¹ Obwami bwomuikulu bwahabe nga bahana abasilili lihumi ababukula chitaya chiabwe nibachia obukanana nende omwene siserero. ² Abahana baranu bari basiru ne baranu bari bakesi. ³ Abahana abasilili baranu basiru babukula chitaya nibareha mafura. ⁴ Ne abahana bakesi babukula chitaya alala nende chichupa chiamafura. ⁵ Omwene siserero yacheleba. Abahana baajong'a mani baakona chindolo.

⁶ Nibiola saa chisasaba, omwene siserero yola, bachie bamubukanire. ⁷ Abahana basilili abo bosi basumuha mani babukula chitaya.

⁸ Abasiru babolera abakesi bari 'Muruberesieho mafura, chitaya chiefu chiriambi osima' ⁹ Abakesi bakalusia bari 'Amafura ka hurinako namadidi, sikayera, muchie hubandu bakusiangia mukule keng'u. ¹⁰ Ngabachia okula mafura, omwene siserero yecha ne bosi abariao bengira naye musiserero mani omuriango nikwikalwa

¹¹ Ngabakaluha, babola bari 'Omuhulundu, ikulao muliango hwingire.’ ¹² Yabakalusia nabola ari 'Adieri mbabolera, mbakorirwe.'

¹³ Huako mutang'e, hubera simumanyire inyanga kata siha.

¹⁴ Bifwana nga omundu yariambi ochia musialo sindi. Yalanga basumba baye nabarehera miandu kiaye. ¹⁵ Mulala yaberesia chitalanta chiranu, oundi aberesia chibiri noundi aberesia italanta ndala. Buri mulala yanyola hulondohana nende obunyalo bwaye. Omundu Oyo yarulao nachia lukendo lwaye, ¹⁶ Owanyola chitalanta chiranu yachia yahola nachio inganga nanyola buhala chitalanta chindi chiranu ¹⁷ Mungira nga eyo, owanyola chitalanta chibiri yanyola chindi chibiri. ¹⁸ Ne omusumba owanyola italanta ndala uria, yachia yayaba erina muloba mani yakisamo italanta yomuhongo waye.

¹⁹ Imberi wesiha Siri ambi omuhongo oyo yakaluha mani yachaka obala alala nabo. ²⁰ Owanyola chitalanta chiranu yarera chindi chiranu. Yabola ari 'Omuhulundu, wandesika mani wamberesia chitalalanta chiranu, ne olola, nyolire chindi chiranu.'

²¹ Omuhulundu waye yamubolera ari 'Oholire bilayi, ori musumba mulayi handi omwesikwa. Ndahuba omwemeresi humiandu mingi. Ndimusangafu nawe.'

²² Omusumba owanyola chitalanta chibiri yecha yabola ari 'Omuhulundu wamberesia chitalanta chibiri. Olola, nyolire chindi chibiri.'

²³ Omuhulundu yabola ari 'Oholire bilayi, orimusumba mulayi handi omwesikwa. Omalire huba mwesikwa hubindu bididi. Ndahuba obwemeresi hubindu bihongo. Sangalire nawe.

²⁴ Ne omusumba owanyola italanta ndala yecha yabola ari 'Omuhulundu, manyire endi ori mundu mudinyu muno. Okesanga abundu woraraka ²⁵ Ndari noburi mani ndachia ndayabira italanta yao muloba. Olola, ngino hurerere.

²⁶ Omuhulundu waye yamukalusia nabola ari 'Ewe omusumba omukora handi omukara, wamanya ori esie ngesanga andararakire handi andaaranyire. ²⁷ Huako wahabihire amapesa kange mubangi bianingaluha ndahanyolire kange alala nobuhala ²⁸ Bukula italanta hurula huoyo oberesie uria ori nende chitalanta rihumi. ²⁹ Omundu ori neebingi yahamedwe handi yahabe neebingi. Ne ouma sindu, atasa sididi syarinasio yahang'ulwe. ³⁰ Mubukule omusumba ouma buhala Oyo mumufube rwanyi musiirima, abundu ari mariro nende osia meno.'

³¹ Omwana womundu niyaheche noluyari lwaye malaika bosi nibari alala naye, narulao yehala husisala sioluyari. ³² Imberi waye ebyalo biosi biahebusie, handi yahakabule mulala hurula huundi koringa omwayi akabulanga makondi ne chimbusi. ³³ Yare makondi omuhono kwaye mulungi ne chimbusi muhono kwaye mukada.

³⁴ Omwami yabolere abari muhono mulungi ari 'Mwiche eng'we abari nechihabi hurula hu Baba, mubukule obwami bwa mwarekeherwa hurula sialo nisichaka. ³⁵ Ndaar injala ne mwamberesia biohulia; Ndari nobuluo ne mwamberesia esiohung'wa. Ndari mukeni ne mwanyingisia. ³⁶ Ndari siekenye ne mwafwala chingubo; Ndari omulwaye ne mwandera. Ndari mujela ne mwecha mwandola.'

³⁷ Abalafu bahakalusie nibabola bari 'Omwami, hwahulola rina nori injala mani hwahulisia? Ata nori nobuluo mani hwahuberesia esiohung'wa? ³⁸ Hwahulola riina nori mukeni mani hwahwingisia? Ata nori siekenye mani hwahufwala chingubo? ³⁹ Hwahulola rina nolwala ata nori mujela mani hwecha ohulola?

⁴⁰ Omwami yabakalusie nabola ari 'Mbabolera adieri, ebia mwaholera mulala hubamuganda bange bano, mwaholera esie omwene.

⁴¹ Yaruleo nabolera abari mohono kwaye mukada ari 'Munduleho, eng'we abakwong'wa mumuliro kurasima okwarekeherwa saitani nende malaika baye, ⁴² Hubera ndaar i injala ne simwamberesia ebiohulia; Ndari nobuluo ne simwamberesia esiohung'wa; ⁴³ Ndari mukeni ne simwanyingisia; Ndari siekenye ne simwafwala chingubo; Ndari omulwaye handi mujela ne simwandera

⁴⁴ Ne bosi bahakalusie Nibabola bari 'Obmwami, Hwahulola rina norinjala ata nori nobuluo ata norimukeni ata nori siekenye ata nolwala ata nori mujela? mani hwahaya huhurumihira.

⁴⁵ Yaruleo nabakalisia nabola ari' Mbabolera adieri, ebia mwahaya oholera mulala hubadidi bano, mwahaya huholera esie omwene.'

⁴⁶ Bano bachie musinyasio ne abalafu bachie mubulamu burabwa.