¹ Olakhalaka eshiina tawe, nawe sholakhalachilwa eshina tawe. ² Okhuba obukhalachi bweshiina bwokhalakanga, nokhalachilwe wesi khandi, nashio eshichelo shiochelelangamwo, wesi khandi olichelelwamwo. ³ Shichila shiina muhenganga akhatsaswi akhatiti khelikata khali mumoni yomwana wenyu, nebutswa shimulolangakhwo okusichiri kwomusaala kuli mumonimwo? ⁴ Onyala oriena okhuboolela omusiani wenyu, mbu lekha ekhuyinie omutsaswi kwelikata kuli mumoni yo; nashio eshisichiri shiba  shili mumoni mwo omwene? ⁵ Abekaati nywe! Ranjilile muyinie eshisichiri shili mumoni mwenyu abeene mbelio, ne mana mulanyalilwa okhulola obulayi bwene olwa muba muyinia elwanyi eshitonye shomutsaswi kwelikata kuli mumoni mwomwana wenyu. ⁶ Leshe okhuhelesia tsimbwa filia bili efiholo, nokhusukunila tsimbitsi filia fiobukhala. Halali tsitsa okhufisenachila hasi wefilenje fiatsio nokhukalukhana nokhumurandula mufitonye.

⁷ "Reebe mwitsa okhuhebwa. Khaabe ne mulanyoola, Khong'onde nemulekulilwa. ⁸ Okhuba buli mulala wureebanga, ahebungwa; buli mulala wukhabanga anyoolanga; naye omundu wukhong'ondanga kwikulungwa. ⁹ Nomba niwina khwinywe, kakhaba omwna wuwe areeba eshiliibwa, alamuhelesia lichina? ¹⁰ Nomba kakhaba alareeba inyieni alanyalilwa okhumuhelesia inzukha? ¹¹ Khulwako, kakhaba nywe abomuli netsiimbi mwamanya okhuhaana efihaanwa efilayi khubaana benyu, nibunji shina obulayi obwaPapa wenyu womwikulu anyala okhuhelesia balia abamureeba? ¹² Khulwako, eshindu shiosi shimwenya mukholelwe nabandu, kakhoyesheele khandi mwesi mubakholele murio, okhuba lino nalio lilako  nabaroobi.

¹³ Injilile mushilibwa eshinyerere. Okhuba eshilibwa eshibambukhu ne injila yikhuyilanga mubusasibwi, ne abandu abanji babirilanga muyo. ¹⁴ Nebutswa eshilibwa neshinyerere nayo injila neyindinyu yikhuyilanga  mubulamu, ne khuliho nende abatiti bachinyoolanga.

¹⁵ Mube meso nende abaroobi bobubeyi, bamwitsilanga mufifwalo fiamakondi nebutswa nefibwe fiahalakha okhushila. ¹⁶ Mulafimanya khulwefiamo fiabio. Abandu bakhung'asinjiakhwo obwabari okhurula khubitsakha fiamawa nomba emisapipu okhurula khufitsisia? ¹⁷ Munjila yeneyo buli omusaala omulayi kwamanga efiamo efilayi, nebutswa omusaala omubi kwamanga efiamo efibi. ¹⁸ Omusaala omulayi shikunyala okhwama efiamo efibi tawe, nomba omusala omubi kwame efiamo efilayi tawe. ¹⁹ Buli omusaala okulanyala okhwama efiamo efilayi tawe kukhoyilwe okhutsoolwa nokhusukunwa mumulilo. ²⁰ Kho mulanyalilwa okhubamanya khulwa efiamo fiabo. ²¹ Shikali buli mulala wumbolela sie mbu, 'Omwami, Omwami,' alinjila bubwami bwomwikulu tawe, nebutswa nibalia bonyene bakholanga elienya lia Papa wanje ouli mwikulu. ²² Obunji bwabandu balinyalilwa okhureeba sie khunyanga yeneyo mbu, 'Omwami, Omwami, shikhwanyalilwa okhurooba mulira lilio, namwo mulira lilio khwalonda efishieno, namwo mulira lilio khandi khukhola obunji bwamangalimwa?' ²³ Mana ndilinyalilwa okhubaboolela habulafu mbu, 'Shindamumanyakhwo tawe! Ruleekhwo mutsie ehale, enywe abafinakanga bwamalako!'

²⁴ "Khulwako buli mulala owuhulilanga amakhuwa kanje nokhukalonda aliba shinga omundu omusitsa wombokha inzu yiye khulwanda. ²⁵ Ifula yakwa, amayembo niketsa, nakwo omuyeka nikuhuutsa nikwikhupa khunzu yeneyo, nebutswa shiyakwa hasi tawe, okhuba omusinji kwayo kwali khulwanda. ²⁶ Nebutswa buli mulala owuhulilanga amakhuwa kanje nalakalonda tawe aliba shinga omundu omusilu wumbakhanga inzu yiye khumuyeshe. ²⁷ Ifula yakwa, amayembo niketsa, nako omuyeka nikuhuutsa nikukhupa inzu yeneyo, nikwa hasi, nabwo obusasibwi bwayo nibuula khushiakamo."

²⁸ Kanyoolekha mbu olwa Yeso yali namalilenje okhuboola amakhuwa kano, emikanda chiahuchisibwa po nokhwechesia khukhwe, ²⁹ okhuba yabechesia shingana wali nobunyali, bulali shingana abahandichi babo tawe.