¹ U Yesu akhabhabhilishila abhalandati bhake peka na kubhapa amakha kumpepu imbibhi, kwumana na kubhinga nakusatula intamwo zyonti nu wubhinu wonti. ² Amatawa ga bhasundikwa ishumi na bhabhili gagiga ilyakwanda wu simoni (we wakuti uPeteli), uAndreya ukhambaku wa Yakobo abhana wa Zebedayo, nu Yohani umkulu wakwe: ³ U Filipo, nu Bartelemayo, uTomasi nu Matayi umsonshezya nsonho, Yakobo umwana wa Alfayo, nu Tadeyo, ⁴ U Simoni umukananayo, nu Yuda Iskariote, umwufi. ⁵ Ibha ishumi na bhabhili uYesu akhabhasontelezya. Ahabhalajizya akhati "Mtakhabhale kwe bhakwinhala abhapanzi iwinza mtakhinjile mnhaya ya bhasamalia. ⁶ Yoli, mubhale ku ngolee zye zitejile izya mnyumba iya Israeli. ⁷ We mkubhala, rumbililaji na kuti, uwu mwene wa kumwanya wupalamiye.' ⁸ Mbhaponyaje abha bhinu, zusyaji abhafwe, satulaji ibha maketa na kubhinga amapepu. Mpewiwe pabhulo, nimwe yefwaji pabhulo. ⁹ Mtakheje impiwe, almasi ewe ishabha mnyambi zyinyu. ¹⁰ Utakheje imbugulu we mkushula, ewe amenda aga mwabho, ivilyatu ewe indisa, ikwanziwa umbhomba mbombo abhe ni shakulya shakwe. ¹¹ Inhaya yoyonti ewe shijiji mwinjila, yanzaji pe panhondeye pategnanile mwinhale ipo paka pemlisogolaga. ¹² We mwinjila mu nyumba mbhalamnhaje abhakhaya, ¹³ inga inyumba yinhondeye, yinhalaji umwo na kusaya yoli inga itanhondeye, uwinhalo winyu wubhalaje peka nimwe. ^{14 15} Na kubhala bhebhatakubhaposhela imwe na kubhatajelezya inongwa zyinyu, wemkusogola mnyumba zyabho ewe mnhaya izyo, kunyuntaji amasuto mnyayo zyinyu panapo. Yoli inkubhabhuzya, ingabha kwashi inhani mnhaya iya Sodomu na Mgomola isiku lya kulonga kuliko inhaya iyo. ¹⁶ Yenyaji, inkubha sontelezya ngati ngolee ku mbwa ikhali ikuti mbhanje ni njele inzinjokha na mubhe mwabha tonsu inzi inkunda. ¹⁷ Mubhe amiso na bhantu, bhakhayibhatwala mmabalaza, na kubhakhoma mmakanisa(mvibhanza). ¹⁸ Nakubhaleta pilongolela pa bhasongo na bhamwene kunongwa yani, kuti vwezili kukwabho na kubhapagani. ¹⁹ We bhakubhandila ilenga pawulonji mtanhatuye kuti mngalonga bhuli, igakulonga atibhape wuyo kukhabhalilo khanakho. ²⁰ Te mwemwe mwemngalonga, yoli Umpepu wa Tata winyu wangalonga mkasi mumwinyu. ²¹ Abhana muntu ukulu nu mnang'ana bhanha yanda kulwa na kugogana khabhili uyise nu mwana wakwe. ²² Abhana kulwa na bhayise abhapafi, na kubhagoga. Nimwe mkhayivitiwa na bhantu bhonti kunongwa yitawa lyani. Yoli wakhayijimbilila paka pamwisho umntu uyo akhayipona. ²³ Akhabhalilo ikha kubhaynivwa inhaya ini, mkhashimbililaje inhaya yikulandata, yoliyoli inkubhabhuzya, kuti temkhamale inhaya yonti iya Israeli we ashili umwana wa Adamu atagalushile. ²⁴ Umumanyili te mpiti kumshila ummanyizyi wakwe, khabhili umbhombi atanga mshila Umwene wakwe. ²⁵ Ikwanziwa ummanyili abhe ngati mmanyizyi wakwe, iwinza umbhombi ngati wu Mwene wakwe. Inga mkuti Umwene wi nyumba wu Belzabuli, pe zingabha bhuli inhani webhakuliga ibha mnyumba yakwe! ²⁶ Ishilelo mtabhatuyaje ibhene, ilelo imbombo zyonti zililolekha apazelu, zitalipo na zima zyezinga fisikha kuti zitaloleshe. ²⁷ Gala ginkubhabhuzya kunhisi, mlongaje pauzelu, iwinza gemkugivwa tii mmkutwi ginyu mdandizyaje mmwanya mnyumba zyinyu. ²⁸ Mtabhogopaje bhala bhebhakugoga umbhili yoli bhatakuwezya kugoga uwumi(umwoyo). Yoli mmwogopaje ula wanga wezya kugoga kutezya umbhili nu mwoyo kutwala kuwuifwe kwilongo. ²⁹ Ishi abhana msonkwi bhabhili bhatakukazya kutukobheli? Nisho vwezili numo wangatega pasi na kuti Utata witu amanye. ³⁰ Umanye kuti insisi zyitu zyope azibhazizye. ³¹ Mtatuyaje, imwe mwabhishuma kushila abha na msonkwi abhinji. ³² Umuntu wowonti wakunitikha pilongolela pabhantu, nine ikhayimwitikha pilongolela pa Tata wani wali kumwanya. ³³ Anga wakunhana pilongolela pa bhantu, nine inhayimkhana pilongolela pa Tata wani uwa kumwanya. ³⁴ Mtasibhaje kuti ininzile kuleta uwinhalo munsi. Intinzile kuleta ulwivwano, yoli insengo. ³⁵ Pe inhinza kumpa umntu amakha iga kulwa nu yise wakwe, imlindu nu nyina wakwe utayi vwala, nu mayi vwala wakwe. ³⁶ Umwufiwa wa muntu bhabhala ibha mnyumba mumwakwe. ³⁷ Unu wakumgana uyise ewe unyina kushila ine uyo atanhondeye. Nawe akugana umwana umsanhala awe umlindu kushila ine uyo atakhondeye khaala awe umlindu kushila ine uyo atakhondeye kha. ³⁸ Umuntu we atangapimba ishi nhobhenhanyo nakundandata atanhondeye kha. ³⁹ Wakwanza kwikha akutezya. Yoli iwene wakutezya uwinhalo kunongwa yani akhayiposhela. ⁴⁰ Unu we akubhaposhela amposheleye nene, wope we akumposhela ine amposheleye wansontelezizye ine. ⁴¹ Umntu wangamposhela umkuwi wope wakumposhela uwanalyoli kunongwa ya muntu uwanalyoli anhayiposhela ishikunjilwa isha mntu uwanalyoli. ⁴² Wowonti wangampa weka kubhansi ibha, pope ulupindi ulwa minzi igakumwela amakhatazu, kunongwa pe mlandati, yoli inkubhabhuzya, kuti uyo kwidala lyolyonti akuposhela ulusayo."