¹ Insiku sita wezyashila uYesu akhabhega peka uPeteli, nu Yakobu nu Yokhani ukhambaku wakwe, bhakhabhala pamwanya mwigamba itali bhibho ibhene. ² Akhachija pilongolela she bhakumwenya. Kumiso akhalama kubhingamila ngati lizubha, amendagakwe gakhaba mazelu ngati rukhozyo. ³ Kwenya, pala bhakafumila uMusa nu Eliya bhakulonga inawo. ⁴ U Peteli akhambhuzya uYesu kuti, "Mwene, nhinza kuti nitwe tubhe panapa. Anga wayigana, intizenje ivwegwi vitatu isha Musa nisha Eliya." ⁵ Pe wakulonga, likhalolekha ibhingo izeru likhaleta akhanzundila, pe likhafuma izwi kufuma mwibhingo, likhati, "Unu Mwanawani unkundwa we anhondeye mmwivwaje iwene." ⁶ Abhalandati we bhivwa shinisho, bhakhagha hakukupama bhakhogopa khani. ⁷ U Yesu akhniza akhabha palamasya akhati, "Bhushi mtogopaje khani." ⁸ Bhope we bhadamkha bhatakhamlola umntu yoli uYesu imwene. ⁹ Pe we bhakwinha mwigamba, uYesu akhabhalajizya, kuti, "Mtakhafumwe impembu kuzyezya bhaloleshela paka pe Umwana Mntu alizyukha kufuma kubhafwe." ¹⁰ Abhalandati bhakwe bhakha mbhuzilizya, bhakhati, "Khoni abhasimbi bhakuti uEliya ikutu ayinze isuti? ¹¹ U Yesu akhabhamla kuti, "uEliya atiyinze yoli atigarusye imbombo yonti. ¹² Ilelo inkubhabhuzya imwe, kuti uEliya akhinza, ilelo bhatakha mmanya. Pe bhakhambhombela zyebhayigana ibhene. Nashinisho vwezili Umwana Mntu vwete bhamyinvwe mnyobhe zyebho." ¹³ Abhalandati pe bhakhazyaganya kuti alonjelaga mpembuzya Yohani Umwozyi. ¹⁴ We bhafikha pambuga ya bhantu, umntu weka akhambhalila, akhasugamila pilongole nakumbhuzya kuti, ¹⁵ "Mwene, umutuyile umwana wani, ali ni shizilisi khabhili akuyimba inhani pamu akugwa akhinji mmwoto na mminzi. ¹⁶ Namletile kubhalandati bhakho, bhakhapotwa kumponya. ¹⁷ U Yesu akhaloga akhati, "Imwe mpapo ini ye yita nu lwitinho inanjisu, inyibhe nimwe paka lino? Inti jimbilile nimwe paka lino? Mlete ipa papani." ¹⁸ U Yesu akhakhalalila, ipepu linhepa. Ukijana akhapoona papala. ¹⁹ Abhalandati bhakha mwinzila uYesu ku kwilu kumbhuzya kuti, "Khoni khe twapotiwe kwefwa?" ²⁰ U Yesu akhati, "Kunongwa ya lwitinho lwinyu lunsi. Lyoli inkubhahuzya, kuti anga mwabhanga pope nu lwitinha ulunsi inza akhasanga khimbeyu ya wulezi, mngalibhuzya igamba ili, sama kufuma ipa ubhale kula lyope linga sama patasyale na khamu inhakudalinhana kukwinyu. ²¹ (Rema: Amazwi iga mstali 21 "Ilelo ishikholo ishi mapepu ikusitinhana kwepa, yoli imputo na kuyima" gatakulolesya anhinza kha kufuma kuwusimbe uwinza uwa kuwandilo). ²² Akhabhalilo we bhashili bhali ku Galilaya, uYesu akhabhabhuzya Abhalandati bhakwe kuti, "Umwana wa Adamu atilemwe mnyobhe zya bhantu. ²³ Te bhamgoje, isiku ilya wu tatu atazyushe." Abhalandati bhaka syumilila nifwa. ²⁴ Bhope we bhafikha ku Kapelenaumu, abhantu bhe bhakubhunganya insonho inusu lupiya bhakha bhala kwa Peteli kuti, "Ishi ummanyizyi winyu akufumwa insonho inusu rupiya?" ²⁵ Akhati, "Ena" Ilelo uPeteli wayinjila mkasi mnyumba, uYesu akhalonga nu Peteli kwanda kuti, "Ukusibhilila nhoni Simoni? Abhamwene bha mnsi, bhakuposhela insonho ewe uwushulu kufuma kwa nanu? Kubhala bhebhakubhalongozya amwe kubhajeni? ²⁶ Pe wu Peteli alonga ati, "Kufuma kubhajeni" uYesu akhambhuzya kuti, isho ikuti bhebhakutabhaliwa bhepe kubhe bhakufumwa. ²⁷ Ilelo tutakhabhombe shinisho abha soshezya nsonho bhatakhabhombe imbibhi, bhalaga kusumbi, usumbe ulu sikulo, uyeje inswi yila iya kwanda. Wewagubula ilomu lyakwe, utuyajemla inhela yeka uyeje ubhape bhebhakusonshezya insokho iyani ni yakho.