¹ Nami ng'düngdainak cu chang gui naw ami hmuh vaiah kä nami k'tha nak en vaiah m'htei na vä. Käcung, Khankho ah om ciah nami Pa ungka m'shumphyuknak kä nami gah khai. ² Cunkyasei, na petak law ung, chang htingling ah ng'she ci naw chang guiah m'hlümtai a ng'yak hlü ah phäh ah, zayat gui la lam guiah khan ah, a bi ah mäih ah, nami mät ah ma ah phyungheng kä nami mut-ein vai. Akcang kaning pyein na gui ci. Ngami cu ami mät ah phu ng'kheng gah pyi ci gui. ³ Nang läi cu, na petak law ung, na petak gui kä a ng'dang ein vaiah, na k'eng kut ah pet cu na k'pat kut hngaw naw kä hmat-ein sä. ⁴ Cunung, kä ng'dang ciah a mawngma gui hmuk ciah napa naw m'cümhnah gui ning pek khai.

⁵ Nami taigü law ung phi, chang k'ni ah ng'she ci guiah mäih ah, kä k'taigü vä. Ikyaseiciung, ngami cu chang gui naw ami hmuh vaiah taigüim gui la, lam ng'ghum gui ung ng'düi u ne, taigü hlü ci gui. Akcang ah kaning pyein na gui ci. Ngami cu ami mät ah phu ng'kheng gah pyi ci gui. ⁶ Nang läi cu na k'taigü law ung, na im kyong ah lut ne, k'sho khai cang neta, kä ng'dangshai ci ung om ciah napa ah taigü ä. Cunung, kä ng'dang ci hmuk ciah napa naw nang awn m'cümhnah ning pek khai. ⁷ Cunkawnah, nami k'taigü law ung, khuihei guiah mäih ah, läp läp ne a kholä ah kä nami kyak vai. Ngami cu ng'thu akda leng leng pyein u ne, a u naw bawh ng'ngai khai ah ng'ngai thei ci gui. ⁸ Nami Pa naw kä nami k'taigü pha ge ung, nami hlü gui cu hmat pyi ci nei.

⁹ Cunkyasei, shinah taigü vä. Khankho ah om ciah kami pa: Na ng'ming theing cu kyih-aa nak om sä; ¹⁴ Chang hei naw aning katnak gui nami ng'ngaih pe ung, khankho ah om ciah nami Pa naw phi, nami katnak ning ng'ngaih pe gui khai. ¹⁵ Cungphih, chang hei kä nami ng'ngaih pe ung läi, nami Pa naw phi, nami katnak gui käning ng'ngaih pe gui khai.

¹⁶ Ei nami hlawi law ung, chang k'ni ah ng'she ci guiah mäih ah, bawngbai ciah hmai cu kä m'dang-ein vä. Ikyaseiciung, ngami cu ei ami hlawi ah mawng, chang gui ung a ng'dang vaiah, ami hmai cu pyang thei ci gui. Akcang kaning pyein na gui khai. Ngami cu ami mät ah phu ng'kheng gah pyi ci gui. ¹⁷ Cungphih, nang cu ei na hlawi law ung, ei na hlawi ah mawng chang guiah ma ah kä ng'dang-ein sak ne, ¹⁸ kä ng'dang ci ung om ciah na Pa ah ma bäng ah, a ng'dang vaiah, na lu cu si awn hlup ne, na hmai phi m'hla ä. Cunung, kä ng'dang ci hmuk ciah na Pa naw m'cümhnah cu ning pek khai.

¹⁹ M'kyit la hnai kai ci naw m'shet thei ne m'guk-ei naw a m'guk thei ah shinah khomdek khan ah, nami khawhcham gui cu kä m'cun-ein vä. ²⁰ M'kyit la hnai kai ci naw kä a m'shet hlawit, m'guk-ei naw phi kä a m'guk hlawit ah khankho ah, nami khawhcham gui m'cun vä. ²¹ Ikyaseiciung, na khawhcham a om nak ah hmun ung na m'lung-ngaih gawk thei ci. ²² Mik cu pum ah meidei ah kyak ci. Cunkyasei, namik a hti ung, na pum lüng cu deikhang khai. ²³ Cungphih, namik kä a hti ung, na pum a lüng cu m'hmüp khai. Cunkyasei, nang ung om ciah a deikhang cu akhmüp ah kya ne, cunah akhmüp cu a i hlawk ah hmüp khai aw! ²⁴ A u naw phi, bawi ng'hnih ah m'ga kä bi hning ci. Ikyaseiciung, ani naw tumat cu thüi nane, tumat cu yeinak khai. Käcung, tumat ung bekhüt ne tumat cu hmushim khai. Nangmi naw Khanpughi la khomdek khawhcham ah m'ga khut cu, a kawng-ät ah kä nami bi hlawit khai. ²⁵ Cunkyasei, kaning pyein na gui khai. Nami ghinnak vaiah a i ei vai, a i awk vai ciah phi kya, nami pum ah phäh ah a i sui vai cine phi kya, kä ng'ä vä. Ghinnak cu ei ah ta mä, a phu küi pi ci. Pum cun phi sui ah ta mä, küikyang pi ciah kä kya naw? ²⁶ Khankho kha gui teng u ne, ng'ngaktüh vä. Ngami cu kä phusho ci gui. Khämkonak la k'khei ah m'cun nak phi kä bik ci gui. Cungphih, khankho ah nami pa naw ngami cu tumbei gui ci. Nangmi cu cunah kha guiah ta mä, a phu nami küi pi ci kä kya naw? ²⁷ Nangmi ung a u naw a ng'ä ng'ai nak awn a ng'ghihnun cu khaup-ät hman ng'shäi sak pi hning naw? ²⁸ Sui ah phäh phi, ikyasei nami ng'ä ang? Pya ah om ciah kheipai gui cu ihawkcha ah ami ng'ghotai law teng u ne, ng'ngaktüh vä. Ngami cu ng'bi ah phi kä ng'bik ci gui. Tah phi kä tak ci gui. ²⁹ Cungphih, kaning pyein nak gui cu bawimangnak awn kümbe ciah Solomon Ghangpughang hngaw naw, cunah khokpya kheipai ah mäih, kä ng'suiawi ghüt ci. ³⁰ Nami yumnak ken ci gui aw, tuhngawi ghing tu pang ne phi, ngawng ung meiphum khui ah gawk khai ah khumgho hngaw, Khanpughi naw shin hlawk ah a m'sui m'sak ung nangmi cu, ni ba pi khai ah ning m'suimsak gui khai. ³¹ Cunkyasei, a i ei law vai? A i awk law vai? A i sui law vai? Ciah kä ng'ä-ein vä. ³² Ikyaseiciung, khui hei gui naw shin gui avan k'tha nane shuiyap thei ci gui. Cungphih, khankho ah nami pa naw shin gui avan nami hlü ah mawng cu hmat pyi ci. ³³ Khanpughi ah ng'dügüng kawngma la a ng'düngnak cu akhtükbäih ah shui vä. Cunkawnah, shin gui cu thap ne ning pe gui khai. ³⁴ Cunkyasei, ngawng ah phäh ah, kä ng'ä vä. Ikyaseiciung, a mät ngawng cu amät ah phäh ah ng'ä khai. Kho hnüp-ät ung büiawit ah kä k'ni gui cu, acunah hnüp ah phäh ah, khäk pyi ci.