¹ Bulano olwabwashia, abakhulundu bosi babakuhani nende abasakhulu babandu bakuta ikute yokhumura mwifwa. ² Bamuboha, nokhumuyila, nokhumuhaana khu kafuna Pilato.

³ Mana olwa Yuda, owali namukhobile yalola mbu Yeso wakhakhalachilwa eshiina, yekanila ne nakalusilia abakhulundu babesalisi efitonye amakhumi kataru kefetsa, ⁴ nokhuboola, "Ndonoonile khulokhukhoba amatsayi kabula eshikha," Nebutswa nibaboola, "Elienelo nishina khwifwe? Lilole khwiwe omwene." ⁵ Mana nasukuna hasi efitonye fietsifetsa tsienetso mwitembeli, ne narulaho nokhutsia elwanyi nokhwimika omwene. ⁶ Abakhulundu babesalisi babukula efitonye fietsifetsa efo nibaboola, 'Shinobulayi okhura kano mwibishilo tawe shichila nobukusi bwamatsayi." ⁷ Bachelanila amakhuwa kano halala, mana bakula eshikuri shiabalonji namang'ondo kene yako omwa nabayabilenje abandu abacheni. ⁸ Khulweshifune shieneshino eshikuri shienesho shishilangungwa "Eshikuri shiamatsayi" okhuula lwa lelo. ⁹ Mana lilia liali liaboolwa nende omuroobi Yeremia niliusibwa, liboolanga, "Babukula efitonye amakhumi kataru keifetsa, obukusi bwarelwa khuye nabaana ba Israeli, ¹⁰ Nokhubuhaana khulwa eshikuri shiabalonji, shinga lwa Omwami yamanyisia."

¹¹ Bulano Yeso yasinjila imbeli wa Kafuna, naye kafuna namureeba, "Niwe omuruchi wabaYahudi?" Yeso namukalusia, "Oboola orio."

¹² Nebutswa olwa Yeso  yarelwakhwo omuse nende abakhulundu babesaaliisi nabasakhulu, shiyakalusia eshindu tawe. ¹³ Mana Pilato namuboolela, "Shohulilangakhwo efindu efinji fia bakhuretsangakhwo omuse tawe?" ¹⁴ Nebutswa shiyakalusiakhwo likhuwa kata elala tawe, kho mbu kata kafuna yachenyesibwa. ¹⁵ Bulano kwali omwima mbu buli hamulukha kafuna alekhuule omubohe mulala owahulwe nende omukanda. ¹⁶ Hafise fienefo, bali nende omubohe wokhunyasia welira mbu Yeso Baraba. ¹⁷ Kho bali bekhung'asiye halala, Pilato nabareeba, "Niwina womwenyanga emulakhuulile? Baraba, nomba Yeso ohulangungwa Kristo?" ¹⁸ Yamanya mbu bali bamuhanile Yeso khuye khulokhubela imbalikha.

¹⁹ Nashikhaalenje khushifumbi shiobukhalachi bweshiina, omukhasiwe yamurumila likhuwa khuye namuboolela, "Olabakhwo neshindu shioosi khumundu ulali neshikha oyo tawe. Okhuba enyakhaane okhushila mubunji bweyinga okhurulana nende amaloro kembele ninako okhulondikhana ninaye."

²⁰ Bulano abakhulundu babesaaliisi nende abasakhulu balunyilisia omukanda okhureeba Baraba nokhwononia Yeso. ²¹ Kafuna nabareeba, "Niwina khubabili bano womwenyanga emulakhuulile?" Nibaboola, "Baraba."

²² Pilato nabareeba, "Nishiina shienyala okhukhola nende Yeso wulangungwa Kristo?" Boosi bakalusia, "Mubambe."

²³ Mana nabareeba, Shichilashi, akholile shiina eshibi?" Nebutswa bayula kata ikulukhwo," Mubambe."

²⁴ Kho olwa Pilato yalola mbu shanyoolakhwo obukhala bwosi tawe, nebutswa bukhala bwenobo indiri yali yanzanga, yabukula amatsi, niyosia amakhonoke imbeli womukanda, ne naboola, "Eumakhwo nende liemanyile namatsaayi komundu wuno tawe. Emuleshele abeene."

²⁵ Abandu boosi baboola, "Lekha amatsaayike kabe khwifwe nende abaana beefu." ²⁶ Mana nabalakhuulila Baraba, nebutswa nasharula Yeso nokhumuhaana khulokhubambwa.

²⁷ Mana abasikari bakafuna babukula Yeso nibamuyila wabamahe bekhalanga mana abamahe betsimbia tsiosi nibamubotokhana. ²⁸ Bamufwalula tsingubotsie nokhumufwala ingubo irambi inzayi. ²⁹ Nibakasia ingara yamawa nokhumufwala khumurwe, nokhumura ilabushi mumukhonokwe omusaatsa. Bamukhupila amasikamo nokhumumanyisia eshihenyehenye, Baboolanga, "Emilembe, Omuruchi wabaYahudi!" ³⁰ Bamufutsakhwo, nibabukula elabushi nokhumutuya khumurwe bakalushila. ³¹ Libalii nibakhamutseshelela, bamufwalula ingubo irambi eyo nimurulakhwo nokhumukalusiakhwo tsingubotsie, nibamwimisia okhutsia okhumubamba.

