¹ Cunah chang gui cu hmu gui ne, Bawipa cu m’htung khan ah kai ne a ngoh law ung, a hnukläk gui naw Bawipa cu k'et lawk ci gui. ² Cunung a m'gawng cu k'hmawng ne a m'theimthang law gui cu,

¹¹ Kei ah hmawk ah nangmi cu ning pyeimshet u ne, ning dukdei na u ne, kä nami omkya ami ning puk law ung, nami phun shen ci. ¹² Yeikyai tuihlim vä. Ikyaseiciung, khankho ah nami gah vaiah a phu ng'kheng cu däm aih ci. Nami ma ah profet gui cu ngami naw a cunah mäih ah dukdeinak ci gui.

¹³ Nangmi cu shinah khomdek ah m’shii ah nami kyak ci. Cunte, m'shii ungka a tuui nak a maih ah a kyak ung, ihawcha ah tui ba khai ma? A i ung phi htungmang ba ne kä gah ah kyasei, k'pung ah ghawit ne chang gui naw ami ng'leh nak vai bäng vah pawih ba ci. ¹⁴ Nangmi cu shinah khomdek ah a deikhang ah nami kyak ci. Khomhtung ung m'düih ah mango cu thup ne kä gah ci. ¹⁵ Mei m’dei ne a u naw dawn awn kä khum man ci. Imkyong chang avan naw a deikhang ami hmuh vaiah lung k'pei ah khan ah taih man ci gui. ¹⁶ Cunah mäih ah chang hei gui naw nami ni nak hmu ne, khankho ah om ciah nami pa ah bawimangnak ami m'hlümtai vaiah, chang hei guiah ma ah nami deikhangnak cu k'khang sak vä.

¹⁷ Ng’thumkhän Cacim la profet guiah Cacim gui, m’di vaiah ka lawk ciah kä ng'ngai vä. M'dimdap vaiah ka lawk ciah kä kyak ci. Kümpäng sak vaiah ka lawk ci. ¹⁸ Akcang ka pyein cu khankho la khomdek kä a di pha güt, ng’thumkhän Cacim ungka ak-yaw pi, ca ng'lung tumat phi kä a kümpäng pha ung kä didap khai. ¹⁹ Cunkyasei chang tumat naw, ak-yaw-pi ng’thumkhän tumat cu amät naw, m’chemsho ne chang hei gui awn phi a cunah mäih bä ah m’theimthang ci. Cunah chang cu khankho ah ak-yaw pi bäih k’chang ah kyak khai. Chang tumat naw cu amät naw phi läk ne chang hei gui phih m’theimthang gui ci. ²⁰ Cunah chang cu khankho ah kükyang khai. Nami omkya cu Pharise gui la Cacim hmat saya guiah omkya ah ta mä, kä a bä tuba läi ung, nangmi cu khankho ah kä nami lut tuk khai ciah akcang ka pyein ci.

²¹ Chang ah hnun kä ngon vai. Chang ngon cicu yung ah m'katnak gah khin ci ciah acau ng'thumkhän nami ng'ya pyi ci. ²² Kei naw ng'thu ka m'khän cu, a phäinau ah khan ah aknui ah m'lungshe cicu yung ah m'katnak gah khin ci. A phäinau pyeimshek cicu hlawitaw yung ah ng'thu m'cha nak gah khin ci. A phäinau plah cicu m'htemei khui ah m'khih vaiah khinkha ci. ²³ Cunkyasei, nang cu khawihnah nak na douthak khai ah mangkyang ah na hteh law ung na phäinau naw aning m'kat vai tumat mat om ciah na shüm law ba a kyak ung, mangkyang ah ma ah na douthaknak cu tha shüt ne hteit ba cang ä. ²⁴ Na phäinau awn ng'ge ba cang ne, hteit ba ne na douthak awn khawihnah ä. ²⁵ Nani ng’gen ciah chang awn lam atäng ah nani hteh sang ung, ani ah m'lung na duk sak vaiah a ng'tawng ah na bi vai. Käcung, nani ng'gen ci naw tagabawi ah ning ap khai. Tagabawi naw phi, gakap guiah kutkyong ah ning ap ne thawng ning chyum khai. ²⁶ Na ng’lawhchan vai nü kä na ng’lawh pha chüih, thawng khui ungka kä na lut law ba khai ciah akcang ka pyein ci.

