¹ Efise fienefo, Yeso yatsia khunyanga ya Sabato okhubirila mumikunda chieyimele. Abechibe bali inzala nibanza okhunoka emirwe chieyimele nokhuchilia. ² Nebutswa lwabafarisayo balola bario, baboolela Yeso, "Henga, abechibo bakholanga lili shibeka nende amalako khunyanga ya Sabato," ³ Nebutswa Yeso nababoolela, "Mushili okhusomakhwo eshia Daudi yakhola olwa yali inzala, nende abandu bali halala ninaye? ⁴ Yatsia niyenjila munzu ya Nyasaye ne nalia eshiokhulia shiokhwimanyia imbeli, eliali shibeka nende amalako khuye okhulia khandi shibeka nende amalako khubalia bali ninaye, nebutswa lili lilayi khubesalisi bonyene. ⁵ Mushili okhusomakhwo mumalako mbu khumyanga ye Sabato abesalisi bakholanga amakhuba kalakhoyeshele obulaba mumabi tawe? ⁶ Nebutswa emuboolela  mbu wulia wushila litembeli ali hano. ⁷ Kakhaba mwakhamanyile kalino limanyinjia, 'Ndakhekombile tsimbabasi tawe emisango; shimwakhakondoshele abalali neshikha tawe. ⁸ Okhuba omwana womundu nomwami weSabato.

⁹ Mana Yeso narulaho ne natsia mutsisinakoki tsiabo. ¹⁰ Lole, khwaliho nomundu wali nomukhono kwalelela. Abafarisayo bareeba Yeso, baboolanga, "Nelilako lilayi okhuhonia omundu khuSabato?" Kho mbu babe banyalilwa okhumunyola mumabii.

¹¹ Yeso nababoolela, "Nimundu shiina mwinywe, kakhaba ali nende tsa likondi elala lionyene, ne kakhaba likondi lino linyala okhukwa mubwina, khuSabato, shanyala okhulikhwesa nokhulirusia tawe? ¹² Nishiina shiobukhala okhushila khufio, nomundu nomba likondi! Khulwako nobulayi okhukhola amalayi khuSabato." ¹³ Mana Yeso naboolela omundu oyo, "Lunjisia omukhonokwo." Yakulunjisia, nako nikukalukha okhuba omulamu shingana omukhono kundi yuko. ¹⁴ Nebutswa abafarisayo barula nibatsia elwanyi okhumukutila. Bakhabanga injila yibanyala okhumwononiliamwo.

¹⁵ Yeso namanyilenje lino, yarulaho. Abandu abanji bamulondakhwo nabahonia boosi. ¹⁶ Yabalachilisia balamukhola bamanyishe khubandi tawe, ¹⁷ mbu linyalilwe okhuusibwa eliabolwa okhubirila mumuroobi Isaya, naboolanga, ²² Mana Yeso nalerelwa omundu mulala omubofu khandi omusilu, wenjilwamwo nefishieno. Yamuhonia, namakalusio mbu omundu omusilu oyo yaboola nokhulola. ²³ Omukanda kwoosi kwachenyesibwa nokhuboola khukhureeba, "Omundu wuno anyala okhuba omwana wa Daudi?"

²⁴ Nebutswa olwa abaFarisayo bahulila keliangalimwa lino, baboola, "Omundu wuno shayininjia efishieno buchila Beelizebuli, omwami wefishieno tawe."

