¹ Bawipa cu khomhtung ungka a kyum law ba ung k'chang akda naw a hnu ah läk ci gui. ² Cunkawnah, kheilei naw a ei ah chang tumat cu ng’bawlawk neh, “Bawipa, na ng'yah hlü a om ung, kei cu na na theingthap sak hnig ci” ciah ng’yoi ci.

³ Jesuh naw, “Ka ng'ya hlük ci. Theingthap ä” ciah pyein ne a kut shäng ne, cun na chang tawk ci. Acun vai awn k'täih ne, akkheilei cu maih ne theingthap lawk ci. ⁴ Jesuh naw, “M’htei ne om vä. Shin ah mawngma cu a u awn phi kä m’thein-ein ä. Taigüpa bäng ah hteit ne, na pum m’hmuh ä. Chang a hei gui naw ami hmukshing nak thei vaiah, Moses ah m'thumkhän ah mäih ah, na douthak vai" ciah pyein ci.

⁵ Cunkawnah, Jesuh cu Capernaum mango a gawk law ung, gakap bawi tumat cu a pei ah law ne, ⁶ “Bawipa, kei ah ka chang tumat cu a kutkho shik ciah natnak awn aknui ah geinbai ne im ah ng’yeng ci” ciah ng'hungpa nak ci.

⁷ Jesuh naw, “Ka mät law ne ka gai sak khai” ciah a pyein ung, ⁸ Gakap bawi naw, “Bawipa, kei ah imkyong ah na lut law vaiah kä ka khinkha ci. Ng'thu m’kha ät na pyein ung, ka k'chang cu gai ba khai nei. ⁹ M’tumtäng ah akyak ung, kei cu bawi ah k'kaa ah changshäm ah ka kyak pang ah phi, gakap gui cu uk gui ne, tumat cu, 'hteit ä,' ka ci ung hteit ci. Tumat awn, 'law ä' ka ci ung lawk ci. Ka k'changshäm awn, 'Shin na bi vai' ka ci ung bik ci' ciah pyein ci.

¹⁰ Cunah a pyein cu Jesuh naw a ng'yah law ung, cäicam ne, “Akcang ka pyein cu, shinah mäih yumnak cu Israel pakui ung kä ka hmu phak ci. ¹¹ Ka pyein ba mä khai. 'Chang gui cu ng'hni law lam, ng’hni kyak lam gui ungka law u ne, khankho ah Abraham, Isaac, la Jakob ni awn atäng ah ei vun ne ngok khai gui. ¹² Cunte, a kho chang gui cu, vu ng'pyang u ne, m’ni htui ha m'htepnak akpung täng akhmüp khui ah hloit-tämnak gah khai gui” ciah a hnuläk gui awn m’thein gui päng ne, ¹³ Gakap bawi awn, “Hteit ä. Na yumnak ah mäih ah nang ung kya sä” ciah pyein ci. A cun ung ani ah akchang cu kheilei a van maih ne, gaigong lawk ci.

¹⁴ Cunkawnah Jesuh cu Peter ah im ah hteit ne, Peter ah pikho cu m’hnat sei hmuk ci. ¹⁵ A cunah hnumi ah kut cu tawk sei, ani cu a m'hnatnak ungka gaigong law ba ne, tho law neta khinlei na gui ci. ¹⁶ Kho a mü law ung, khokshe naw a kai nak gui akda cu a pei ah ng'khah law püi u sei, a ng'thu m'gawng düt awn, cunah khokshe gui cu k'täm gui ci. Gopyam ci gui van phi gaiba sak gui ci. ¹⁷ Cunah mawngma cu, "Ani naw mi natnak gui ungka na gai sak gui ci, "ciah profet Isaiah naw a pyein man ah ng'thu a küm vaiah hmawk ah kyak ci.

¹⁸ Chang akda naw Bawipa cu ami shumkuvai cu a hmuh law ung, tuikam heiga täng ah hteh vaiah pyein ci. ¹⁹ Cun ung Cacim saya tumat naw law ne, Bawipa, na hteh nak päng ah kaning läk khai ciah pyein ci.

²⁰ Jesuh naw, “Hla-ui ung a khui om ci. Khankho ah yawng thei ciah kha gui pi a mi ng’dümnak om ci. Chang ah hta läi, a lu a ng'khum nak vai phi kä om ci” ciah pyein ci.

²¹ Ahei angdüipüi tumat naw, "Bawipa, ka pa ah hteit ne ka htüm tuba cang khai" ciah pyein ci.

²² Jesuh naw pi, "Ka hnu na läk ä. Chang shi gui naw, ami mät chang shi gui cu htümpäng u sä" ciah pyein ci.

²³ Cunkawnah ng’hleiko ung lut ba sei, angdüipüi gui naw läk ci gui. Tui ah khan ah khokhishe aknui khi law ne ng'hleikho cu aknui ah ng’hnawk lawk ci. ²⁴ Bawipa cu ip dä ci. ²⁵ Ahnukläk gui naw k'et law u ne, Bawipa cu m’tho ci gui. Cunkawn ah, "Bawipa, na hun gui ä. Kami di lawk khai kya vei" ciah pyein ci gui.

²⁶ Bawipa naw, "Ami yumnak ken ci gui aw, ikyasei nami kyikyawk ne ma?" Ciah pyein ci. Cunkawnah, ng'düi law ne khokhi la tuinu cu a düm ah ani om vaiah pyein sei kho ding lawk ci.

²⁷ Cunah chang gui naw, "Shinah chang cu a u ma? Khokhi la tuinu naw hngaw a pyein ng'ngai ci phäih nei" ciah cäicam ci gui.

²⁸ Cunkawnah, Bawipa cu tuinu tuikam vangtäng ah om ciah Gadara kho chang guiah kho ah a gawk law ung, khokshe naw a kai nak goi ah chang k'hnih cu ng'phuh hmun ungka lut law ni ne Bawipa douchang lawk ci goi. Ngani cu aknui ah gugak shekha ni sei, a u tumat phi cunah lam awn kä hteit hlawit ci. ²⁹ A ng'ghit ah, "Khanpughi ah htapa Jesuh, nang cu keimi ung a i na shui lawk ci ma? Kho hnüp kä ng'küm pha sei, na na dukdei na gui khai ah, sha ah na lawk ci ma?" Ciah vuvik ne ng'shik ci gui.

³⁰ Ngami awn kä thuuk aih ciah hmun ung vawk ng'bum tumat om ci. ³¹ Khokshe gui naw, "Bawipa, na na k'täm gui hlü ung vawk gui khui ah na k'täm gui ä" ciah Bawipa cu ng'hungpa nak ci gui.

³² Bawipa naw phi, "Hteit vä" ciah pyein sei, ngami gui cu lut law u ne vawk gui khui ah lut u sei, vawk ng'bum a lüng cu ng'ghem ungka naw tuinu khui ah yu lut u ne, shik ci gui. ³³ Vawk shäm ci gui cu dawng u ne, mango kyong ah lut u ne, khokshe naw a kai nak guiah chang gui ungka naw tüin ne, amawngma gui van cu m'thein tuba ci gui. ³⁴ Cunung, mango chang a van lut law u ne, Bawipa ami hmuh law ung, ami kho ungka naw a hteh ba vaiah ng'hungpa nak ci gui.