Omuliango 5

1 Olwa Yeso yalola emikanda, yatikulukha natsia khushikulu. 2 Olwa yali niyekhale hasi, abechibe bamwitsila. Yekula omunwakwe ne nabechesia naboolanga,

3 "Abeikhabi nibalia bali abamanani muRoho, okhuba eshiabo nobwami bwomwikulu.
4 Abeikhabi nibalia bekhuulanga, okhuba balihotselesibwa.
5 Abeikhabi nabetutuyi, okhuba bakhanyoole obulaame bweshialo.
6 Abeikhabi nibalia bahulilanga inzala nobuloho khulwobulunjishi, okhuba balitsusibwa.
7 Beikhabi nibalia beshibeela, okhuba bakhanyoole okhubelelelwa,
8 Abeikhabi nibalia bali nemioyo emieleleshe, okhuba balilola Nyasaye.
9 Abeikhabi nibalia bareranga omulembe, okhuba bakhalangwe abaana baNyasaye.
10 Abeikhabi nibalia basandibungwa khulokhukhaba obulunjishi, okhuba eshiabo nobwami bwomwikulu.

11 Abeikhabi nenywe olwa abandu bamusandia  nibaboola amakhuwa kosi amabi shibeka ninenyu akobubeyi khulokhubeela esie. 12 Ikhoye mana mutsatsahale, okhuba likhongo lienyu nomukabwa mwikulu. Okhuba munjila yino abandu basandia abaroobi bamuranjilila okhumenya.

13 "Muli omunyu  kweshialo. Nebutswa  nokukosiye eshimilenile shakwo, kunyala okhukholwa kuriena omunyu  khandi? Shikulikhwo khandi eshindu shiosi tawe halali okhusukunwa elwanyi nokhusenechilwa khufilenje fiabandu. 14 Muli obulafu bweshibala. Litookho liarechekhwa khushikulu shilinyala okhwifisa tawe. 15 Kata abandu shibabwananga itaha mana bachira hasi weshimwelo tawe, nebutswa baretsanga khushichibi, mana yaashila buli mundu wuli munzumo. 16 Leshe obulamu bwenyu bwashe imbeli wabandu munjila mbu balole efikhole fienyu efilayi nokhwitsomia Papa wenyu uli mwikulu.

17 "Mulapare mbu ndetsa okhwonona amalako nomba abaroobi tawe. Shindeetsa okhukonona  tawe, nebutswa okhukatusia. 18 Okhuba obwatoto emuboolela mbu okhuula olwa likulu nende eshialo filibira nokhubulaho, ibulaho inyukuta inditi nomba eshiasia shie inyukuta shilibiraho okhurula khumalako, okhuula olwa buli shindu shiliba shiakhosibwa khundukho. 19 Khulwako ulia ufinaka lititi okhushila khumalako kano nokhwechesia abashie bakhole bario alilangwa omutiti mubwami bwomwikulu. Nebutswa ulia wukabikha nokhukechesia alilangwa omukhongo mubwami bwomwikulu. 20 Okhuba emuboolela mbu kakhaba obulunjishi bwenyu shibulashila obulunjishi bwabahandichi bamalako nende abafarisayo tawe, shimulikhwo ne injila yosi yomulinjililamwo mubwami bwomwikulu tawe.

21 "Mwahulila liaboolwa khubo mutsinyanga tsiakhale mbu' olera tawe,' nende, ulia yesi wira alikhalachilwa eshiina.' 22 Nebutswa emuboolela mbu buli mundu usinyisibwa nomusiani wabo alikhalachilwa eshiina,' naye ulia uboolela omusiani wabo, 'Ewe omundu omukhaya wuno!' Aliyilwa imbeli womuse; naye ulia wuboola, "Eyiwe omusilu!' Aliyilwa mumulilo kwomuyalulwe. 23 Khulwako kakhaba ohananga eshihanwa shio khubwali mana witsulile mbu omusiani wenyu ali neshikha ninawe, 24 lekha eshihanwa esho imbeli wobwali, mana orule otsie. Ranjilila okalushe halala nomusiani wenyu, mana khowitse okhuhaana eshihanwa shishio. 25 Yiyamane nende omusuku wuwo mulwangu lomuba nimuli khunjila mutsitsanga mushiina, nomba omusuku wuwo oyo yetsa okhukhura mumakhono komuyaasi, naye omuyaasi akhure mumakhono komukali, mana onyalilwe okhusukunwa mumbohe. 26 Obwatoto emuboolela  mbu, sholinyalilwakhwo okhurula elwanyi tawe, okhuula loliba norunjile okhuula khwing'ondo liokhumalilikha liakhubanzanga.

