¹ Yeso yenjila muliaro, niyambukha, niyenjila mwitookho lilie. ² Lole, bamurerela omundu walambila nakonile khumukeka. Khulokhulola obusuubili bwabo, Yeso yaboolela omundu walambila wuno, "Mwanewe, yitinyie. Omalile okhubeelwa tsimbi tsitsio."

³ Lole, abahandichi bandi bamalako baboolanila abene khubene, "Omundu wuno yekholanga okhuba Nyasaye." ⁴ Yeso naye namanyiilisia amakani kabo ne naboola khulokhubareba, "Shicila shiina muparanga amakhuwa amabi mumioyo chienyu? ⁵ Okhuba nishiina eshitoro okhuboola, 'Tsimbi tsienyu tsibeelelwe, nomba okhuboola, 'Sinjila mana ochende'? ⁶ Nebutswa munyalilwe okhumanya mbu omwana womundu ali nende obunyali khushialo khulokhubeela tsimbi." Naboolela owali niyalambila oyo mbu, "Sinjila tola lichambi lilio, mana otsie munzuyo." ⁷ Mana omundu oyo nasinjila ne natsia munzu yiye. ⁸ Olwa emikanda chialola lino, chiamala chiria mana chitsomia Nyasaye, owali yahelesia abandu obunyali burio. ⁹ Shinga olwa Yeso yali nabiranga habwene yaho, yalola omundu wakulikhwa  Matsayo niyekhale mwitili liabatoyi bobushuru. Namuboolela, "Nondakhwo." Yasinjila namulondakhwo.

¹⁰ Olwa Yeso yekhala hasi munzu okhulia, lole, abatoyi bobushuru abanji halala nende abakholi betsimbi betsa nokhulia nende Yeso halala nabechibe. ¹¹ Olwa abafarisayo balola lino, bareeba abechi bebe, "Eshichila shiina omwechesia wenyu alitsanga nende abatoyi bobushuru nende abakholi betsimbi?"

¹² Olwa Yeso yahulila lino, yaboola, "Abandu bali nobulamu mumubili shibenyanga omusilishi tawe, balia bonyene bali abalwale. ¹³ Kenyekha mutsie mweche aka lino limanyinjia: 'Ndikombanga obukosia bulali okhwiyinia tsa tawe.' Okhuba shindeeetsa okhulanga abalunjishi okhwikanila tawe, nebutswa abetsimbi."

¹⁴ Mana abechi baYohana nibamwitsila okhumureba mbu, "Shichila shina efwe nende abafarisayo khufunganga buli khase, nebutswa abechi bobo shibafunganga tawe?"

¹⁵ Yeso nabakalusia, "Abaana bomunzu yeshiselelo banyala okhubelela olwa mwene shiselelo ashili ninabo? Nebutswa efise fiakhetse olwa mwene shiselelo yakhabukulwe nokhurusibwaho okhurula khubo, nolwenolo bakhanyalilwe okhufunga. ¹⁶ Abulaho omundu wuretsanga eshitonye shieingubo eshiyia khushifwalo eshikhulu tawe, okhuba eshipala shilanyalilwa okhurandukhayo okhurula khushifwalo, mana eshipala eshikhongo shinyalilwe okhwikasia. ¹⁷ Kata kario abandu shibaretsanga efiini imbia mumaseelo amakhulu tawe. Kakhaba bakhola bario, amaseelo kalanyalilwa okhwatikha, nefiini imitsushe, mana amaseelo kefiini kanyalilwe okhwononokha. Obukhala bwenobo, bare efiini mumaseelo kefiini imbia, mana kosi kabe kanyala okhulindwa."

¹⁸ Olwa Yeso yali nashibaboolelanga efindu fino, lole, omukhulundu yarulila namwinamila. Naboola, "Omwana wanje omukhaana wakhafwa tsa bulano, nebutswa itsa mana omurekhwo omukhonokwo, ne alalamukha." ¹⁹ Mana Yeso nasinjila namulondakhwo, nabo abechibe bosi bakhola bario.

²⁰ Lole, omukhasi owali nanyakhananga okhurulana nokhwirulutsa amatsayi khumihika likhumi elala nende chibili yetsa okhurulila inyuma waYeso nokhutila khwichemo lie ingubo ye. ²¹ Okhuba yali niyebolele omwene mbu, "Kakhaba mbu endila tsa khutsingubotsie, nditsa okhukholwa okhuba obulayi."

²² Nebutswa Yeso yeshebukha namulola ne naboola, "Mwana mukhanewe, yihesie omwoyo; obusubili bwo bukhukholile okhuba obulayi." Naye omukhasi oyo nahonibwa habwene nahabwene yaho. ²³ Olwa Yeso yola munzu yomukhulundu oyo, yalola ababayi bemifwetete nende omukanda kuluumananga. ²⁴ Naboola, "Tsieyo, okhuba omukhaana shafwile tawe, nebutswa akonanga." Nebutswa bamutsekha okhutsekha khweshichayo. ²⁵ Olwomukanda kwarusibwa elwanyi, yenjila mushikoro namubukula khumukhonokwe, ne omukhaana nabuukha. ²⁶ Nabwo oburume okhulondokhana nende lino bwalanda mwihanga elo liosi.

²⁷ Shinga olwa Yeso yali nabiranga okhuula ebweneyo, abandu babili ababofu bamulondakhwo. Batsililila okhwayula baboolanga, "Khubeele tsimbabasi, omwana wa Daudi!"

²⁸ Olwa Yeso yali yakhoola munzu, abandu ababofu yabo bamwitsila, Yeso yabareeba, "Musuubilanga mbu enyala okhukhola lino?" Nibamuboolela, "Hee Omwami."

²⁹ Mana Yeso natila khutsimoni tsiabo ne naboola, "Leshe likholeshe khwinywe okhulondokhana nobusuubili bwenyu," ³⁰ natso tsimoni tsiabo netsikukha. Mana yeso nabeetinya nokhubalachilisia nokhubaboolela," mulole mbu omundu yesi alamanya lino tawe." ³¹ Nebutwsa abandu babili bano batsia elwanyi nokhusalasia likhuwa lino mwihanga liosi.

³² Shinga abandu balia babili bali batsitsanga, lole, omundu omusilu wenjilwamwo neshishieno yarerwa khu Yeso. ³³ Olwa yali yakharusibwamwo eshishieno, omundu omusilu oyo yaboola. Emikanda chiachenyisibwa nichiboola, "Lino shiliali lialolwakhwo mu Israeli tawe!"

³⁴ Nebutswa abaFarisayo baboolanga, "Okhubirila khubaruchi bebishieno, ayininjia ebishieno."

³⁵ Yeso yarula natsia mumatookho kosi nende mutsingongo. Yatsililila okhwechesia mutsisinakoki tsiabo, nayalanga injili yobwami nokhuhonia obulwale bwetsimbia tsiosi namalwale ketsimbia tsiosi. ³⁶ Olwa yalola emikanda, yachibeelelela, shichila chiali chinyakhananga nokhufwa emioyo. Chiali shingana amakondi buchila omwayi. ³⁷ Yaboolela abechi be mbu, "Efifinwa nefinji, nebutswa abakholi nabalemu. ³⁸ Khulwako mulwangu saye khumwami welifuna, kho mbu abe unyala okhuruma abakholi mulifuna lilie."