¹ Yesu yalomaloma nabo handi muchingado nabola, ² ari "Obwami bwomuikulu buri kori nga omwami undi owaholera omusiani waye omwimo kwesiserero. ³ Yaruma abahosi baye osolosia abandu lakini abandu bahaya hwicha. ⁴ Owami Oyo yaruma abahosi bandi nababolera ari 'mubeekesie muri ndeehire biahulia bingi. Hubakire chingombe chinulu, beche humwimo kwesiserero." ⁵ Sibarekeresia, mulala yachia mundalo yaye noundi hubuhala bwaye. ⁶ Abandi badira abahosi, babasandia handi babeera. ⁷ Eririma riamba omwami mani naruma basikari baye bera abandu abo handi basamba itauni yabwe. ⁸ Yarulao nabolera abahosi baye ari omwimo kwesiserero kuchakire ne abandu basolosebwe sibahoya. ⁹ Haro, muchie hundara mulange abandu bangi beeche. ¹⁰ Abahosi bachia hundara mani babusia bandu boosi babanyola hundara, ababi nabalayi. Esibanja siechula nabakeni. ¹¹ Ne omwami niyecha olingala bakeni, yalola omundu undi orafwala chingubo chiarusi. ¹² Omwami yamureba ari "omwicha, wichire muno orie nouma chingubo chia arusi? omundu oyo yaurera sa. ¹³ Omwami yabolera abahosi ari 'Muboye muyia uno mahono namakulu, mumufube rwanyi musirima, abundu ari maliro nende husia meno. ¹⁴ Hubera abandu bangi balangwa ne abadidi niebayierwa.

¹⁵ Abafarisayo bachia bapanga ngabanyala oreka Yesu nechimbosi chiaye omwene. ¹⁶ Baruma abeki babwe alala nende abaherodia. Babolera Yesu bari "Omwekesia, humanyire huri oriwadieri handi wekesiangia chingira chia Nyasaye mubwadieri. Sodebanga maparo kabandu handi sofunyiranga mundu. ¹⁷ Haro rwekesie, oparorie, biri mumalako mbwe hurunge Kaisari obusuri kose haba?

¹⁸ Ne Yesu yamanya obukora bwabu nabola ari "Husina nimundeema, eng'we abohwekadia, ¹⁹ Munjekesie eritongolo riobusuri." Bamurerera idinari ndala. ²⁰ Yesu yabareba ari "Esiniha sino nende erira nebiawi?"

²¹ Bamukalusia mbu, nibia Kaisari."Mani muberesie Kaisari ebindu biri biaye ne muberesie Nyasaye ebiri biaye. ²² Nibaurira bario, bauka muno. Barulao babwao.

²³ Inyangeyo abasadukayo bandi ababolanga mbwe huumao hulamuha, bamwichaho bamureba ²⁴ bari, Omwekesia, Musa yabola ari, 'Omundu nafwa nauma baana, mwanang'ina ahoya okeka muhaye waye amwiburire Bana.' ²⁵ Baruo bamuganda saba. Oweimberi yakeka narulao afwa. Ne siyarehao bana, yarehera mwanang'ina muhasi. ²⁶ Owohubiri yosi yaholasa ario. Owohudaru yosi ario paka bosi saba. ²⁷ Omuhasi yosi yarulao yafwa. ²⁸ Haro, mubulamu bwicha, yahabe muhasi wawi husaba abo? hubera bosi bari bamukeka?

²⁹ Yesu yabakalusia nabola ari " Mukorire, hubera mwakorwa maandiko ata amani ka Nyasaye. ³⁰ Mubulamu Bwicha aumao hukeka ama hukekwa. Arali mbwe bali sa ngamalaika muikulu. ³¹ Hulondohana nende chimbosi chiabafu hulamuha, murasoma bia Nyasaye yababolera ari ³² "Nesie Nyasaye wa Abrahamu, Nyasaye wa Isaka handi Nyasaye wa Yakobo? Nyasaye sinowabafu, nowabalamu."

³³ Omuhung'ano kwabandu nibaulira kano bauka muno amekesio kaye.

³⁴ Abafarisayo Nibaurira bari Yesu anyisisie abasadukayo, beebusia alala. ³⁵ Mulala hunibo, owamanya malako, yareba Yesu rirebo namutema- ³⁶ "Omwekesia, Rilako sina rihongo ohira malako kosi?"

³⁷ Yesuyamukalusia ari "Hera omwami Nyasaye wao nomwoyo kwao kwosi, nende amaparo kao kosi.' ³⁸ Rino nierilako rihongo handi erirangira. ³⁹ Eriohubiririosi rifwana ririo - 'Hera jirani wao kori ewe omwene.' ⁴⁰ Amalako kosi nende abanabii bategemeya malako kabiri kano.

⁴¹ Abafarisayo bari nibasiebusisie alala, Yesu yabareba rirebo. ⁴² Yabareba ari "Mupara murie hu Kristo? Nomusiani wawi?" Bamukalusia bari "Nomusiani wa Daudi."

⁴³ Yesu yababolera ari "Bikenda birie mbu omwoyo kwa Daudi kunanga nikuboa kuri ⁴⁴ Omwami yabolera omwami wange kuri " Ihala muhono kwange mulungi huula nga mbukula abasuku bao nimbarengeha mumakulu kao. ⁴⁵ Nibiri mbu Daudi alanga Kristo Omwami, yahaba arie musiani wa Daudi? ⁴⁶ Aumao mundu wanyala omukalusia. Handi aumao mundu owatema omureba marebo hurula inyanga eyo.