27 "Mwahulila liaboolwa mbu, 'Olaheyanga tawe,' 28 Nebutswa emuboolela  mbu, buli mundu uenga khumukhasi nokhumumilila amare, amalile khale okhuheya ninaye mumwoyokwe. 29 Kakhaba imoni yo yomukhono musatsa yikhukhola wikumule, yitsomolemwo nokhuchisukuna yikhurulekhwo. Okhuba nobulayi khuyiwe mbu omusanji wuwo mulala akore okhushila omubili kwo kwosi kusukunwe muyalulwe. 30 Kakhaba omukhonokwo omusatsa kunyala okhuchila wikumule, kukhalacheyo mana osukune kukhurulekhwo. Okhuba nobulayi khulwa omusanjiwo mulala okhukora okhushila omubili kwo kwosi okhutsia muyalulwe. 31 Khandi liali liaboolwa, 'Wulia wulonda omukhasiwe, okhuula amuhelesie eshimanyisio shiokhulekhana.' 32 Nebutswa emuboolela  mbu buli mulala yesi wulekhana nomukhasiwe, kalali okhunyolekha nomwima kwobuheyi, limukasinjia okhuba omuheyi. Wulia yesi wumuyila ye olunyuma lwokhulekhana nende omusatsawe akholanga obuheyi.

33 Khandi mwahulila liaboolwa khubalia betsinyanga tsiakhale, 'Oletsuba mutsimbaka tsikhaya tawe, nebutswa okhwitsubakhwo khube muMwami. 34 Nebutswa emuboolela nywe, muletsubekhwo kata tawe, kata okhubirila mwikulu tawe okhuba nashio eshifumbi shioburuchi shia Nyasaye; 35 nomba eshialo tawe, okhuba nashio neshitseni shiebilenjefie; nomba nende Yerusalemu tawe, okhu nelitookho liomuruchi omukhongo okhushila. 36 Kata okhwitsuba nomurwekwo tawe, okhuba shonyala okhukasiakhwo lisui elala lilafu nomba limali tawe. 37 Nebutswa leshe obubooli bwenyu bube 'Hee, Hee; noho 'Tawe tawe.' Eshindu shiosi okhubira shino nishiokhurula khumubi ulia.

38 Mwahulila mbu liabolwa, 'Imoni khumoni, nalo elino khulino; 39 Nebutswa emboola khunywe, mbu mulekalila wulia wamabi tawe, Halali, wulia yesi wukhusamula khundamayo yisatsa, mukalukhasilie eyindi eyo khandi. 40 Kakhaba mulala yesi alola akhurerele omuse mana abukule lishati lilio, lekha omundu mwenoyo abukule omukabuti khandi. 41 Wulia yesi wukhulunyilisia okhutsia ninaye emaili ndala, tsia ninaye tsibili. 42 Helesia mulala yesi wukhureba yiwe, nekhandi oleshebukhakhwo okhuula khumulala yesi ouli nelienya liokhukopa okhurula khuyiwe tawe.

43 "Mwahulila liabolwa mbu, 'Mukhoyele okhuheela abarende benyu nokhusila abasuku benyu; 44 Nebutswa ebaboolela  mbu, heele abasuku benyu nokhusayila balia bamusandinjia, 45 kho mbu munyalilwe okhuba abaana baPapa wenyu wuli mwikulu. Okhuba akholanga eliuba okhurula khubalia ababi nende abalayi, nokhukwisia ifula  khubobwatieli nende balali bobwatieli tawe. 46 Okhuba kakhaba muheela tsa balia bamuheela, nimukabwa shina kwomwitsa okhunyoola? 47 Kakhaba oshiesia abaana benyu bonyene, ninshiina shiokholangakhwo okhushila abandi? Abamahanga bosi shibakholanga efindu fingananga firio? 48 Khulwako kenyekhanga mube abalayi okhushila shinga lwaPapa wenyu womwikulu ali.