¹ Kyinhnüp a ng'pyi kawnah, hnüp chih ungka akhtükbäih hnüp ung kho k'thaih law sei, Mary Magdalene la a hei Mary goi cu ng'phuh hmun ah hteit ne teng ci goi. ² Acun sang ung, nuinam ciah shipi thüng lawk ci. Ikyaseiciung, Angtäighing Khanpughi ah khankhochang cu khankho ungka kyum law ne, lung m'hnawn neta, acunah khan ah ngok ci. ³ A mui cu lai a lüp ah mäih ah kya ne, a sui phi khyüibawk ah mäih ah kyak ci. ⁴ M'kawit ngäng gui cu khankhochang kyih u ne, cäicat u neta, chang shi guiah mäih ah ng'lat yawp ci gui. ⁵ Cunung, khankhochang naw hnumi goi awn, "Kä kyi niä. Kutlamtung khan ah nami taih ah Jesuh nami shui ciah kaning hmat gui ci. ⁶ Bawipa cu shin ung kä om ci. Ikyaseiciung, a pyein man ah mäih ah ghingthawh ba pyi ci. Bawipa ah a ng'yän nak cu teng law vä. ⁷ Cunkawnah, veng veng ah hteit ba u ne, angdüihpüi gui awn, 'Bawipa cu shik ci gui ungka tho ba pyi ci. Teng vä. Kalilee kho ah kä nami hteh pha ung ng'dawit ne hteit pyi ci. A ca ah Bawipa cu nami hmuk khai' cine pyein vä. Tukbäih kaning pyein na gui ci, "ciah pyein ci.

⁸ Hnumi goi cu ani kyih tu pang ah phi, aknui ah yeikyai ni ne, ng'phuh hmun ungka veng veng ah hteit ba ni ne, angdüihpüi gui awn m'thein vaiah dawng ba ci goi. ⁹ Cunah ani hteh ba sang ung, Jesuh naw ng'chum püi goi neta, yekyai ne douchang goi ci. Ngani naw Bawipa va k'et ni ne, a khopha ng'ui hnam nine, khawihnah ci goi. ¹⁰ Cunkawnah, Bawipa naw, "Kä kyi niä. Hteit ba nine, ka nau gui cu Kalilee kho ah ami hteh vaiah pyein niä. Ngami naw kei cu a ca ah na hmuk khai gui" cine pyein ci.

¹¹ Cunah hnumi goi ani hteh ba sang ung, m'kawit ngäng gui amshah phi mango kyong ah hteit u ne, taigü ng'vai gui awn a mawngma gui m'thein ba ci gui. ¹² Cunung, taigü ng'vai gui naw, angvaighaum nu gui awn atäng ah kyumbum u ne, ngingoi ba u neta, gakap gui awn ngui akda pe u ne, ¹³ "'Mü ah kami ip dä sang ung, angdüihpüi gui naw law u ne, a gook cu m'guk ci gui' cine pyein vä. ¹⁴ Shinah ng'thuthang cu uktu bawi naw a ng'yak ung keimi naw ani cu m'hmimhlawi u ne, kami ning ghung k'bawm khai" cikci gui. ¹⁵ Gakap gui cu ngui la u ne, ami m'thei ah mäih ah bik ci gui. A shikcha ah, cunah ng'thuthang cu Jew pakhui gui ung tuk-ngawi khüt seih yat ci.

¹⁶ Angdüihpüi ghalei-ät cu Bawipa naw a m'cäi guiah mäih ah Kalilee kho ah hteit u ne, m'htung ah hangkai u neta, Bawipa ami hmuh law ung ng'bawlawk u ne khawihnah ci gui. ¹⁷ Amshah naw ng'ngaih hnih ci gui. ¹⁸ Cunung, Jesuh naw va k'et gui ne, "Khankho la khomdek ah khan ah a huham gui nü cu ka gah pyi ci. ¹⁹ Cunkyasei, hteit u ne chang pakhui nü cu ka ng'düihpüi ah kyak sak u neta, a Pa, A Hta la Mümcha Theing ah ng'ming awn tui ng'hnimnak pe vä. ²⁰ Kaning m'thei gui nü cu ami läk vaiah m'theimthang vä. Kei naw phi, khomdek ah ava khütnak ah hnüp khüt khai ah, angtäi sei kaning om püi gui ci, "ciah pyein na gui ci.