¹ Khunyanga yeneyo Yeso yarula elwanyi weyinzu niyekhala halukuku weyinyanza. ² Omukanda omukhongo kwamubotokhana, kho yenjila muliaro niyekhalamwo nakwo omukanda kwosi kwasinjila khulukuku. ³ Mana Yeso yababoolela efindu efinji mutsinjelo. Yaboola, "Lole, omumitsi yarula natsia okhumitsa obufwa. ⁴ Olwayamitsa, obufwa bulala bwakwa khubuleka lweyinjila, nako amanoni niketsa nikabubotsa. ⁵ Obufwa bundi nibukwa khulwanda ewabwalali neliloba lihela tawe. Mulwangu lwene olo bwamela shichila liloba shiliali liokhutsia hasi tawe. ⁶ Nebutswa lweluiba liarula, bwamala busambwa shichila shibwali nemisi tawe mana nibulala. ⁷ Obufwa bundi bwakwa mumimela chiamawa. Emimela chiamawa echo chiakhula nechibutsoma. ⁸ Obufwa bundi bwakwa mwiloba lilayi nibwibula emimela, milala efikhumila ekhumi (100), efindi efikhumila fisasaba (60) nafio efindi efikhumila fitaru (30), ⁹ Wulia wuli namarwi, leshe ahulile."

¹⁰ Abechi ba Yeso bamwitsila nibamureeba, "Shichila shiina oboolanga khumikanda mutsinjelo?"

¹¹ Yeso yabakalusia nababoolela, "Mwahebwa ikhabi yokhumanyilisia amefiso kobwami bwomwikulu, nebutswa khubo shibahebwa tawe. ¹² Okhuba wulia wahesibwa efinji, naye alanyalilwa okhuba nefinji okhushilakhwo. Nebutswa wulia wubula tawe, kata shilia shiali ninasho shilibukulwa okhurula khuye. ¹³ Shino nashio shichilanga nemboola khubo mutsinjelo: Kata kakhaba bahenganga, shibalolanga tawe: shibahulilanga noho okhumanyilisia tawe.

¹⁴ Khubo oburoobi bwaIsaya buusibwe, buboolanga, nebutswa shimwakhanyalilwe okhumanylisia kata nahatiti tawe: okhuhenga, mulahenga, nebutswa shimwakhamanye tawe. ¹⁶ Nebutswa tsimoni tsienyu netsietsikhabi, okhuba tsilolanga; namarwi kenyu, okhuba kahulilanga. ¹⁷ Obwatoto emuboolelanga mbu abaroobi nabandu abalunjishi mubunji bekomba okhulola efindu fiomulolanga fino ne shibafilola tawe. Bekomba okhuhulila efindu fiomuhulilanga fino ne shibafihulila tawe. ¹⁸ Wulisie mana khuluchelo lwomulimi wamitsa obufwa bubwe. ¹⁹ Olwa mulala yesi aulilanga likhuwa liobwami nebutswa alekha okhulimanyilisia, omwononi wulia yetsanga okhunulayo lilia libetsanga limitsilwe mumwoyo. Luno nalwo olufwa lumitsungwa khundulo khwomuhanda. ²⁰ Bulia bwamitswa khulwanda nomundu uhulilanga likhuba naye alibukula lwangu khumwikhoyo, ²¹ kata kario shali nemisi muye tawe naye yefwila khuloluhoono lutiti. Olwa amatinyu nomba obusandibwi bubukhanga shichila likhuwa, akwitsanga mubwangu po. ²² Bulia bwali bwamitswa mumimela chiamawa, wuno nomundu wuhulilanga likhuba, nebutswa obulindi bwakeshialo nobukatibwi bwobuyinda bitsomanga likhuba naye akwa oulaama efiamo tawe. ²³ Obufwa wamitswa khwiloba lilayi, wuno nomundu wuhulilanga likhuwa mana alimanyilisia. Yamanga efiamo mana yebula omumela. Shirusinjia ebuleka bulala efikhumila ekhumi namwo mubundi efikhumila khasasaba, namwo muhundi efikhumila fitaru okhushilakhwo shinga fiarakwa."

²⁴ Yeso yarera oluchelo lundi khubo. Naboola, "Obwami bwomwikulu buli shingana omundu wamitsa obufwa obulayi mumukundakwe. ²⁵ Nebutswa olwa abandu bali bakonile, omusukuwe yetsa namitsa libanze hakarikari weyingano yiye ne natsia. ²⁶ Owa emirwe chiemimela chianza okhurusia nokhuhakara, amabanze kosi kalolekhana khandi. ²⁷ Abakholi ba mwene mukunda betsa nibamuboolela nokhumureeba, 'Omukhongo, shiwamitsa obufwa obulayi mumukunda kukwo noho? Kuli kuriena kuli nende libanze?'

²⁸ "Yababoolela, 'Omusuku naye wukholile lino.' "Abakholi nibamubolela, 'Kho wenyanga efwe khutsie khwiye khufirusiamwo?'

²⁹ Mwene mukunda naboola, 'Tawe. Shichila olwamulaba nimusulanga libanze munyala okhwitsukhana musulilemwo yingano. ³⁰ Leshe fiosi fikhulile halala okhutukha mwifuna. Khufise fielifuna ndakhaboolele abafuni, "Chache nokhusuila libanze mbeli nokhuliboha tsikhanya nokhutsisamba, nebutswa khung'asie ingano nimura mushiachi shianje."'"

