¹ Pe Abhamanyakrata na bhasimbi akhinza kwa Yesu kufuma ku Yerusalemu. Kulonga, ² "Khoni abhalandati khe bhakunanganya aminho gabhazekhe abhimandi? Pe bhatakugeza munyobhe zyabho we bhakulya ishakulya." ³ U Yesu akhabhamula akhabhabhuzya kuti, "Wunanu__khoni khe mkunanganya indajizyo zya mwene kunongwa yinyinho zyinyu? ⁴ Umulungu akhati, 'Umtinishe uyise wakho nu nyina wakho; unu weakulonga imbibhi kwa yise wakwe na kwanyina wakwe, ikuti lyoli akufwa.' ⁵ Ilelo imwe mkuti, 'Wonti wakumbhuzya uyise wakwe nu nyina wakwe, '"Ivintu vwe ungapata kufuma ku kwani shinishi vikufuma kwa Mlungu,'" ⁶ "Umuntu unu kutali inongwa kumshindikha uyise wakwe. Kushinisho mkunanganya izwi lya Mulungu kunongwa ya minho ginyu. ⁷ Imwe mwabhilenga, khinza uYisaya pa khakuwa kulimwe akhati, ⁸ 'Abhantu ibha bhakuntinikha kumalomu gabho, ilelo amoyo gabho gali ukutali nine. ⁹ Bhakumputa ilenga, kunongwa bhakumanyizya imanyizyo izyindajizyo zya bhantu."" ¹⁰ Akhabhunganikha ulubhungano na kubhabhuzya," Tejelevwi na kumanya__ ¹¹ Nashimo ishintu sheshikwinjila mwilomu lya muntu kumbhikha mtula nongwa. Yoli, sheshikufuma mwilomu, isho sheshikuti umuntu ananjishe." ¹² Abhalandati bhakha kwa Yesu kuti, "Ishi!, Umanyile Abhamanyaklata webhivwa izwi lila inze bhavitwaa?" ¹³ U Yesu akhabhamula nakubhuzya kuti, "Ikwi lolonti lye uTata wani uwakumwanya atawalile likwipwa. ¹⁴ Bhaleshe ibhene, bhalongozi abha mpubhila. Anga umntu wumpubhila angamlongozya umpubhila uwa mwabho, peka bhonti bhabhili bhakulendela mlyina." ¹⁵ U Petro akhamla nakumbhuzya uYesu," Tumanyizye ishimanyilo ishi kulitwe, ¹⁶ U Yesu akhamwamla kuti, "Nimwe mshili kumanya? ¹⁷ Imwe mtakulola kuti sheshi kuliwa kwilomu shikushila mulwanda na kubhala kwisalani(choo)? ¹⁸ Ilelo ivintu vwonti vwevikufuma mwilomu vikufuma mkasi mmwoyo. Vwevintu vikumnanganya umuntu. ¹⁹ Pe mmwoyo zikufuma insibho imbibhi, uwugoji, uwubhembu, uwumalaya, uwibha, uwuketi uwilenga ni ndigo. ²⁰ Iga yoli gegakumbhinha uwubhibhi umntu. Ilelo kulya wutagezile mnyobhe umntu patangobha ni mbibhi kha." ²¹ U Yesu akhasogola pala akhabhala kumbali iya kunhaya izya Tiro na Sidoni. ²² Akhinza umwantanda Umkanani kufuma mnsi zinizyo. Akha dandizya kulonga akhati, "Ntuyile, Mwene, Mwana wa Daudi; umwana wani umlindu akuyimba nifwa ni mipepu." ²³ Ilelo uYesu atakhamwamula nalimo. Abhalandati bhakwe bhakhinza, bhakha mlabha, bhakhati, "Mwefwe ayepe, akutukhomela ishongo." ²⁴ U Yesu akhati, Intasonteleziwe kwa mntu ninga weka yoli kungole zyezitejile izyi nyumba ya Israeli." ²⁵ Pe akhinza akha gunzama pilongolela papakwe nakuti, "Mwene navwe." ²⁶ Aha mwamla kuti, "Tekhniza kwega ishakulya sha bhana nakuzipa imbwa," ²⁷ Akhalonga akhati, "Lyoli, Mwene, nashinisho imbwa inyinsi zikulya sheshulenda pameza mwa Mwene wabho." ²⁸ U Yesu akhamwamla akhati "Mwantanda, ulwitinha lwakho lupiti. Zibhombeshe kukwanho anza kwanza." Umwana wakwe akhapona akhabhalilo kha nakho. ²⁹ U Yesu akhepa pala akhabhala kupipi nu sumbi uwa Galilaya. Iwinza pe akhabhala mwigamba akhikhala kunukwo. ³⁰ Impuga impiti yikhinza kukwakwe. Na kumletela abhadendelukha, abhampubhila, abhashinunu na bhebhalemaye abhinji bhonti, na bhebhali bhabhinu, bhabhabhishile pa vinama pa Yesu akhabhaponya. ³¹ Impuga bhakhaswiga we bhalola abhashi nunu bhakulonga, na bhavilema bhakubha bhinza, abhadendeluka bhakujenda, nabhampubhila bhakwenya. Bhakhampala Umulungu uwa Israeli. ³² U Yesu akhabhabhilishila abhalandati bhakwe nakubhabhuzya kuti, "Nabhalolela uwila impuga, kunongwa bhali peka nine kunsiku zitatu bhataliye na khamu. Te indagene nabho kuti bhasogole kukwabhu we bhataliye, bhatanhazilishe mwidala." ³³ Abhalandati bhakwe bhakhalonga bhakhati, "Kwoshi kwatunga gaga amakati gegangakwila pashilozu ipa ge bhikute impuga impiti ini?" ³⁴ U Yesu akhati, "Mli na makati galinga?" Bhakhati amakati, "Saba, niswi inyinsi zyatibhulo." ³⁵ U Yesu akhati impuga yikhale pasi. ³⁶ Akhega amakati gala saba niswi, wayega akhasalifwa, akhamensulanya nakubhapa abhalandati. Bhope abhalandati bhakhabhapa abhantu impuga. ³⁷ Abhantu bhonti bhakhalya na kukwilana bhakhabhunganya vwevwasyatola ivwakulya insenyenha nsenyenha vinhizula ivitundu saba. ³⁸ Bhala bhe bhaliye bhamile abha sakhala elfu zini bila bhana. ³⁹ Pe uYesu akhalaga impuga kuti bhasogolage anga akhinjila mnsitima kubhala ku Magadani.