¹ Olwa Yeso yali yakhakalukha okhurula khushikulu, emikanda emikhongo  chiamulondakhwo. ² Lole, owobuchele yamwitsila niyenama imbeli wuwe, naboolanga, "kakhaba nelienya lilio, onyala okhukhola okhuba omweleleshe."

³ Yeso yayila omukhonokwe namutilakhwo naboolanga, "Ndenyanga. Obe omweleleshe." Habwene yaho yamala niyosibwa okhurulana nobuchelebwe. ⁴ Yeso namuboolela mbu, "Henga olaboolelakhwo omundu yesi eshindu shiosi tawe. Tsia khunjila yiyo omwene, yimanyie khubeesalisi, mana oyinie efihaanwa fia Musa yalachilisia, okhuba obuloli khubo."

⁵ Olwa yali niyetsanga niyenjilanga Ebukaparaniumu, omwimilisi wabelihe yamwitsila namwisayanga ⁶ naboolanga, "Omwami, omukholi wanje wulambaalile ingo nali mubutsuuni obusiro okhushila."

⁷ Mana Yeso namuboolela, "Nditsa okhwitsa nokhumuhonia."

⁸ Omwimilisi wabelihe yamukalusia naboola. "Omwami, Esie shehelile mbu winjile mushitsafi shianje tawe. Boola tsa likhuwa naye mukholi wanje alanyalilwa okhuhona. ⁹ Okhuba kata siesi endi omundu wobunyali, nendi nende belihe hasi wanje. Emboolanga khuhuno, 'Tsia,' natsia, naye khuhundi, Yitsa', naye yetsa, naye khumukholi wanje, 'Khola lino,' naye alikhola."

¹⁰ Olwa Yeso yahulila lino yahuchisibwa nokhubolela bali bamulondangakhwo, Obwatoto emuboolela nywe mbu eshili okhunyoolakhwo mulala yesi wobusubili shinga buno muIsraeli tawe. ¹¹ Emuboolela enywe, abanji balarula ebukwe nende mumbo, nabo balanyalilwa okhulia khumesa ndala nende Abrahamu, Isaka, nende Yakobo, mubwami bwomwikulu. ¹² Nebutswa abana bobwami balinyalilwa okhulondwa nokhurusibwa nokhuyilwa mushilima shielwanyi, ewa khwakhabe nokhwikhuula nokhusia ameno." ¹³ Yeso naboolela omwimilisi wabamahe oyo mbu, "Tsia! Shinga olwa osuubile, kho libe linyala okhukhwikholeshela endio." Naye omukholi yamala nahona efise tsa fienebo.

¹⁴ Olwa Yeso yali yakhoola munzu ya Petero, yalola nakhufialanyene Petero nakonile hasi nali omulwale khulwa omurengo. ¹⁵ Yeso yatila omukhonokwe, nakwo omurengo nikumurulamwo. Mana namala nabuukha nachaka okhumukhalabanila. ¹⁶ Olwa khukolooba khwola, abandu abanji bamurerela mubunji balia bali betsulwemwo nefishieno. Yabayiniamwo emi roho khulwelikhuwa nokhubahonia balia boosi bali nibali abalwale. ¹⁷ Lino nalio liali liusibwe eliaboolwa okhubirila mumuroobi Isaya, naboolanga, "Yabukula obulwale bwefu nokhwifwala amalwale kefu."

¹⁸ Bulano olwa Yeso yalola omukanda kumubotokhane, yahaana obulosia bwokhutsia ebuleka wundi weyinyanza ya Galilaya. ¹⁹ Mana omuhandichi wamalako yamwitsila Yeso namuboolela, "Omwechesia, ndalakhulondakhwo buli hosi wotsia."

²⁰ Yeso namuboolela, "Efibwe fili nende emiluhu, nako amanoni komwikulu kali nefitsu, nebutswa omwana womundu shali nende wanyala okhura omurwe kukwe tawe."

²¹ Mulala khubechi namuboolela  mbu, "Omwami, mbelesia omunwa enzie eyabile mbeli Papa wanje."

²² Nebutswa Yeso namuboolela, "Nondakhwo sie, ne lekha abafu bayabilane abeene."

²³ Olwa Yeso yali niyenjile muliaro, abechi bebe bamala bamulondakhwo nibenjila milio. ²⁴ Lole, imbumbuyeka ikhongo yamala yibuukha khunyanza, kho mbu eliaro liamala lifunikhwa nende amarunda. Nebutswa Yeso yali nakonile. ²⁵ Abechi bamwitsila nibamubusia, baboolanga, "Khununule Omwami, khumululukhanga!"

²⁶ Yeso nababoolela, "Shichila shiina murire, enywe bobusubili obutiti?" Mana nabuukha nakondoshela obushindu halala nende inyanza. Mana nikhubaho nende obuhonzeeli obukhongo okhushila.

²⁷ Abasatsa yabo nibachenyesibwa nibaboola, omundu wuno niwambia shiina, owa kata obushindu nende inyanza fimuhulisinjia?"

²⁸ Olwa Yeso yali yakhetsa ebuleka wundi eyo mushialo shiebu Gaderina, abandu babili bali benjilwemwo nefishieno babukana ninaye. Bali barulanga mufilindwa ne bali bokhunyasia po, kho mbu abulaho omucheni yesi wakhabirileyo tawe. ²⁹ Lole, bayula nibaboola, "Nishiina shiokhunyala okhukhola ninawe, ewe omwana waNyasaye? Witsile hano okhukhusandia  inyanga yishili okhuula?"

³⁰ Bulano lituli lietsimbitsi lialiho niliayanga, ilali ehale muno tawe okhurula ewabali. ³¹ Amatimoni katsililila okhwisaya khuYeso nikaboolanga, "Kakhaba okhurusia okhurula muno, khurusie khutsie khwinjile mwituli lietsimbitsi elo."

³² Yeso nakaboolela, "Tsie!" Amatimoni karula nikatsia nikenjila mutsinbitsi; ne lole, lituli liosi lielukha nilikholomokha khuluchengulukho lweshikulu linjila munyanza netsifwila mumatsi. ³³ Balia bali bayanga tsimbitsi belukha nibatsia mwitookho nibayila oburume khu kalia kosi kali kekholeshe, munomuno kali kekholeshele balia bali benjilwemwo namatimoni. ³⁴ Lole litookho liosi liarula okhubukana nende Yeso. Olwa bamulola, bamusaya mbu atsie arule mwihanga liabo.