana tüih law pe vaiah kapa ah kä ka ng'yoi hning ciah na ng'ngai naw? ⁵⁴ Cunah ka ciung, shinah kya lawk khai cine Cacim naw a pyein gui cu ihawkcha ah kümpäng law hning khai aw?" Ciah pyein ci. ⁵⁵ Cunah khin ung Jesuh naw chang k'hli gui awn, "M'guk-ei changkyoi nami phak khai ah mäih ah, htung ton la khim gui law püi u ne nami na phak khai nami lawk ci ma? Kei naw akhnüp tä ah ng'bum-im ung ka m'theimthang tu pang ah phi kä nami na phak ci. ⁵⁶ Cunte, shin gui van a kyak law cu profet guiah Cacim gui a kümpäng vaiah hmawk ah kyak ci, "ciah pyein ci. Cunung angdüihpüi gui van naw Bawipa cu nawng shüt u ne dawng ci gui.

⁵⁷ Jesuh phak ci gui naw, cacim k'pyang gui la chang ng'vai guiah ng'bumhtoinak taigütung Kaiaphas ah Bawipa cu ng'khah püi ci gui. ⁵⁸ Peter naw cunphi, taigütung ah im ng'vong khüt khai ah Bawipa ah hnu ani ng'lak thuuk ngai ngai khai ah läk neta, ihawkcha ah ava khüt cu a hmuh vaiah akkyong ah va lut tu ne, ngäng ciah gakap gui awn atäng ah ngok ci. ⁵⁹ Taigü ng'vai gui la taga hlawitaw ami van naw Jesuh cu ngon nak hning vaiah Bawipa ah katnak m'dang khai ah hlehlak ciah hmukshing chang shui ci gui. ⁶⁰ Hlehlak ciah hmukshing chang akda ami law tu pang ah phi, ami m'dang vai i kä hmuk ci gui. Cunkawnah, chang hnih naw law ni ne, ⁶¹ "Shinah chang naw, 'Kei naw Khanpughi ah pum-im cu phye ne kho hnüp thum düt ung ka cawh ba hning ci' ciah pyein ci, "ciah pyein lawk ci goi.

⁶² Cunung, taigütung naw ng'düi law ne, "Ng'thu m'kha ät phi kä m'shang ba ah na om ne ma? Shin gui naw ning ng'hnungtuk püi u ne, ami ning hmukshing ah ami pyein law cu ihawkcha ma?" Ciah Bawipa ng'shik ci. ⁶³ Cunte Jesuh cu a düm ah om ci. Taigütung naw, "Nang cu Khanpughi ah Htapa Bawi Khrit ah na kyak la, kä na kyak ah mawng na na m'thein gui vaiah ghing ciah Khanpughi ah ng'ming küi khü ne, kaning ng'shik ci, "ciah pyein nak ci.

⁶⁴ Jesuh naw, "Na pyein ah mäih ah kyak ci. Cunkawnah mä, kaning pyein na gui khai. Ngawi ah Chang ah Htapa cu huham awn kümbe ciah Bawi ah akpat täng ah ngo ne, khankho khongmei ng'cum ne a kyum law cu nami hmu lawk khai" ciah pyein ci.

⁶⁵ Cunung, taigütung naw, a mät ah a suinu cu phutek ne, "Shin naw, Khanpughi kat na ne, pyein püi ci. A i hmukshing ba vai hlü ba ne ma? Khanpughi a katnak ah a ng'taainak cu a tukbäih ge nami ng'ya püi ci. ⁶⁶ Ihawkcha ah nami ng'ngai ne ma?" Ciah pyein ci. Ngami naw, "Ani cu ngon vaiah khinkha ci, "ciah pyein ba ci gui. ⁶⁷ Cunkawnah, ngami gui naw Bawipa ah a hmai cu ami m'shitui awn m'thui u ne Bawipa cu tuthat ci gui. Amshah naw Bawipa cu pukbeih u ne, ⁶⁸ "Nang Bawi Khrit, nang ning k'beih cicu a u nei, pyein shüm ä" ciah pyein ci gui.

⁶⁹ Peter cu impung ng'vokyong ah ngok ci. Cun sang ung, changshäm hnumi tumat naw ani cu k'et law ne, "Nang cu kalilee chang Jesuh awn atäng ah nani om man ci, "ciah pyein ci.

⁷⁰ Peter naw, "Na pyein ah a mawngma kä ka hmat ci, "ciah avanah ma ah maa nak ci.

⁷¹ Cunkawnah, ng'vong m'kawit täng ah a va hteh nak ung, a hei changshäm tumat naw ani cu hmu ne, acun ung om ci gui awn, "Shin cu Nazareth mango chang Jesuh awn atäng ah om man ci, "ciah pyein ci.

⁷² Peter naw phi, "Ani kä ka hmat ci, "ciah ng'phyuntam ne maa nak ci.

⁷³ Cunkawnah, a shäng ng'lak na sei, a pei ah ng'düi ci naw, Peter k'et law ne, "Akcang pyein ung nang cun phi, ngami gui ungka tumat ah na kyak ci. Ikyaseiciung, na ng'thukhi naw m'dang ci, "ciah pyein ci.

⁷⁴ Peter naw phi, "Ani kä ka hmat ci, "ciah a ng'phyuntam vai awn a ng'ghit ah ai khong lawk ci.

⁷⁵ Cunung Peter naw, 'Ai kä a khon pha ung nang naw kei cu thum vei leng leng na na maa nak khai' ciah Jesuh naw a pyein ah ng'thu cu shüm ba ne k'pung ah lut law ne aknui ah kyap ci.