¹ Cunkawnah, khogam ah tüitoknak a büiawit vaiah Mümcha Theing naw Jesuh cu pya ah ng'khahpüi ci. ² Hnüp phlikip la mü phlikip ung ei hlawi ne, m'cawi lawk ci. ³ Cunung, tüitok ci naw k'et law ne, "Nang cu Khanpughi ah htapa akcang ah na kyak ung, shinah lung gui cu m'htut ah pyang ä" ciah pyein ci.

⁴ Bawipa naw phi, 'Chang cu ei bäng awn ghing ciah kä kyak ci. Khanpughi ah m'gawng ungka lut lawk ciah a ng'thu gui avan awn ghing ci' ciah Cacim ung lawk ci, "ciah pyein ba ci.

⁵ Cunkawnah khogam naw Bawipa cu mango theing ah ng'khah püi ne, taigüim m'kyung khan ah a ng'düi sak kawn ah, ⁶ "Nang cu Khanpughi ah a htapa akcang ah na kyak ung, k'kaa ah na yu ng'phäi vai. Ikyaseiciung, 'Khanpughi naw a mät ah khankhochang gui cu nang ah phäh ah m'cäi gui seih, na khaw kä na m'hlut-ein vaiah ngami naw ami kut awn ning yäkchang khai gui' cine Cacim ung ng'guk ci, "ciah pyein ci.

⁷ Jesuh naw phi, "Na Khanpughi Angtäighing Khanpughi cu kä na tüitok dungdawng nak vai' ciah Cacim ung ng'guk ci, "ciah pyein ba ci.

⁸ Cunkawnah, Khogam naw Bawipa cu aknui ah hlün ciah khomhtung ah hankai püi ne, khomdek khopäng avan la acun guiah bawimang ng'büh-mang nak gui cu yon neta, ⁹ "Phubawk ne kei cu na na khawihnah ung shin gui avan cu kaning pek khai" ciah pyein ci.

¹⁰ Jesuh naw phi, "Nang khogam, hteit ä. 'Na K'Khanpughi Angtäighing Khanpughi cu khawihnah ne, cunah Bawi tumat bäng na m'hlümtai vai' ciah Cacim ung ng'guk ci, "ciah pyein ba ci.

¹¹ Cunung, khogam cu Bawipa ungka naw a hteh ba kawn ah, khankho chang gui naw k'et law u ne Bawipa cu m'htei ci gui.

¹² Johan cu thawng ami ghum ah mawng Jesuh naw ng'ya ne Kalilee kho ah hteit ci. ¹³ Cunkawnah, Nazareth kho ungka lut law ne, tuinu tuikam pei ah om ciah Kapernaum mango ah hteit ne om ci. Cunah mango cu Zebulun la Naphtali kho ung om ci. ¹⁴ Shin cu profet Isaiah awn a pyein ah ng'thumkha, a kümpäng vaiah hmawk ah kyak ci. ¹⁷ Cungka naw tüin ne, Jesuh naw, "Khankho uknak ng'et lawk ciah kyasei, ng'yuu vä" ciah ng'thu pyein ci. ¹⁸ Kalilee tuinukam pei ah a hteh sang ung ng'phäinau goiah kyak ciah Simon ami ciah Peter la anau Andrew cu ngakpha goi ah kya ni ne, ng'vai ani voih cu hmu goi ci. ¹⁹ Bawipa naw, "Ka hnu ah na läk niä. Chang phak ciah ngakpha ah kaning pyang goi khai" ciah pyein seih, ²⁰ ani ng'vai gui a ng'ghit ah nawng shüt ni ne, a hnu läk ci goi. ²¹ Cunkawnah, acun ungka naw ng'täi ne hteit neta, a hei ng'phäinau goi kyak ciah Zebedee ah a hta James la anau Johan cu ani pa Zebedee awn atäng ah ng'hleiko kyong ah ami ng'vai gui ghi ba u sei hmu gui ne, ngani phi khü goi ci. ²² Ngani naw phi a ng'ghit ah ani ng'hleiko la ani pa cu nawng shüt ni ne, a hnu läk ci goi.

²³ Cunkawnah, Bawipa cu Kalilee kho a lüng ung hteit ne zayat gui ung m'theimthang gui neta, a uknak kho ah mawng ng'thu k'ni pyein ne chang gui naw ami m'neh ah natnak a päng päng la gopyamnak avan ungka gai ba sak gui ci. ²⁴ Cunung Bawipa ah mawng ng'thu cu Syria kho avanah yat yawp seih, chang gui naw natnak a päng päng büiawit ne ng'hlong-ei ci gui, khokshe naw a kai nak gui, mangtak ci gui, ami kutkhaw shik ci gui la gopyam ci phung cu, ng'khah law püi u sei, Bawipa naw gai sak gui ci. ²⁵ Cunkyasei, Kalilee kho, Dekapolis kho, Jerusalem mango, Judea kho la Jordan tuikam pei ungka chang akda naw a hnu läk ci gui.