¹ Khufise fienefo, omuruchi Herode yahulila amacheni okhulondokhana nende Yeso. ² Yaboolela abakholibe mbu, "Wuno niye Yohana omubatisia; asumulushe okhurula mubafu. Khulwako obunyali buno buli khumilimo muye."

³ Okhuba Herode yali niyatila Yohana, nokhumuboha nokhumura mumbohe shichila Herodia omukhasi womusiani wabo Filipo. ⁴ Okhuba Yohana yali namuboolele mbu, "Shilili lilako lilayi okhubukula ye shinga omukhasi wo tawe." ⁵ Herode yakhanyalilwe okhumwira, nebutswa yaria abandu, shichila bamulolanga shinga omuroobi.

⁶ Nebutswa olwa inyanga yokhwibulwa khwa Herode khwoola, omwana mukhana wa Herodia yenjila mumuse nashina ne nayanzisia Herode. ⁷ Mukhukalusia omukhono, yalachilisia okhubirila muyindache yeshitsubo okhumuha shilia shiosi shialanyalilwa okhusaba. ⁸ Olunyuma lwokhuboolelwa nende nyinamwana, yaboola, "Mbelesia sie hano, khulutaabo, omurwe kwa Yohana omubatisia." ⁹ Omuruchi yamala nabeelesibwa khulokhusabakhwe, nebutswa shichila khulweshitsuboshie nende khandi shichila shia balia bali ninaye khushiokhulia shiokhukolooba, yahana obuloosia mbu okhuula likholeshe. ¹⁰ Yarumana ne nakhalaka omurwe kwa Yohana mumbohe. ¹¹ Mana omurwekwe kwarerwa khulutaabo nikuhesibwa khumwana mukhana naye nayilila nyinamwana. ¹² Mana abechibe nibeetsa, bachinga omulambo, nibakuyabila. Olunyuma, batsia nibaboolela Yeso.

¹³ Bulano olwa Yeso yahulila lino, yarula habundu yaho muliaro okhutsia habundu halekhwa. Olwemikanda chiahulila lino, chiamulondakhwo khufilenje okhurula mumatookho. ¹⁴ Mana Yeso yeetsa imbeli wabo ne nalola omukanda omukhongo. Yabalolela eshibeela nahonia abalwale babo. ¹⁵ Olwa khukoloba khwola, abechi beetsa nibamuboolela, "Hano nabundu halekhwa, nafio efise fimalile okhubira. Lakhuula emikanda, kho mbu chinyalilwe okhutsia mumataala nokhwikulila efiokhulia echiene."

¹⁶ Nebutswa Yeso nababoolela, "Babulakhwo eshifune shiokhutsia tawe. Enywe bahelesie eshindu balie."

¹⁷ Nibamuboolela, "Khuli hano nende emikati chirano chionyene nende tsinyeni tsibili."

¹⁸ Yeso naboola, "Bindelele. ¹⁹ Mana Yeso nalachilisia omukanda okhwikhala hasi khubunyaasi. Yabukula emikati chirano nende tsinyeni tsibili. Nahenga ikulu mwikulu, yahaana tsikhabi natong'ola emikati nahesia abeechibe, nabo abechi nibahaana khumukanda. ²⁰ Boosi balia nibekura. Mana nibatobelesia efitonye fiali fisikale fefiokhulia- efimwelo ekhumi nende fibili fitsule. ²¹ Balia abalia bali ahambi abeshisatsa efikhumila amakhumi karano (5000), noyiniakhwo abakhasi nabaana.

²² Mulwangu lwenolo yakhola abeechi okhwinjila muliaro nokhumuranjilila okhutsia elubeka lundi olo, naye nashili nashisebulanga emikanda. ²³ Olwa yali namalile okhusebula emikanda, yatikulukha omwene natsia khushikulu okhusaya. Olwa khukolooba khwoola, yaliyo yenyene. ²⁴ Nebutswa eliaro liali ehale okhurula khuluchinga, liali lisukumwe eyi nende eyi namarunda, okhuba obushindu bwali buhutsanga okhurula ewabali bahenjile. ²⁵ Mutsisa tsine tsiomushilo Yeso yabaloleshela, nachendanga khunyanza. ²⁶ Olwa abeechi bamulola nachendanga khunyanza, banyakhana nibaboola, "Neshishieno," mana nibayula muburi.

²⁷ Nebutswa Yeso yaboola khubo mulwangu lwenolo naboola, "Be bemioyo! Nisie mwene! Mularie tawe."

²⁸ Petero yamukalusia naboola, "Omwami, kakhaba niwe, ndachilisia ekwitsile khumaatsi."

²⁹ Yeso naboola, "Yitsa." Kho Petero nasinjila narula muliaro ne nachenda khumatsi okhutsia wa Yeso yali. ³⁰ Nebutswa olwa Petero yalola obushindu obusiro, yatilwa noburii. Shinga olwa yachaaka okhwiyinikha, yayula naboola, "Omwami nunula!"

³¹ Yeso mubwangu yalunjisia omukhonokwe, namutila Petero, ne namuboolela, Ewe owobusubili obutiti, shichila shina okanakaniye?"

³² Mana olwa Yeso nende Petero batsia benjila muliaro, obushindu bwalekha okhuhutsa. ³³ Mana abeechi bali muliaro bamwinamila Yeso nibaboola. "Obwatoto buli mbu oli omwana waNyasaye."

³⁴ Olwa bali bakhambukha, boola mumukunda eKenesarate. ³⁵ Olwa abandu bahabundu bwene yaho bamumanyilisia Yeso, baruma oburume buli habundu mutsimbeka tsiabotokhanaho, nabo nibamurerela buli yesi wali omulwale. ³⁶ Bamusaya ye mbu banyalilwe tsa okhutila khwichemo lieshifwaloshie, ne shinga lobunji bwabo balitilakhwo bahona.