¹ Kho a thaih law ung taigü ng'vai gui la khopäng ng'vaihta gui naw, Jesuh cu ngon nak hning vaiah ngingoi ci gui. ² Cunkawnah, Bawipa cu khitkhon u ne, Pilat bawi ah ng'khah püi u neta ap ci gui.

³ Bawipa ap ciah Judah naw Bawipa cu ngon vaiah ng'thu ami m'cha a hmuh law ung, thüihlei ne, taigü ng'vai gui la khopäng ng'vai gui awn, ngui thumkip pe ba gui ne, ⁴ "Kei naw a katnak kä om ciah chang ah a shi cu ap ne ka hmaka pyi ci nei" ciah pyein sei, ngami gui naw, "Cun cu keimi awn i ka haw vai ma? Na mät ah bi vai na bi vai" ciah pyein ba ci gui. ⁵ Cunung, ani naw cunah ngui cu pum-im kyong ah ghawit ne lut lawk ci. Cunkawnah, a hei ah hteit ne guui awn ng'awkphyeih ci. ⁶ Taigü ng'vai gui naw cunah ngui gui cu la u ne, "Shi ah phu ah kyasei khawh m'küm ung thun tu vaiah kä khin ci, "ciah pyein u ne, ⁷ ngingoi päng u neta, khinlei guiah ami ng'phuhmun ah phäh ah, amshep ah a kho cu cunah ngui awn k'hleih ci gui. ⁸ Cunkyasei, cunah kho cu tuhngawi a khüt lawk khai ah, 'Shi kho' ciah khü ci gui. ^9-10 Cunung, "Ngami gui naw a phu ami khin ah chang ah phu ngui awn Israel pakhui gui naw ami khin ah ngui thumkip cu la u ne, Angtäighing Khanpughi naw a pyein ah mäih ah kei ah phu awn amshep ah a kho cu k'hleih ci gui" ciah Profet Jeremiah awn a pyein ah ng'thu gui cu kümpäng lawk ci.

¹¹ Jesuh cu ghangpughang ah ma ah ng'düi sei, ghangpughang naw, "Nang cu Jew pakhui guiah ami ning ghangpughang ma?" Ciah ng'shik ci. Jesuh naw cun phi, "Na pyein ah mäih ah kyak ci, "ciah pyein ba ci.

¹² Cunte, taigü ng'vai gui la khopäng ng'vai guiah m'katnak gah ciah Bawipa cu itumat phi kä m'shang ba gui ne om ci. ¹³ Cunung Pilat bawi naw Bawipa awn, "Ngami gui naw ning ng'hnungtuk püi u ne, ihlawkah ami hmukshing ami pyein ah mawng kä na ng'ya ne ma?" Ciah pyein ci. ¹⁴ Cunte, Bawipa naw ng'thu m'kha-ät phi kä m'shang ba sei, Bawi ng'vai cu aknui ah cäicam ci. ¹⁵ Ghangpughang naw cunah pawi ung chang k'hli ah phäh ami ng'yakhlü ah thawng k'kyum tumat cu m'hlawit man ci. ¹⁶ Cunah khin ung Barabas ci ami khü ah a ng'ming ng'thang ciah thawng k'khyum tumat om ci. ¹⁷ Cunkyasei, chang k'hli gui ami ng'bum law ung, Pilat Bawi naw, "Nangmi ah phäh ah a u kaning m'hlawit pe gui vai nami ng'ya hlü naw? Barabas ma? Käcung, Bawi Khrit ciah khü ah Jesuh ma?" Ciah ng'shi gui ci. ¹⁸ Cunah a ng'shi guiah amawng cu ngami gui naw m'thüi na u ne, Jesuh ami ap ah mawng Pilat bawi naw a hmat ah phäh ah kyak ci.

¹⁹ Pilat bawi cu a mangkyang ung a ngoh sang ung, akchu naw ani ah chang tüi law ne, "Nang cu cunah chang k'düng ah khanah a i kä bi-ein ä. Ikyaseiciung, ani ah hmawk ah tuhngoi ka ng'mang khui ah aknui ah ka m'lung bawngbai ci nei" ciah m'cäi ci.

²⁰ Taigü ng'vai gui la khopäng ng'vai gui naw chang k'hli gui awn, Barabas cu ng'yoi u ne, Jesuh cu ami ngon vaiah nipüi ci gui. ²¹ Cunkawnah, ghangpughang naw, "Shinah chang k'hnih ungka a u cu nangmi ah phäh ah kaning m'hlawit pe gui vai nami ng'ya hlü?" Ciah ng'shi gui sei, ngami naw, "Barabas" ciah pyein ci gui.

²² Pilat bawi naw, "Cunah a kyak ung Bawi Khrit ciah khü ah Jesuh cu a i ah ci vai aw?" Ciah ng'shi gui sei, ami van naw, "Kutlamtung ung tai ä" ciah pyein ci gui.