³¹ Mana Yeso nabarelela oluchelo lundi khubo. Naboola, "Obwami bwomwikulu buli shina olufwa olutiti lwelisatsi olwomundu yabukula namitsa mumukunda kukwe. ³² Olufwa luno obwatoto buli, nolutiti mubufwa bwosi. Nebutswa olwaluba lwakhakhula, lubetsanga olukhongo okhuyomba emimela chindi chiomushilundu. Lumalanga lukwa omusala, kho mbu amanoni kokhwikulu ketsanga mana kombakhwo efitsu khutsisaka tsiakwo." ³³ Yeso khandi nababoolela oluchelo lundi. "Obwami bwomwikulu buli shinga limela liomkuhasi yabukula natsukasia nende efikha fitaru fiobusie okhutukha lomuhinda kwosi kwafimba."

³⁴ Kano kosi Yeso yaboolelanga emikanda chino mutsinjelo; naye shibaboolelwakhwo eshindu shiosi buchila oluchelo tawe. ³⁵ Lino liali mubulosie mbu kalia kali kaboolwa okhubirila mumuroobi kanyalilwe okhuusibwa, olwa yaboola, "Ndalekula omunwa kwanje mutsinjelo. Ndalanyalilwa okhuboola efindu fiali fiefisa okhuchaaka omushinji kweshibala."

³⁶ Mana Yeso narula mumikanda natsia niyenjila munzu. Abechibe bamwitsila bamuboolela, "Khuboolele muburambi oluchelo lwamabanze mumukunda."

³⁷ Yeso nabakalusia naboola, "Wulia umitsanga olufwa olulayi nomwana womundu. ³⁸ Omukunda neshibala; nabwo obufwa obulayi, bano nibo abaana bobwami. Amabanze nako nabaana bawulia omwononi, ³⁹ naye omusuku wabumitsa bwo neshishieno. Obufuni nabwo nobumalilishi bweyindukho, nabafini nabo nabamalaika. ⁴⁰ Khulwako singa olwa amabanze kakhungasibungwa nikamilwa nomulilo, kho nalwo lakaliba kario khundukho yokhumalilikha. ⁴¹ Omwana womundu aliruma abamalaika bebe, nako kalikhung'asia amachina kosi kefisirikasio okhurula mubwamibwe halala nende balia bafinakanga amalako. ⁴² Bakhabasukune mwirumbi lwomulilo, ewa okhwikhuula nokhusia ameno khwakhabe. ⁴³ Mana nabo abandu abalunjishi bakhaashe shinga eluiba mubwami bwa Papa wabo. Wulia wuli nemarwi, leshe ahulile.

⁴⁴ "Obwami bwomwikulu buli shinga libishilo liafiswa mumukunda. Omundu yalinyoola nalifisa. Mumwikhoyo kukwe yatsia, nakusia filia fiosi fiyali ninafio, ne nakula omukunda kwenoko. ⁴⁵ Khandi obwami bwomwikulu buli shinga omundu omukhala wukhabanga efindu fiobukusi. ⁴⁶ Olwayanyoola shilala shili nobukusi obulayi yatsia nakusia buli shindu shiyali ninashio, nashikula.

⁴⁷ "Khandi obwami bwomwikulu buli shingana olukhanda lwarekwa munyanza, lwakhung'asia tsinyeni tsietsimbia tsiosi. ⁴⁸ Olwa lwali lwitsule, abalobi balukhwesa balura khuluchinga. Mana bekhala hasi nokhukhung'asia tsindayi mufimwelo, natso tsimbi nibatsisukuna. ⁴⁹ Kakhabe kario mubumalilishilo bweshialo. Abamalaika bakhetse nokhwahula aboononi okhurula mubalunjishi. ⁵⁰ Bakhabasukune mwirumbi liomulilo, ewakhwakhabe nokhwikhuula nokhusia ameno.

⁵¹ "Mumanyilisiye efindu fino fiosi?" Abechi nibamwiyamila, "Hee."

⁵² Mana Yeso nababoolela, "Khulwako omuhandichi wamalako yesi owuli omwechi mubwami bwomwikulu ali shinga mwene inzu, wuyininjia efindu efikhulu nende efiyia okhurula mwibishilo lilie." ⁵³ Mana kali mbu olwa Yeso yali namalile tsinjelo tsino, yarula habundu yaho.

⁵⁴ Mana Yeso niyenjila mwihanga lie niyechesia abandu musinakoki. Amakalusio kali mbu abandu okhuchenyesibwa nibamala baboola nokhureeba," Niheena womundu wuno anyoolanga obusitse nende obunyali bwamangalimwa kano? ⁵⁵ Omundu wuno shali omwana womubatsi tawe? Shali wanyinamwana alangungwa Maria? Abasiani babo shibalangungwa Yakobo, Yusufu, Simioni nende Yuda tawe? ⁵⁶ Abakhana babo bosi shibali bali halala ninefu hano tawe? Niheena wayanyoola efindu fino fiosi?" ⁵⁷ Basinyisibwa ninaye. Nebutswa Yeso nababoolela, "Omuroobi shabulanga oluyali tawe halali mushialo shie shiene nende mungo mwabo." ⁵⁸ Shiyakhola amangalimwa amanji habwene yaho tawe shichila okhubula okhusubila khwabo.