²⁷ Chang ah chu kä kat püi vai ciah puma ng’thu cu nami ng’ya pyi ci. ²⁸ Kei naw ng'thu ka m'khän cu, katnak püi hlü ah m’lung ngaih awn ami k'chu teng cicu, a m’lung kyong ah cunah hnumi kat na pyi ci. ²⁹ Cunkyasei, na k'patlam mik a kyak ung phi, a ning katsak ah a kyak ung, cunah mik cu na k'koih ein vai. Na pum a lüng awn m’htemei khui ah yukshum na gah ah mä, na pum ungka tumat mat a di ung bä tuba ci. ³⁰ Cunah mäih ah, na k'patkut ah a kyak ungphi, aning kat sak ah a kyak ung, cunah kut cu ghem pit ä. Na pum a lüng a di ah mä, na pum ungka tumat mat a di ung ni tuba khai. ³¹ Cunkawnah, 'Akchu awn ng’tai hlük ci naw ng’tai nak ca cu pe sä' ciah phi om ci. ³² Kei naw ka pyein cu, kyoikatnak mawngma ah kawnah, a hei ah mawngma awn akchu ng'tai püi cicu akchu kat sak ci. Ami ng’tai püi ah hnumi awn ng'chungla cicu ami chu kat püi ciah kyak ci.

³³ Cunkawnah, 'Hle pyein ne kä ng'phyuntam ne, na khän ah na ng'thukhän gui cu, Khanpughi ah ma ah na shaitak ung na bekhüt vai' ciah cau puma cu nami ng'ya pyi ci. ³⁴ Kei naw ka pyein cu ng'phyuntam cu api ah phi kä nami bi vai. Khankho ng'mingpha ne kä nami ng'phyuntam vai. Khankho cu Khanpughi ah mangkyak ah kyak ci. ³⁵ Khomdek ng'mingpha ne kä nami ng'phyun vai. Khomdek cu Khanpughi ah a khaw taih nak ah k'pei ah kyak ci. Jerusalem mango ng'mingpha ne kä ng'phyun vai. Kükyang ciah Bawi ng’vaiah mango ah kyak ci. ³⁶ Lusam ng'ma-ät hta pang hngaw, bawk khai, le khai ah kä m'khüt hning mi ne, mät ah lupum ng'mingpha ne kä nami ng'phyun vai. ³⁷ Na ng’thu law ung akcang cu akcang, hle cu hle ah na pyein vai. Cunah mä a hlungsham law ung kä nik ci.

³⁸ 'Mik ah phäh mik, ha ah phäh ha' ciah pyein man cu nami ng'ya pyi ci. ³⁹ Cunte, kei naw kaning pyein na gui khai. Changshe cu kä ng'cuhcan püi vä. Na k'pat täng ng'beng ning k'beih ci awn, a phe täng ah phi m'hlat ba pe ä. ⁴⁰ Yung ah ning k'cha ne na sui ning lak pe hlük ci awn, na suinu phi lak sak ä. ⁴¹ Ning kalu nane mäng-ät ning hteh sak ci a om ung, ani awn atäng ah mäng hnih na hteh vai. ⁴² Ning ng’yoi ci na pet vai. Ning pungpawn law nak ci phi kä na maa nak vai.

⁴³ 'Na pawchang cu m’hni ne, na ga cu na thüi nak vai' ciah ng’thu m’cäi cu nami ng’ya pyi ci. ⁴⁴ Cunte, kaning pyein na gui khai. Nami ga cu m'hni u ne ning dukdei nak ci guiah phäh ah taigü vä. ⁴⁵ Cungvah, nangmi cu khankho ah om ciah nami pa ah a hta guiah nami kyak khai. Ikyaseiciung, Bawipa naw changshe gui la changni gui vanah khan ah a khohni cu lut law sak ne, ng'düng ci la kä ng'düng ci vanah khan ah a kho aa sak ci. ⁴⁶ Ning yeinak ci gui bäng nami yeinak ung nangmi ung a i a phu ng'kheng om khai aw? A khon louk ci gui naw hngaw acunah mäih ah bik ci gui kä kya naw? ⁴⁷ Cunkawnah, nami phäinau gui bäng nami ng'hngungpai püi ung a i ung nami kü-hnga nak om khai aw? Khuihei gui hngaw naw acunah mäih ah bik ci gui, kä kya naw? ⁴⁸ Cunkyasei, khankho ah om ciah nami pa cu a kümpäng ah mäih ah nangmi phi kümpäng vä.