²⁵ Nebutswa Yeso yamanya amaparo kabo ne nababoolela, "Buli obwami bwikabulangamwo obwene butong'anga bwonyene, nalo buli litookho nomba inzu yikabulangamwo eyene shiyinyala okhusinjila tawe. ²⁶ Kakhaba eshishieno shinyala okhulonda eshishieno, yekabulemwo ye omwene. Obwami bwe bwakhanyalilwe okhusinjila buriena? ²⁷ Ne kakhaba esie eyinia efishieno okhubirila khu Beelizebuli, nabo abaana benyu bafilondanga okhubirila khuwina? Okhubela eshifune shino bakhabe abayasi benyu. ²⁸ Nebutswa kakhaba enondanga efishieno khulwa omwoyo omutsienukhu kwaNyasaye, kho kario obwami bwaNyasaye bwamwitsila enywe. ²⁹ Omundu yesi anyala ariena okhwinjila munzu yomundu wamani mana abukule efindu fie fiosi atsie ninafio buchila  okhumuboha mbelio omundu wamani oyo? Mana khanyalilwe okhwiba efindu fie okhurula munzu ye. ³⁰ Mulala wulali ninasi ali shibeka ninasi, naye mulala wulakhung'asinjia ninasi tawe asalasinjia. ³¹ Khulwako emuboolela enywe, abandu bakhabeelwe buli imbi nobubooli obubi, nebutswa obubooli obubi khumwoyo omutsienukhu shikhwakhabeelwe tawe. ³² Wulia yesi wuboola amakhuwa kali shibeka khumwana womundu, omwenoyo alinyalilwa okhubeelwa. Nebutswa wulia yesi wuboola khumwoyo omutsienukhu, omwenoyo ye shalibeelwa tawe, kata mushialo muno noho shilia shitsanga. ³³ Kasia omusala omulayi  nefiamo fiakwo efilayi, nomba kasia omusala omubi  nefiamo fiakwo efibi, okhuba omusala kumanyikhananga khufiamo fiakwo. ³⁴ Enywe aboluibulo lwetsinzukha, okhuba muli aboni, munyala okhuboola muriena efindu efilayi? Okhuba okhurulana nobuyinda bwomwoyo omunwakwe kuboola. ³⁵ Omundu omulayi okhurulana nende libishilo lilie lilayi liomumwoyokwe libulanga elili lilayi, naye omundu omwononi okhurula mwibishilo liobwononi liomwoyokwe libulanga lili libi. ³⁶ Emuboolela mbu munyanga yokhukhalaka eshina abandu balihaana shinga lwabarumishila buli likhuwa likhaya libali baboola. ³⁷ Okhuba amakhuba koko omwene kalikhukhola okhalachilwe eshina buchila okhuyiekha elubeka lulala tawe, amakhuba koko khandi kakhakhukhole okhuyilwa mumbohe."

³⁸ Mana abahandichi bamalako nende abaFarisayo bakalusia Yeso nibamuboolela, "Omwechesia, khwikomba khulole eshilolelo okhurula khwiwe," ³⁹ Nebutswa Yeso yabakalusia nababoolela, "Oluibulo lwabononi nabaheyi lukhabanga eshilolelo. Nebutswa eshilolelo shiosi shishilahanwakhwo khubo tawe habula eshilolelo shiomuroobi Yona. ⁴⁰ Shinga olwa Yona yali munda yeyinyeni ikhongo, nalo khandi lomwana womundu aliba ario tsinyanga tsitaru nefiro fitaru mumwoyo kweshialo. ⁴¹ Abandu ba Ninawi balisinjila habundu hobukhalachi bweshina nolwibulo luno lwabandu nokhulura mumbohe. Okhuba bekanila habuyaali wa Yona, ne lole, mulala uli omukhongo okhushila Yona ali hano. ⁴² Omukhaye womuruchi womumbo yakhabushe habundu wobuyaali halala nende abandu bolwibulo luno nokhubara mumbohe. Yetsa okhurula ebumalilishilo weshialo okhuhulilisia obusitsa bwa Sulemani, ne lole, mulala uli omukhongo okhushila Sulemani ali hano. ⁴³ Olwa Roho omuchafu kubetsanga kurulile kutsile okhurula mumundu, kubirilanga habundu wamatsi kabula mana kukhaaba obuhulushi, nebutswa shikubunyoolanga tawe. ⁴⁴ Mana kuboola, 'Ndalakalukha munzu mwanje mwandarula.' Lwaba nakalushenje, anyoolanga inzu yili ikhaya- yeyilwe yilabile tswe mubulosie  obulayi. ⁴⁵ Mana kutsia nokhubukula emiRoho chindi musafu chilikhwo emiononi okhukushila, mana chitsa chiosi okhumenyaho. Mana imelo yokhumalilikha yomundu oyo yibiyakhwo okhushila lwokhuranga. Kakhabe tsa kario nolwibulo olwononi luno."

⁴⁶ Olwa Yeso yali nashiboolanga khumukanda, lole, nyinamwana nabaana babo basinjila elwanyi, bakhabanga baboole ninaye. ⁴⁷ Omundu mulala namuboolela mbu, "Lola, mao nabaana benyu basinjile elwanyi, bakhabanga okhuboola ninawe."

⁴⁸ Nebutswa Yeso yamukalusia naboolela owali namuboolele, "(Mama) wanje niwina nabo abasiani befu nibanga wina?" ⁴⁹ Mana nanyila omukhonokwe nahenjesia khubechibe naboola, "Henje, (Mama) wanje nabaana befu mbabano! ⁵⁰ Okhuba wulia yesi ukhola elienya lia Papa wanje wuli mwikulu, omundu mwenoyo niye omusiani wefu, nomukhaana wefu nende (Mama)."