¹ Herod ghangpughang naw a uk sang, Judea kho Bethlehem mango ung, Jesuh cu ng’tüi law ne, hnilaw lam ungka aisi-läk hmuhmat chang gui cu Jerusalem ah gawk law u neta, ² "Ng'Tüi lawk ciah Jew pakhui guiah ghangpughang cu a hawi ah ma? Ciah ng'shikca ci gui. Ng'hnilaw lam kho ah ani ah aisi hmu u neta, khawihnah vaiah kami lawk ci." ³ Cunah ng'thu a ng'yak law ung Herod ghangpughang cu kyikyawk ng'ä ng'ai lawk ci. Jerusalem mango chang gui avan phi ghangpughang awn atäng ah kyikyawk ng'ä ng'ai ci gui. ⁴ Cunung, ghangpughang naw taigü ng'vai gui la chang k'hli ungka Cacim hmat gui cu k'bum gui ne, Bawi Khrit cu a hawi ah a ng'tüi law vaiah mawng ng'shi gui ci. ⁵ "Ani cu Judah kho, Bethlehem mango ah ng'tüi lawk khai. Ikyaseiciung,

⁷ Cunkawnah, Herod ghangpughang naw aisi hmuhmat chang gui cu a düm ah khü gui ne, aisi a ng'dang law ah khin cu ng’shi gui ne, ⁸ "Hteit u ne ng’tüi lawk ciah akhmaw cu na mi hmuh vaiah shui vä. Nami hmuh ung kei phi hteit ne ka khawihnah tu vaiah na m'thein law tuba vä" ciah m'cäi gui ne, Bethlehem mango ah tüi gui ci. ⁹ Ngami cu ghangpughang ah pyein ng'ngai päng u ne, lut law ba u neta, hnilaw lam kho ungka lawk ciah aisi cu ami ma ah hteit seih, akhmaw hta a om nak ah hmun ung gawk ne ng'düm ci gui. ¹⁰ Cunah aisi ami hmuh law ung aknui ah yeikyai u ne, ¹¹ Imkyong ah ami va lut ung, anu Mary la akhmawhta cu hmuh u ne, m'khukhudawng u neta khawihnah ci gui. Ami law püi ah ami khawh m'küm gui phi k'hmawng u ne, ghui, frankincense la muran ciah a ng'uihnam letsawng gui cu akhmawhta awn ap ci gui. ¹² Cunkawnah, Herod ghangpughang ah kä a mi hteh ba vaiah, ami ng'mang ung Khanpughi naw m'hmuh m'dang gui seih, ami kho ah a lam hei awn hteit ba ci gui.

¹³ Ngami gui ami hteh ba kawnah, angtäi ghing Khanpughi ah khankhochang naw Joseph ah a ng'mang ung ng'dang law ba neta, "Ng'düi law ä. Akhmawhta la anu cu ng'khahpüi goi ne Egypt kho ah dawng neta, thap ne kä kaning pyein nak pha güt, acunah kho ah om vä. Ikyaseiciung, Herod ghangpughang naw akhmawhta cu shui ne ngon khai ah ng'bü ci, "ciah pyein ci. ¹⁴ Cunung, Joseph cu ng'düi law ne, a mü ge ah, akhmawhta la anu cu ng'khahpüi goi neta, Egypt kho ah hteit u ne, ¹⁵ Herod ghangpughang a shih khüt khai ah a cunah kho ah om ci gui. Shinah mawng cu, "Ka hta cu Egypt kho ungka ka khü ba ci, "ciah profet awn Angtäighing Khanpughi naw a pyein ah ng'thu a kümpäng vaiah hmawk ah kyak ci.

¹⁶ Cunkawnah, Herod cu aisi hmumat chang gui naw ami m'hlemhlak hmat law ne, aknui ah m'lungshe neta, ¹⁷ Aisi hmuhmat chang gui naw a kheng kheng ah shuiyap u ne ami täinkhe ah, kho hnüp hni-khin guiah atäng ah, Bethlehem mango la a pigo kyong gui ung om ciah khokum goi la kum goi kä be phak ciah htapami gui avan cu ngon sak gui ci. ¹⁹ Herod ghangpughang a shih kawnah, Angtäighing Khanpughi ah a khankhochang cu Egypt kho ung om ciah Joseph ah a ng'mang ung ng'dang law ne, ²⁰ "Tho law ä! Akhmawhta la anu cu ng'khahpüi goi ne Israel kho ah hteit ba vä. Ikyaseiciung, akhmawhta ngon hlük ci gui cu, shi püi ci gui" ciah pyein ci. ²¹ Cunung Joseph cu ng'düi law ne, akhmawhta la anu cu ng'khahpüi goi ne, Israel kho ah law ba ci gui. ²² Cunte, Archelaus cu a pa ah hnün ung ghangpughang ah kya ne, Judah kho a uk ah mawng ng'ya neta, cunah kho ah kä hteit dat ci. A ih-mang ung Kalilee kho ah a hteh vaiah m'hmuh m'dangnak gah ne, ²³ Nazareth gawnu ah hteit ne om ci gui. Shinah mawng cu, "Bawipa cu Nazareth chang ciah khü khai gui" ciah profet gui naw ami pyein ah ng'thu a kümpäng vaiah hmawk ah kyak ci.