¹ Yeso yalanga  abechibe ekhumi nende babili halala nabahelesia obunyali ikulu wemiroho emichafu, okhuchirusia elwanyi nokhuhonia obulwale bwetsimbia tsiosi namalwale ketsimbia tsiosi. ² Bulano ameera kabarume bosi kali kano. Owambeli, Simioni (owayalanga khandi Petero), nende Andereya omusiani wabo, Yakobo omwana wa Zebedayo, nende Yohana omusiani wabo; ³ Filipo nende Batsolomayo, Tomaso nende Matsayo omusololi wobushuru; Yakobo omwana wa Alufayo, nende Tadayo; ⁴ Simioni Omusiloti, nende Yuda esikarioti, owakhamukhobile.

⁵ Bano ekhumi nababili Yeso yabaruma elwanyi. Yabalachilisia nababoolela, "Mulatsiekhwo habundu hosi ewabamahanga bamenyanga tawe, ne mulenjilekhwo mwitookho lititi liosi liabaSamaria tawe. ⁶ Habula bukhala bwenobo tsie mumakondi kakora keinzu yabaIsraeli; ⁷ nenyu olwa mutsia, yaale nimuboola, 'Obwami bwomwikulu buli ahambi.' ⁸ Honie abalwale, sumulusie abafu, yosie abobuchele, nokhulonda efishieno. Mwanyoola eshikhaya, haane eshikhaya. ⁹ Mulachinje etsahabu yosi, efetsa yosi nomba omukasa kwosi mufiboyelo fienyu tawe. ¹⁰ Mulabukulekhwo eshiloloti khuloluchendo lwenyu tawe noho eshifwalo shindi shiamutunga, noho tsikaala, noho elabushi, okhuba omukholi kenyekhanga abe nende eshiokhulia shishie. ¹¹ Litookho liosi nomba eshikwenyi shiosi shiomwinjilamwo, khabilisie omundu weyimoni ulimwo, nenyu mumenyemwo okhuula olwa murulayo. ¹² Olwa muba mwinjila munzu, haanemwo amashesio. ¹³ Kakhaba inzu niyeyimoni ndafu, leshe omulembe kwenyu kube khuyo. Ne kakhaba shiyili yeyimoni ndafu tawe, leshe omulembe kwenyu kumukalushile. ¹⁴ Shinga balia balamwinjisia nomba okhuhulila amakhuwa kenyu, olwa muba murula munzu yeneyo nomba litookho lienelo, bungulule olufu okhurula khufilenje fienyu. ¹⁵ Obwatoto emuboolela  mbu, liloba lia Sodoma nende Gomora liakhetinyiekhwo okhushila, khunyanga yeyindukho okhuyombakhwo litookho lienelo.

¹⁶ "Henje, emurumanga elwanyi shinga namakondi hakarikari wefibwe, kho mube shingana tsinzukha nende okhubula eshikha shinga efituti. ¹⁷ Be meso khubandu! Balamuhaana khubayaali, nabo betsa okhumulandula mutsisinakoki tsiabo. ¹⁸ Mana mwitsa okhurelwa imbeli wamakafuna nabaruchi khulokhubela sie, shinga obuloli bwabo nende khubamahanga. ¹⁹ Olwa baba bamuhanayo, mulaba nokhubeyabeya okhulondokhana nende shiga muboola nomba eshiamuboola tawe, okhuba mwitsa okhuhesibwa shiomuboola efise fienebo. ²⁰ Okhuba shinenywe mulanyalilwa okhuboola tawe, nebutswa niRoho kwa Papa wenyu kwitsa okhunyalilwa okhuboolela mwinywe. ²¹ Omwana wanga omundu alahaana omwana wabo mulufu, naye samwana omwana wuwe. Abaana balinyalilwa okhubukha shibeka khubebusi babo nokhubakhola berwe. ²² Mulisilwa nabandu bosi khulokhubela elira lianje. Nebutswa ulia wulifwila okhuula khubumalilishilo, omundu mwenoyo alihonibwa. ²³ Olwa baba bamusandia mwitookho lino, yilushile mulilondakhwo, okhuba mubulamba emuboolela mbu, shimuliba mubirile mumatookho kaIsraeli kosi omwana womundu nashili okhwitsa tawe.

²⁴ "Omwechi shali omukhongo okhushila omwechesiawe tawe, nomba omukholi abe ikulu womwamiwe tawe. ²⁵ Itukhane khulwa omwechi okhuba shinga omwechesia wuwe, naye omukholi okhuba shinga omwami wuwe. Kakhaba balanjile omwami we inzu Beelizebuli, nameera kambia shiina amabi kano kabanyala okhulanga abe inzu yiye! ²⁶ Khulwako mulabariekhwo tawe, okhuba shikhulikhuho nende eshiefisa shililekha okhulolesibwa tawe, nashio shibulaho shiafiswa shiakhaleshe okhumanyikha tawe. ²⁷ Eshiemuboolela mushilima shiboole habulafu, nashio shiomuhulila kalaha mumarwi kenyu, kayaalile ikulu khufisuli fietsinzu. ²⁸ Mularie balia beeranga omubili nebutswa shibanyala okhwira omwoyo tawe. Habula, rie wulia unyala okhwira omwoyo halala nende omubili emakombe. ²⁹ Amakhokho kabili shikakusibungwakhwo khumang'ondo amatiti? Ne kata kario elala liako shilinyala okhuronya hasi buchila obumanyilisi bwa Papa wenyu tawe. ³⁰ Nebutswa liswi lili khumirwe chienyu liosi liabalwa. ³¹ Mularie tawe. Muli nende obukhala okhushila amakhokho amanji. ³² Khulwako buli mulala wunziyama imbeli wabandu, siesi khandi ndakhamwiyame imbeli wa Papa wanje wuli mwikulu. ³³ Nebutswa wulia wunzikana sie imbeli wabandu, siesi khandi ndakhekane imbeli waPapa wuli mwikulu.

³⁴ "Mulapare mbu ndetsa okhurela omulembe khushialo tawe. Shindeetsa okhurela omulembe tawe halali olukanga. ³⁵ Okhuba ndetsa okhurechekha omundu shibeka nende samwana, naye omukhaana shibeka nende nyinamwana, naye mukha omwana shibeka nende nakhufiala wuwe.

³⁶ Omusuku womundu baliba balia beyinzu yiye omwene. ³⁷ Wulia wuheela samwana noho nyinamwana okhushilasie shali wobukhala khusie tawe; wulia wuheela omwanawe omusiani nomba omukhaana okhushila sie shali nobukhala khusie tawe. ³⁸ Wulia wulanyala okhubukula omusalaba mana yanondekhwo shali nobukhala ninasi tawe. ³⁹ Wulia wukhaaba obulamubwe alabukosia. Nebutswa wulia wukosia obulamubwe khulwasie alabunyoola.

⁴⁰ "Wulia wumwinjisia nywe yenjisia sie khandi, naye wulia winjisia sie yenjisia wulia waruma sie. ⁴¹ Wulia winjisia omuroobi mulira liomuroobi alanyalilwa okhunyoola omukabwa kwomuroobi, naye winjisia omundu omulunjishi alanyalilwa okhunyoola omukabwa kwomundu omulunjishi. ⁴² Wulia yesi ouhaana khumulala wabatiti bano kata eshikombe shiamatsi amanyifu okhunywa mulira liomwechi, obwatoto omuboolela mbu, ibulaho munjila yosi yalikosiliamwo omukabwakwe tawe."