³² Olwa barula elwanyi, banyoola omundu walangwa mbu Simioni okhurula Kairene, owabalunyilisia okhutsia ninabo kho mbu anyalilwe okhuchinga omusalabakwe. ³³ Betsa boola hamundu halangwa mbu Kolikotsa, hamanyinjia mbu, "Habundu weshihanga." ³⁴ Bamuhelesia efini yitsukasibwemwo efindu efilulu. Nebutsa olwa yatsaamakhwo, shiyakhanyalilwe okhunywa tawe. ³⁵ Olwabali bamubambile, bakabana tsingubotsie okhubirila okhukhola obwauli, ³⁶ Nibekhala nokhumulinda. ³⁷ Hekulu womurwekwe baraho eshimanyisio eshiebaalanga eshifune shichilile  bamubamba eshiasomanga, "Wuno niye Yeso, omuruchi wabaYahudi." ³⁸ Abanuuli babili babambwa ninaye, mulala khumukhono musaatsa naye mulala wundi khumukhono mukhasi. ³⁹ Balia babiranga ahambi bamunyekanga, basungusa emirwe chiabo ⁴⁰ nibaboola, "Eyiwe wali notsitsanga okhusasia litembeli nokhuliumbakha mutsinyanga tsitaru, yinunule! Kakhaba oli omwana waNyasaye, yikha okhurula khumusalaba!"

⁴¹ Mumelo yeneyo abakhulundu babesaaliisi bamutseshelelanga, halala nende abahandichi bamalako nabasakhulu nibaboola, ⁴² "Yahonia abandi, nebutswa shanyala okhwihonia omwene tawe. Nomuruchi wabaIsraeli. Leshe yeshe okhurula khumusalaba, ne mana khulanyala okhumusuubila. ⁴³ Asuubilanga muNyasaye, lekha bulano Nyasaye amununule, kakhaba Nyasaye aleyamana nokhumuyinia. Okhuba kata kario yaboola, 'Endi omwana waNyasaye."' ⁴⁴ Munjila yeneyo abanuuli bali babambilwe halala ninaye khandi bamunyeka.

⁴⁵ Bulano okhurula khufise fiakhasasaba eshilima shialaala eshialo shioosi okhuula mufise fiashienda. ⁴⁶ Efise fiashienda fili ahambi okhutukha, Yeso yayula nomwoyo omukhongo nareeba, "Eloyi, Eloyi lama sabachitsani?" Limanyinjia mbu, "Nyasaye wanje Nyasaye wanje, shichila shina wunzibale?"

⁴⁷ Olwa balia bali basinjile ahambi yaho balihulila, baboola, "Alanganga Eliya."

⁴⁸ Habwene nahabwene mulala wabo yelukha nabukula eshihangwe, nashitsusia nefiini firaanyile, nafira khulabushi yelikata, namuhesia  okhufinywa. ⁴⁹ Abandi bali batoonyile mubo, baboola, "Muleshe abe yenyene. Leshe khulole kakhaba Eliya aleetsa okhumuhonia." ⁵⁰ Mana Yeso niyayula khandi nomwoyo omukhongo nahaana omwoyokwe.

⁵¹ Lole, olubaala lwomwitembeli lwakabukhanamwo khabili okhurula ikulu okhuula hasi, nasho eshialo nishiiyuya, natsio tsinyanda nitsiabukhamwo elubeka. ⁵² Efilindwa fiekukha. Nachio emibili chiabandu bali bafwa bali abaholo chiasulumusibwa. ⁵³ Chietsa elwanyi okhurula mufilindwa olunyuma lwokhusulumukhakhwe, benjila mwitookho liholo, nibaloleshela abanji. ⁵⁴ Bulano olwa omukhongo wasinjlilanga abelihe nende balia belolelanga Yeso balola omurengo kweshialo nende efindu fiali fikholeshe, bamala baba noburii okhushila ne nibaboola, "Obwatoto buli wuno yali omwana waNyasaye." ⁵⁵ Abakhasi abanji bali balondile khuYeso okhurula eGalilaya okhumukhoonya ameenya ke baliho belolelanga okhurula ehale. ⁵⁶ Mubo yalimwo Maria Magadalena, Maria nyinamwana Yakobo nende Yusufu, nende nyinamwana abaana ba Zebedayo.

⁵⁷ Olwa khukolooba khwola, khwaliho nomundu omuyinda okhurula Arimatseya, owalangwa Yusufu, owali khandi omwechi waYeso. ⁵⁸ Yatsila Pilato nokhumureeba abukule omubili kwaYeso. Mana Pilato nahaana omunwa mbu kuhaanwe khuye. ⁵⁹ Yusufu yabukula omubili, nakuniatsa mungubo yindafu, ⁶⁰ mana nakwalisia mushilindwashie omwene eshiayali yayaba mulwanda. Mana nakolongomia lichina likhongo liyeekha khumuliango kweshilindwa ne narulaho natsia. ⁶¹ Maria Magadalena nende Maria wundi wulia baliho, bekhale handulo weshilindwa.

⁶² Inyanga yalondakhwo, yali inyanga yalondanga obwirecheshi, abakhulundu babesaaliisi nende abaFarisayo bali bakhung'anile halala nende Pilato. ⁶³ Baboola, "Omukali, khwitsulilanga mbu olwa omubeyi oyo yali nashili omulamu, yaboola, 'Olunyuma lwetsinyanga tsitaru ndalasumulukha khandi.' ⁶⁴ Khulwako lachilisia mbu eshilindwa shibe nobulindi okhula khunyanga yakhataru, kalali kario tawe abeechibe banyala okhwitsa nokhumwiba mana baboole khubandu mbu, 'Husumulushe okhurula mubafu,' nabwo obukati bwokhumalilikha bulabakhwo obubi okhushila bwokhuranga."

⁶⁵ Pilato nababoolela, 'Bukule omuliindi. Tsie mana mushihe obuliindi obulayi shinga mumanyile." ⁶⁶ Kho batsia bakhola eshilindwa okhulindwa obulayi, babalikha lichina nokhuraho omuliindi.