¹ Cunah kho hnüp gui ung tui ng'hnim Johan cu ng'dang law ne, ² "Khankho uknak ng'et law pyi ciah kyasei, ng'yuu ba vä" ciah Judah kho pyama ah ng'thu pyein ci. ³ Profet Isaiah naw shinah pyein ci, “Pya ah k'aw ng'shang lawk cicu, Angtäighing Khanpughi ah a hteh nak vaiah lam cu pyang vä. A hteh nak vaiah lam gui cu ng'shung sak vä."

⁴ Johan cu kalauk mu awn tak ah htu ng’thu ne, a khe cu savun awn khon ci. Ng'geng la khoitui cu ei ci. ⁵ Cunung, Jerusalem mango, Judah kho a lüng la Jordan tuikam pei gui ung om ciah chang gui cu Johan ah hteit u ne, ⁶ ami mät ah katnak gui phleh u ne, Jordan tuilawng ung ani ah tui ng'hnim nak dou ci gui. ⁷ Ani ah tui ng'phumnak dou khai ah lawk ciah Pharisee gui la Sadducee gui akda cu a hmuh law gui ung, "Phyushe ng'hlom gui aw, nami khan ah gawk law hlük ciah Khanpughi ah m'lungshe nak ungka naw, nami dawng vaiah a u naw, aning m'cäi gui ang? ⁸ Cunkyasei, ng'yutnak awn khinkha ciah a m'theih ah m'theih vä. ⁹ 'Mikmi ung mipa Abraham om ci' ciah kä nami ng'ngaih vai. Khanpughi naw Abraham ah phäh ah shinah lung gui ungka naw, a htanau gui cu m'dang law hning ci ciah akcang ka pyein ci. ¹⁰ Ghei cu shing pya gui pei ah tha pyi ah kyasei akni ah kä m'theih ciah a dung phung cu tupit ne mei awn m'khih vai. ¹¹ Kei naw nangmi cu ng'yutnak ah tui ng'phumnak kaning pe gui ci. Cunte, kei ah mä hlüngtai pi ciah Bawi cu ka hnu ah law ba khai. Cunah Bawi ah a khodawk gui hngaw, phyen pet vaiah kei cu kä ka khinkha ci. Cunah Bawi naw Mümcha Theing awn phi kya, mei awn phi kya, tui ng'phumnak ning pe gui khai. ¹² A kut ung htang k'chü nak ah chüdawn cu kawit ne, a mät ah geitko gui cu avan khämtong ne, a mät ah htamguh ng'tak gui cu, akkhei ung thun ne, a ng'hi gui cu kä dim hlawit ciah mei awn m'khih khai" ciah pyein ci.

¹³ Cun sang ung, Jesuh cu Johan ah tui ng'phumnak dou khai ah Kalilee ungka naw Jordan tuilawng ah lawk ci. ¹⁴ Cunung, Johan naw Bawipa cu maa na ne, "Ka mät ge hngaw phi, na mät naw vah tui ng'phumnak na na pet khai ah kyasei, kei ah na lawk ci ma?" Ciah pyein ci. ¹⁵ Jeshuh naw, "Tukbäih ung a shinah kya khin ci. Ikyaseiciung, mikmi naw Khanpughi ah ng'yakhlü avan mi bik khai" ciah pyein ci. Cunung, Johan naw Bawipa ah pyein cu ngüm-ä ci. ¹⁶ Jesuh cu tuiphumnak a dou kawnah, tui kyong ungka a lut law ba vai awn, khankho k'shou ng'hmawng ne, Khanpughi ah Mümcha cu müm vai süah kyum law neta, a mät ah khan ah a gawk law cu hmuk ci. ¹⁷ Khankho ungka naw phi, "Shin cu ka hta khitui ah kyak ci. Ani cu ka m'hnii ci, "ciah k'aw ng'thang lawk ci.