²³ Pilat bawi naw phi, "Ikyasei ma? Ani naw a i akshe bi ne ma?" Ciah ng'shi gui ba sei phi, ngami naw, "Ani cu kutlamtung ung tai ä" ciah ng'hawh ba pi ci gui.

²⁴ Cunung Pilat bawi naw, a mät naw kä a m'khüt cu hmu ne ami thüngkyong law pi düt hmu neta, chang k'hli ah ma ah tui la ne, a kut m'shi neta, "Shinah chang ah a shi awn kei cu ka ng'shawng ci. Nami lei cu nami mät naw ma na vä" ciah pyein ci.

²⁵ Chang van naw phi, "Ani ah a shi cu kei mi la kami hta guiah khan ah gawk sä" ciah pyein ba ci gui. ²⁶ Cunung Pilat bawi naw ngami ah phäh ah Barabas cu m'hlawit pe gui ci. Jesuh läi cu htung awn a that sak gui kawnah kutlamtung khan ah k'tai vaiah ap gui ci.

²⁷ Cunkawnah, ghangpughang ah a gakap gui naw Jesuh cu yung ah akkyong ah hei ng'khah püi u ne, gakap a ng'bum ät lüng cu Bawipa ah k'bum law u ne, ²⁸ Bawipa ah a sui sut u ne, suinu aksen cu Bawipa awn ng'vaih sak ci gui. ²⁹ Ng'hling phi lukhum ah vet u ne, Bawipa ah lukhan ah k'bün u neta, shington cu akpat kut awn kawit sak u ne, Bawipa ah ma ah m'khukhudawng u ne, "Jew pakhui guiah ghangpughang, phyisä nak om sä" ciah pyein u ne, cawhpeh nak ci gui. ³⁰ Cunkawnah, Bawipa cu ami m'shitui awn m'thui u ne, muihtung cu la ba u neta, Bawipa ah a lu cu k'that ci gui. ³¹ Cunah Bawipa ami cawhpeh nak kawnah, suisen suinu sut ba u ne, amät Bawipa ah a sui ami m'sui ba kawnah, kutlamtung khan ah k'taih vaiah ng'khah püi ci gui.

³² Cunah ami hleh law sang ung, Simon ng'ming nak ciah Cyrene kho chang tumat cu hmu u ne, k'cetkhyap u ne kawit sak ci gui. ³³ Lu-koi ah ng'ming nak ciah Kolkotha ciah ami khü ah kho hmun ah ami gawk law ung, ³⁴ Ngami gui naw Bawipa cu seikha awn ghä ah sapyit tui cu tu ci gui. Bawipa ung m'dep ne awk hlü ah m'lung-ngaih kä om ci. ³⁵ Cunung ngami gui naw Bawipa cu kutlamtung ung ami tai kawnah, Bawipa ah a sui gui cu m'shüih tawk u ne ng'pai ci gui. ³⁶ Cunkawnah, acunah hmun ung ngoh u ne, Bawipa cu ngäng ne teng ci gui. ³⁷ Bawipa ah alu khan ah, ani ami k'bün ah a katnak guknak vaiah hnün ung, 'Shin cu Judah pakhui ah ghangpughang Jesuh ah kyak ci' ciah guk ci gui. ³⁸ M'guk-ei chang kyoi k'hnih cun phi Bawipa awn atäng ah, akpat täng ah tumat, ak-eng täng ah tumat, kutlamtung ung tai ci gui. ³⁹ Cunah pei ah hlunpah ci gui naw, ami lu cu k'hngüm u ne, ⁴⁰ "Pum-im phye ne kho hnüp thum düt awn cawh khai ah chang, nang cu Khanpughi ah a Htakpa akcang ah na kyak ung, na mät naw na mät hun ne, kutlamtung ungka kyum law ä" ciah cawhpeh nak ci gui.

⁴¹ Cunah mäih ah taigü ng'vai gui naw cun phi, Cacim saya gui la khopäng ng'vai gui awn atäng ah, Bawipa cu cawhpeh na u ne, ⁴² "Shinah chang cu a hei gui a hun tu pang ung phi, amät la mät kä hun hning ci phäih nei. Israel ghangpughang ah a kyak ung, a tukbäih ge khutlamthung ungka kyum law sä. Cunung keimi naw ani kami yum khai. ⁴³ Shinah chang naw Khanpughi cu yum ne ng'ngaih u man ci. Khanpughi a ng'yakhlü a om ung ani cu a tukbäih ge ani cu hunphyawn sä. Ikyaseiciung, 'Kei cu Khanpughi ah Htapa ah ka kyak ci' ciah pyein man ci, "ciah pyein ci gui. ⁴⁴ Bawipa awn a täng ah kutlamtung ung ami taih ah m'guk-ei changkyoi goi naw phi Bawipa cu acunah mäih ah cawhpeh pyeimshek ci gui.

