¹ Nami mät ng'thumcha nak kä nami gah vaiah chang hei gui cu ng'thu kä m'cha vä. ² Ikyaseiciung, chang hei ng'thu nami m'cha ah mäih ah, nami mät cu ng'thumcha nak gah u ne, nami näkbäi ah mäih nami mät ah phäh ah, näkbäi ba nak om khai. ³ Namät ah mik ung om ciah shington cu kä hmu pang ne, ikyasei chang ah mik ungka bikbäi cu na hmuh ang? ⁴ Na mät ah mik ung shington om tulang sei, na phäinau awn, 'Namik ek bikbäi ning lak tu pe kawng,' ciah ihawkcha ah na pyein hning ma? ⁵ Chang k'hman ah ng'she ciah chang aw, namik khui ungka shington cu akma ah hlet ä. Cungvah, na phäinau ah mik khui ungka bikbäi cu a ng'khai ah na hmuk khai. ⁶ Theing cicu ui gui awn kä nami pet vai. Cümlung küi gui cu vok guiah ma ah kä nami tha vai. Cunah nami tha ung ngami naw ami kho awn leh u ne, ng'hlat law u ne, nami mät ami ning htui law ba vai cu ng'ä vaiah kyak ci.

⁷ Ng’yoi vä. Nami ng’yoih ung nami gah khai. Shui vä. Nami shui ung nami hmuk khai. Shuiyap ung hmuh vai. Shoh cu khäk vä. Nami khäk ung ng'hmawng lawk khai. ⁸ Ikyaseiciung, ng’yoi ci phung naw gah ci. Shui ci naw hmuk ci. Shoh khäk ci awn phi k'hmawn pek ci. ⁹ Buh thäh ciah a hta awn lung pe ne, ¹⁰ Nga akthäh ung phyu pe khai ah chang tumatmat nangmi ung om naw? ¹¹ Nangmi cu akshe ah nami kyak tu pang ah phi, nami hta gui awn akni nami peet thei ung, khankho ah om ciah nami pa naw, taigü ci gui awn, cunah mä ni ba pi cicu ning pe gui khai ah kä kya naw? ¹² Chang gui naw nami k'khan ah, ami ning bi sak hlüah mäi ah, chang hei guiah khan ah bi vä. Shinah ng'thumkhän cu ng'thumkhän Cacim la profet guiah Cacim ah a uitak ah kyak ci.

¹³ Lam ng’cet ung lut vä. Dimaihnak ung gawknak ah lam cu a m'kawit ng'shawng ciah kyasei, lut ci gui cu da ci. ¹⁴ Ghinnak ung gawknak ah lam la m’kawit cu aknui ng’cet ciah kyasei, hmu ne lut ci gui cu ken ci.

¹⁵ Akkyong ah hlokang ciah hla-ui ah kya ne, htovun ng’vai neta, ning law shi gui ciah hlehlak ciah profet gui cu, m'htei na ne k'khen vä. ¹⁶ Ngami ah ami omkya a m'theih awn ngami cu nami k'shing lawk khai. Ng’hling ghing ungka sapyit m’theih phi kya, ng’hling ghing ungka ng’bang k’theih phi kya, nami bit man naw? ¹⁷ Nik ciah shing ghing naw nik ciah a m'theih, kä nik ciah shing ghing naw kä nik ciah a m'theih cu m'thei thei ci. ¹⁸ Nik ciah shing ghing naw kä ni ciah a m'theih, kä nik ciah shing ghing naw nik ciah a m'theih cu kä m'theih thei ci. ¹⁹ Nik ciah a m’theih kä m’theih ciah a ghing phung cu tupit u ne, mei awn m'khih khai gui. ²⁰ Cunkyasei, cunah profet guiah ami omkya awn ngami gui cu nami k'shing khai. ²¹ 'Bawipa, Bawipa ciah na khü ci phung, khankho ah lut tuk khai ah kä kyak ci. Khankho ah om ciah ka pa ah a ng'yakhlü bik ci bäng vah lut tuk khai. ²² Cunah k’hnüp ung, Bawipa, Bawipa keimi cu nang ah huham awn, kami m'theimthang ciah kä kya naw? Nang ah huham awn khokshe gui kami k'täm ciah kä kya naw? Nang ah huham awn cäicam gui vai akda kami m'dang ciah kä kya naw?' Ciah kei ah pyein lawk khai gui. ²³ Cunah a mi pyein law ung, 'Api ah phi kä kaning hmat gui ci. Kä ng'düng ci nami bik ci gui, kei ungka naw hteit vä' ciah a kheng kheng ah ka pyein khai.

²⁴ Chang tumat naw ka pyein ah ng'thu cu ng'ya ne ng'ngai ci. Ani cu k'lung ah khan ah im co ciah hmuhmat chang awn täng ci. ²⁵ Kho aa ne, tuinu tui kai law neta, kho khi law ne cunah im cu a khi law ung, lung ah khan ah cawh ah kyasei, kä kyuk ci. ²⁶ Chang tumat naw ka pyein ah ng'thu ng'ya ne kä ng'ngai ci. Ani cu salaigin ah khan ah im co ciah chang k'ang awn täng ci. ²⁷ Kho aa ne tui lawng law ne, kho khi ne im a khi law ung, aknui ah kyuk ci.

²⁸ Jesuh naw cunah ng’thu a pyein kawnah, ng'ngai tuk ciah chang van naw a m'cumcäi ng'thumkha gui cu aknui ah cäicam ci gui. ²⁹ Ikyaseiciung, Cacim pyang saya gui awn kä täng ne uktu vai süah m'cumcäi sei kyak ci.