¹ Yesu yarula mukanisa nachia chingendo chiaye. Abeki baye bamwichaho humwekesia chinyumba chieikanisa. ² Naye yabakalusia nabola ari "Simulola bindu bino biosi? Mbabolera bwadieri, abulao rikina ata rilala eriahadong'e hurindi erirahafubwe asi."

³ Ngayari niyehale hulugulu lwa Olivia, abeki baye bamwichira mubwekisi nibabola bari "Rwekesie, ebindu bino biahehole rina? Hwamanyire husina ohwicha hwao nende esiakamo siolwibulo?"

⁴ Yesu yabakalusia nabola ari "Mutang'e, omundu arabakosia. ⁵ Abangi baheche murira riange. Babole bari " Nesie Kristo,' handi baakosie bandu bangi ⁶ Munaurira chingano chieliye. Ne mureparira muno hubera bindu bino paka binehola; ne esiakamo sisiri are. ⁷ Esialo sialwane nende sialo, ne obwami bwahalwane nende obwami. Injala yabeo handi esialo siarengerehe chimbali chinyingi. ⁸ Ne ebindu bino biahebule buchuni.

⁹ Banabarerera minyahano handi baabere. Ebialo binabasiula hulwerira riange. ¹⁰ Abangi banegumula handi banasiulana bene hubene. ¹¹ Abanabii bobubeyi banarumbuha handi banakosia bandu bangi. ¹² Ohuralonda malako hunemeda handi obuheri bunaduduya hubandu bangi. ¹³ Ne onesimirisia hula siakamo yahaonisibwe. ¹⁴ Echimbosi chindayi chiobwami bwa Nyasaye chinayalwa musialo kori buloli mubialo biosi. Ne esiakamo sinecha.

¹⁵ Huako, nimulola binyasio nende obwari obwanabii Daniel yalomalomaho niyemire abundu atakatifu." ¹⁶ "Abari muyudea beruhe bachie muchingulu. ¹⁷ Ori husirama siei yumba areeha asi hubukula sindu siosiosi hurula munyumba yaye. ¹⁸ Handi ori mundalo arafunya obukula likabuti riaye. ¹⁹ Ole hubahaye bali chinda nende abanunia bana muchindalo acho! ²⁰ Mulaame mbwe chimbiro chieng'u chiraba muchinyanga chie imboo kata inyanga yasabato. ²¹ Yabeo isando ihongo eirabahoo hurula esialo nisichaka, ohula rero, handi siyabeo. ²² Chindalo echo nichiraduduya, aumao omundu wahaonisibwe. Ne huabo abayierirwe chindalo echo chiaduduye.

²³ Ne omundu nababolera ari 'Lola, uno nieKristo!' kata ari 'uria nieKristo murakanya. ²⁴ Hubera Kristo bobubeyi nende banabii barumbuhe handi bahole bihole biohuukia hubabakosie, nibinyalihana ata abayierwa. ²⁵ Mulola, Esie mbao mbabolere nibisiiri. ²⁶ Huako nibababolera bari 'Lola, ari musichimi,' murarula mwachia musichimi. Ata bari 'Lola, ari musigoro, murakanya. ²⁷ Kori ngerikulu rimiehanga (east) nirihosia paka bukwe, Ohwicha hwomwana womundu hwabe hurio. ²⁸ Buri abundu ari sisolo sifwire, amayoni kanebusiao.

²⁹ Eminyahano kiechindalo echio, eriuba riaherime, omwosi kwosi sikuriaha ching'ining'ini chialakahe hurula muikulu he amani komwikulu kaheyienge. ³⁰ Esifanani siomwana womundu sialolohe mumareesi, handi chikabila chiosi musialo chiarire. Baalole omwana womundu niyecha humaresi namani noluyali. ³¹ Yarume malaika baye nende chiturumbeta handi bahabusie abayierwa baye hurula mumiyaka kine, hulundulo indi hula huindi.

³² Munyole mekesio hurula humudodo. Erisaga niridoradora mani rialakasia masafu nomanya ori siminyu siri ambi. ³³ Nimulola bindu bino biosi nibiehola, mumanye muri ariambi, ambi nesiribwa. ³⁴ Adieri mbabolera, olwibulo luno silunabira bindu bino biosi nibisiri hwehola. ³⁵ Elikulu nesialo binabira, ne chimbosi chiange sichinabira.

³⁶ Ne ohulondohana nende esiha siene abulao omanyire, kata malaika bomuikulu, kata musiani, omalaho Baba. ³⁷ Ohwicha hwomwana womundu hwabesa kori nga biari muchindalo chia Noa. ³⁸ Hubera muchindalo echo ifula nirachaka bandu bari balia, bang'wa, bakekana paka hula nga Noa yengira mumeli, ³⁹ Handi sibamanya sindu siosiosi ohula ngamachi kechula mani kababukula bosi - ohwicha hwomwana womundu hwabe hurio. ⁴⁰ Abandu babiri babe mundalo - mulala yabukulwe noundi yahadong'e. ⁴¹ Abahasi babiri babe basia hulukina - mulala yabukulwe ne mulala yahadoong'e. ⁴² Huako mube batang'u, hubera simumanyire inyanga yomwami weng'u yaheeche. ⁴³ Ne mumanye mbwe omuhulundu weinyumba nanyala omanya siha siomwibi yecheramo, anyala hwerekeha handi siyahakanyira mwibi hufunaka nohwingira munyumba. ⁴⁴ Huako, paka mwosi mwerekehe, hubera omwana womundu yaheche siha siamukorirwe.

⁴⁵ "Haro omusumba sina mwesike handi omukesi womwami waye yamura munyumba ahwanie biohulia mubiha bienyebwa? ⁴⁶ Nomusumba wemikisa womwami waye yahakane nahola ario niyola mungo. ⁴⁷ Adieri mbabolera mbwe omwami oyo anamura akulu wemiandu kiaye kiosi. ⁴⁸ Ne omusumba mubi nabola mumwoyo kwaye ari 'omwami achelebe,' ⁴⁹ Nachaka ohuya basumba basie, nalia handi ang'wa nabamesi, ⁵⁰ nomwami waye arulao yecha indalo yomusumba oyo akorirwe musiha siaramanyire. ⁵¹ Omwami waye anamurema bimeka handi amure alala nabandu bohwekadia, abundu ari maliro nende ohusia meno.