⁴⁵ Kho hnüp ng'lung ah tüin ne khok k'awi khüt khai ah khomdek khan avan ung hmüpnak gawk lawk ci. ⁴⁶ Kho k'awi hni khin akthumnak ung, Jesuh cu ak-aw ng'shawng awn, 'Eli, Eli lamashapakhahtani' ciah vuvik ci. Cunah a suilam cu, 'Ka Khanpughi, Ka Khanpughi, ikyasei kei cu na na nawng ma?' Ciah kyak ci.

⁴⁷ Cunah hmun ung ng'düi ciah amshah naw ng'ya ne, 'Shinah chang naw Elijah khü ci' ciah pyein ci gui.

⁴⁸ Cunung ngami gui ungka tumat naw, a ng'ghit ah vadawng ne, tui m'yak la ne, akthui awn k'be neta, acun cu muihtung pam ung khon ne, Bawipa awn tu ci. ⁴⁹ Cunte, a hei gui naw, "Om sä. Elijah naw ani cu hun khai ah a law la kä a law mi na teng kaw" ciah pyein ci gui. ⁵⁰ Cunkawnah, Jesuh naw aknui ah m'aw ne a vuvik ba päng ah a ghinnak cu ap ci.

⁵¹ Cunung Pum-im ung kalaka yih cu akkhan m'dong ungka naw akka m'dong yukhüt khai ah k'hnih ah ng'tai ne tek ci. Khomdek thüng ne lung gui phi ng'tai ci gui. ⁵² Ng'phuh hmun gui phi ng'hmawng law ne, ip pyi ci guiah chang theing guiah ami pum gui phi thawh law ba ci gui. ⁵³ Jesuh a ghinthawh law ba kawnah, ngami gui cu ng'phuh hmun gui ungka lut law u ne, theing ciah mango ah lut u ne, chang k'da guiah va ng'dang ci gui. ⁵⁴ Gakap bawi ung tüin ne ani awn a täng ah Jesuh ngäng ci gui cu shipi a thüng law la kyalawk ci gui ami hmuh law ung, aknui ah kyikyawk u ne, "Shinah chang cu akcang ah Khanpughi ah Htapa ah kyak ci, "ciah pyein ci gui. ⁵⁵ Bawipa tumbei ciah Kalilee kho ungka a hnu läk lawk ciah hnumi gui akda cun phi acun ung om u ne, a ng'shawng nak ungka naw teng ci gui. ⁵⁶ Ngami gui ung Magadalah Mary, James la Johan ah ani nu Mary la, Zebedee ah hta guiah ami nu phi om tuk ci gui.

⁵⁷ Kho a mü law ung Arimathea mango ung a ng'mang ah kya ne, Jesuh ah a hnuläk ah phi kyak ciah Joseph ng'ming nak ciah chang tumat gawk lawk ci. ⁵⁸ Ani naw Pilat bawi ah hteit ne, Jesuh ah a gook cu ng'yoi ci. Cunung Pilat bawi naw, a gok cu ami pet vaiah pyein na gui ci. ⁵⁹ Joseph naw Bawipa ah a gook cu la ne, yihbawk awn hlawp päng neta, ⁶⁰ Lung k'sheng ung a han cawh ah, amät ah ng'phuh hmun k'thai ah akkyong ah thun ci. Cunkawnah, aknui däm ciah lungnu awn ng'phuh hmun lungkhui cu k'khai ne hteit ba ci. ⁶¹ Magadalah Mary la a hei Mary gui phi cunah hmun ung om u ne, ng'phuh hmun ma ah ngok ci gui.

⁶² Ami pawmhteinak ah hnüp kawnah a ngawng hnüp ung taigü ng'vai gui la Pharisee gui cu Pilat bawi ah ng'bum law u ne, ⁶³ "Bawi ng'vai aw, cunah hlehlak ciah chang a ghing sang ung, 'Kei cu akhnüp thum hnüp ung ka ghingthawh ba khai' ciah a pyein man cu kami shüm ba ci. ⁶⁴ Cunkyasei, akhnüp thum hnüp khüt sei ng'phuh-hmun m'kawit ngäng khai ah na k'bäi pe gui ä. Käcung, angdüihpüi gui naw law u ne, a gook cu m'gu u neta, 'Ani cu shik ci gui ungka ghing thawh ba pyi ci' ciah chang gui pyein na lawk khai gui. Cunung akawnah a m'hlemhlak cu akhtükah a m'hlemhlak ah ta mä shekha pi khai" ciah pyein ci gui.

⁶⁵ Pilat bawi naw phi, "Nami mät ung, ning ngäng gui ciah gakap gui om ciah kä kya naw? Hteit u ne nami m'khütnäng hning ah akni ah ngämtäp vä" ciah pyein na gui ci. ⁶⁶ Cunung ngami gui naw hteit u ne, lungnu cu tasik daih u ne, m'kawit ngäng gakap gui m'she u neta, ng'phuh-hmun cu ngämtäp ci gui.