¹ U Yesu akhalonga nabho kuvinholanyo akhati, ² "Ishina mwene isha kumwanya shikholine nu mwene we akhalinganya isiku limo ivwakulya ivwa weji uwa mwana wakwe. ³ Akhabha sontelezya abhabhombi bhakwe kubhilishila abhantu kubhilishila bhe amalanjiye kwinza kuseshela uweji, ilelo bhatakhinza kha. ⁴ Umwene akhasonteleza abhabhombi abhamwabho, ahati. "Bhabhuzye bhonti abhalanjilwa, Yenyi, inteleshile ivwakulya. Imbolile ing'ombe yani inhambaku impambali yeyinyanyatile inomile, vipiye ivwakulya vwonti, Nzagaji kuseshela na kushima pa weji." ⁵ Abhantu bhala bhatakha sajila we umwene ula abhalanjiye bhanu bhakhayagata muvwizi vwabho, bhamu bhakhabhala muwuchuruluzi. ⁶ Bhamu bhakhabhalema kubha supizya abhabhombi bha mwene bhakabhakhoma na kubhagoga. ⁷ Pe umwene akhavitwa. Akhasontelezya abharugu bhakwe, abhagoga bhala bhe bhagojile abha bhombi bhakwe na kupemba inhaya zyabho nu mwoto. ⁸ Iwinza akha akhabhabhuzya abhabhombi bhakwe kuti, "Uweji wufishile bhenalanjiye bhakhamile. ⁹ Ishi bhalaji mmadala amalenhana amapiti, mbalete abhantu abhinji bhonti bhe mwabhaga bhinzaje ku weji." ¹⁰ Abhabhombi bhakhabhala mwidala ipiti kubhalanjila abhantu bhonti bhe bhabhalola, abhinza na bhabhibhi. Inyumba yila iya weji bhakhizula abhajeni. ¹¹ Pe we umwene ayinjila kwenya abhajeni, akhamlola umuntu weka watakwatile umwenda uwapa weji! ¹² Umwene akhambhuzilizya kuti, 'Manyani, uyinzile bhulibhuli na kwinjila wutali nu mwenda uwa weji?' Umntu uyo atakhalonga nalimo. ¹³ Pe umwene akhabhabhuzya abhabhombi bhakwe, "Akhati mpinye umuntuyo mnyobhe ni vinama mmtaje kukhisi, kwe kulibha kulila na kusya amino. ¹⁴ Abhantu abhinji bhabhilishilwa ilelo bhebhitishililwe bhansi." ¹⁵ Pe abhananyaklata bhakha sogola kupangana vwe bhangamlema uYesu kumazyi gakwe wuyo. ¹⁶ Pe bhakhasontelezya abhamanyili bhabho peka na bha Maherode. Bhakhambhuzya uYesu bhakhati, "Mumanyizi, tumanyile kuti iwe wa muntu uwanalyoli, na kuti ukumanyinza izya Mulungu nalyoli. Utakusajila injele zya bhantu abhanji uta kwenya pamiso umuntu. ¹⁷ Ishi tubhuzye, ukusibha akhoni? Ishi khinza kufumwa insonho indajizyo kwa Kaisali ewe kha?" ¹⁸ U Yesu akhamanya uwubhibhi wabho akhati, "Khoni khe mhundinga mbhilenga imwe? ¹⁹ Ndanje inhela iyo yemkufumwaa insonho." Bhakhamletela idinari. ²⁰ U Yesu akhabhabhuzilizya akhati, "Ishifwani ishi nitawa vwananu?" ²¹ Bhakhamwamula bhakhati, "Vwa Kaisari." U Yesu akhabhabhuzya kuti, "Mmpanje uKaisari ivintu vwe vwakwe ivwa Mulungu mpanje Umlungu." ²² We bhivwa shinisho bhakhaswiga. Bhakhasogola bhakapala. ²³ Isiku ilyo bhamu aha Sadukayo bhakhinza kwa Yesu, bhala bhebhakuti kuzukha na kumo bhebhafuye. Bhakhambhuzilizya, ²⁴ bhakhati, "Mmanyizyi, uMusa akhati, Anga umntu we atapapile umwana, unholo wakwe ampwanilaje umshi anga ampe umwana kunongwa ya wamwabho wa khafwa. ²⁵ Kwamile abhamwabho saba. Uwakwanda wayega akhafwa we atapapile umwana. Akhamleshela uwa mwabho. ²⁶ Uwa mwabho uwa wubhili wope akhafwa wope akhabhomba shinisho, wope ula uwa utatu shinisho paka kufikha uwa saba. ²⁷ Wezyabha shinisho bhonti, wope umwantanda ula akhafwa. ²⁸ Isiku ilya mwisho we bhazukha umwanda ula alibha mshiwa nanu kubhana muntu bhala saba? Kunongwa bhonti bhampwaniye." ²⁹ Ilelo uYesu akhabhamla nakubhabhuzya kuti,"Mkupubha, kunongwa mtamanyile amasimbo ewe abhakha ga Mulungu. ³⁰ Kubhebha zushile, kutali po kwega awe kwejewa. Yoli abhantu bhakubha ngati bha bhakhabhizya kumwanya. ³¹ Ilelo akhapango akhakuzukha abhafwa, mtabhazizye nalumo gala ge Umulungu alonjile kukwinyu, kuti, ³² Ine na Mulungu uwa Abrahamu, Umulungu uwa Isaka, nuwa Yyakobo? Umulungu te wabhafe, yoli wu Mulungu uwabha puma." ³³ Palubhungano we bhivwa bhakhaswiga imanyizyo zyakwe. ³⁴ Ibhene Abhamanyaklata we bhivwa kuti uYesu abhakhanile abha Sadukayo, bhakhabhungana bhibho ibhene peka. ³⁵ Weka mkasi yabho, uwi ndajizyo, akhambhuzilizya kwa kumliga. ³⁶ "Akhati, mumanyizyi, ndajizyo yilikwi ye mpiti kushila zyonti indajizyo?" ³⁷ U Yesu akhati, "Ikwanziwa umugane Umlungu kumwoyo wakho wonti, uwupuma wakho wonti, na kunjele zyakho zyonti. ³⁸ Ini ye ndajizyo mpiti iwinza ya kwanda. ³⁹ Yope iya wubhili yinholine na yiniyo- Ikwanziwa kumgana umupalamani wakho inza vwukuyigana wunewe. ⁴⁰ Indajizyo zyonti nabhakuwi bhakwenya indajizyo zinizi zibhili." ⁴¹ Abhamanyaklata we bhabhungamile peka, uYesu akhabhabhuzilizya imbuzilizyo. ⁴² Akhata, "Mkukwina akhoni kunongwa ya Kristi? Iwene Mwana wa nanu?" Bhakhati, "Mwana wa Daudi." ⁴³ U Yesu akhabhamula akhati, "Pe honi zilibhulibhuli uDaudi mwa Mpepu akuti Mwene, akuti, ⁴⁴ 'Umwene akhambhuzya Umwene wani, "Uyikhe kunyobhe yani iya kundilo, pakla pe inhayibhabhunha abhalugu bhakho bhabhe pasi pavinama vwakho."'?" ⁴⁵ Anga uDaudi akumbhilishila uKristi akuti "Mwene," zikubha bhuli bhuli akubha mwana wakwe?" ⁴⁶ Numo atakhalinga kumwamla izwi angalyeka winza, ningawekawe akhambhuzilizya imbuzilizyo kufuma isiku ilya na kujendelela.