¹ Liamala liula mbu olwa Yeso yali namalilenje okhuhaana obuloosia khubechibe ekhumi nende babili, yarulaho okhutsia okhuyaala mumatookho kabo. ² Bulano olwa Yohana yahulila efikhole fiaKristo nali mumbohe, yaruma oburume khuye okhubirila khubechibe ³ namuboolela, "Newe mulala witsanga, nomba kakhoyile khuhenje ouhundi?"

⁴ Yeso nabakalusia nababoola, "Tsie mana muboolele Yohana eshia mulolanga nokhuhulila. ⁵ Ababofu banyoolanga okhulola, abalema bachendanga, abobuchele bosibungwa, abasilu bahulilanga khandi, abafu bakalusibungwa mubulamu khandi, nayo injili yiyaalungwa  khubamanani. ⁶ Oweyikhabi nimulala yesi owulekumula shichila sie tawe."

⁷ Shinga olwabandu bano barula nibatsia khulwabo, Yeso yamala yanza okhuboola khumukanda oko okhulondokhana nende Yohana, "Shiina eshiomwatsia okhulola mushiangalamwe- likale litechesibungwa nobushindu? ⁸ Nebutswa nishina eshiamwatsia elwanyi okhulola- omundu niyefwalile efifwalo efitorotoro? Obwatoto buli, balia befwalanga efifwalo efitorotoro bamenyanga mutsinzu tsiabami.' ⁹ Nebutswa nishiina eshiomwatsia elwanyi okhulola-omuroobi? Hee, emuboolela nywe, obushilakhwo omuroobi. ¹⁰ Ouno niye owaliahandikwakhwo, 'Henga, erumanga omurumwa imbeli wobwenibwo, wulirechekha injila imbeliwo,' ¹¹ Emuboolela  kobwatoto mbu balia bebulwa nomukhasi, abulakhuho mulala yesi wasulumukha ouli omukhongo okhushila Yohana omubatisia tawe. Halali omundu uli nobukhala bwahasi mubwami bwomwikulu nomukhongo okhuyomba shinga lali. ¹² Okhurula khunyanga ya Yohana omubatisia okhuula lwaleelo, obwami bwomwikulu bunyakhananga amahababa, nabo abandu bamahababa babubukulanga khulwamani. ¹³ Okhuba abaroobi bosi namalako biaroobanga okhutukha khu Yohana; ¹⁴ ne kakhaba muli nelienya liokhuliyama, neLiya wali yetse. ¹⁵ Wulia wuli nelirwi okhuhulila, leshe aulile. ¹⁶ Ndakhachelasia oliubulo luno nende shiina? Lili shinga abaana nibekhale mushiiro balanjilisilinjia khubandi, ¹⁷ baboolanga, 'Khumubayile omufwetete ne shimushinile tawe. Khubelele nenyu shimwikhuulile tawe.'

¹⁸ Okhuba Yohana shiyeetsa nalitsanga omukati nomba nanywetsanga efini tawe ne baboolanga, 'Ali nelitimoni.' ¹⁹ Omwana womundu yetsa nalitsanga nende nanywetsanga nabo baboola, 'Lole, nomundu omulitsachi khandi omundu omumesi, omulina wabasololi bobushuru nende aboononi! "Nebutswa obusitsa buusibungwa khulefikhole fifie."

²⁰ Mana Yeso nachaka okhukondoshela amatookho kamangalimwa ke mubunji kekholekhanila, shichila abandu bamatookho kene yako shibali bekaanila tawe. ²¹ "Amatinyu kali khuyiwe Korozani! Amatinyu kali khuyiwe Betesaida! Kakhaba amangalimwa kakhekholeshe Sidoni akekholekha mwinywe, bakhekanile khale po mutsingubo tsiamakunia namakoshe. ²² Nebutswa, emuboolela mbu, khwakhabe nokhwifwila khu Taya nende Sidoni khunyanga yobukhalachi okhushilakhwo nywe. ²³ Enywe kaparinaumu, muparanga mwakhachiingulwe okhutsia mwikulu? Tawe, mwakharelwe hasi emakombe. Okhuba kakhaba mbu amangalimwa kekholekha munywe kakhekholeshe muSodoma, yakhabele inyala okhuba ishiliho okhuula bulano. ²⁴ Nebutswa emuboolela mbu bwakhabe obutoro khuliloba lia Sodoma munyanga yobukhalachi bweshiina okhushila nywe."

²⁵ Hafise  hene yaho Yeso yaboola, "Nditsomia Papa, Omwami womwikulu nende mushialo, shichila wafisa efindu fino okurula khubasitse nende okhumanyilisia, nokhufibuula khubaana abatiti. ²⁶ Hee, Papa, okhubeela lino liali liokhuyanzisia mumonitsio. ²⁷ Efindu fiosi okhurula khuPapa fiarerwa khusie naye abulakhwo mulala yesi wamanya omwana tawe nalali Papa, naye abulaho mulala wamanya Papa nalali omwana naye mulala yesi womwana arobolanga okhumumanyisia khuye. ²⁸ Yitse khwisie, nywe mwesi muyinzilanga nomuli nobusiro obukhongo, nasi ndalanyalilwa okhumuhelesia obuhuluushi. ²⁹ Yirekhwo liyoki lianje mana mweche okhubirila khusie, okhuba endi omwitutuyi nomweleleshe mumwoyo, ne mulanyalilwa okhunyoola obuhuluushi mumioyo chienyu. ³⁰ Okhuba liyoki lianje nelitoro nakwo omusiko kwanje nomwangu."