¹ Kamala kekholekha mbu olwa Yeso yali namalile amakhuwa kano koosi, yaboolela abeechibe, ² Mumanyile mbu olunyuma lwetsinyanga tsibili, ipasaka iletsanga, naye omwana womundu alahanwa abambwe."

³ Mana abakhulundu babesalisi nabasakhulu bali bakhunga'niile halala munzu yomukhulundu wabesalisi, weliralie yalangwa mbu Kayafa. ⁴ Basanjilana halala okhumutila Yeso mumasilisi nokhumwira ye. ⁵ Okhuba bali baboolanga, "khulamutila khunyanga yeshiselelo tawe, kho mbu omukoyano mubandu kuleshe okhubukha."

⁶ Bulano olwa Yeso yali nali Betsania munzu ya Simioni wali omuchele, ⁷ shinga olwa yali nayeshele hamesa, omukhasi yeetsa nachinjile inyungu indai okhushila yamafura keshing'ari kobukusi, naye nakatsukha khumurwekwe. ⁸ Nebutswa olwa abeechibe balola lino, basinyikha po nibaboola, "Obusasibwi buno buli nende shifune shina? ⁹ Kano kakhakusibwe khumang'ondo amanji mana kahebwe abamanani," ¹⁰ Nebutswa Yeso namanyilenje lino, yababoolela, "Shichila shina mulelelanga omukhasi wuno omunyakhano? Okhuba wukholeele sie eshindu eshilayi. ¹¹ Mubetsanga nende abamanani buli lwoosi, nebutswa shimwakhabe ninasi buli lwoosi tawe. ¹² Okhuba olwatsushile amafura khumubili kwanje, akholile ario khulwobuyabisi bwanje. ¹³ Obwatoto emuboolela nywe, buli habundu welikhuwa lilayi lino liliyalwa mushialo shioosi, eshiomukhasi wuno akholile lioosi liakhaboolwekhwo khulwokhumwitsulila."

¹⁴ Mana mulala khubalia ekhumi nende babili, owalangwa mbu Yuda Eskarioti, yamutsila omukhulundu wabasaliisi ¹⁵ naboola, "Nishina shiomunyalilwa okhuumba sie enyalilwe okhumuhana ye khwinywe?" Bamuchelela efipande amakhumi kataru. ¹⁶ Okhurula efise fienefo yakhaba obwiyangu bwokhumutila nokhumuhana khubo.

¹⁷ Bulano khunyanga yambeli yomukatii kubulamwo limela, abeechi bamwitsila Yeso nibamuboolela, "Nihena wowenyanga khukhurecheshele olile eshiokhulia shiepasaka yo?"

¹⁸ Naboola, "Tsie mwinjile mwitookho khumundu wundi mana mumubolele, 'Omwechesia aboolanga, "Efise fianje fiulile. Nditsa okhura epasaka yanje nende abeechi banje munzuyo."'" ¹⁹ Abeechi bakhola shinga olwa Yeso yali nabalachilisiye okhukhola, mana nibarechekha shiokhulia shiepasaka.

²⁰ Olwa khukoloba khwoola, ye halala nende abeechibe ekhumi nende babili bekhala hasi okhulia. ²¹ Shinga bali balitsanga, naboola, "Obwatoto emuboolela nywe mbu mulala wenyu alakhoba sie."

²² Bamala babelela po, naye buli mulala wabo niyanza okhumureba ye, "Obwatoto shinisie tawe, Omwami?"

²³ Yakalusia, "Oyo winanga omukhonokwe mulutaabo niye wiitsa okhukhoba sie. ²⁴ Omwana womundu alatsia, shinga tsa liahandikwa okhutsiana ninaye, Nebutswa wuwi khumundu oyo womwana womundu alikhobwa shichila ye! Bwakhabeele obulayi khumundu oyo yakhabeele shiyayebulwa tawe."

²⁵ Yuda, wamukhoba namuboolela, "Nisie Omwechesia?" Namuboolela, "Ewe omwene oliboolile."

²⁶ Shinga olwa bali balitsaanga, Yeso yabukula omukaati, nakuha tsikhabi ne nakutonyola. Nahelesia abechibe naboola, "Bukule mulie. Kuno nomubili kwanje." ²⁷ Yabukula eshikombe nashiha tsikhabi, ne nabahelesia naboola, "munywe mwesi. ²⁸ Okhuba kano namatsayi kanje kasundukha khubanji khulokhubelwa obwononi. ²⁹ Nebutswa emboola khwinywe, shindakhanyalilwe khandi okhunywa eshiamo shiomusabibu kuno tawe, okhuula inyanga eyo olwa ndilinywa injeni halala ninenyu mubwami bwa Papa wanje."

³⁰ Olwa bali bakhemba olung'unyo, barula nibatsia khushikulu shia misaituni. ³¹ Mana Yeso nababoolela bo, "Enywe mwesi eshilo shia lelo mwitsa okhukwa nokhwilukha shichila sie, okhuba liahandikwa, 'Nditsa okhunywekha omwayi nalio lituli liamakondi lilanyalilwa okhusalana.'

³² Nebutswa olunyuma lwokhusulumusibwa, nditsa okhwimila imbeli wenyu okhutsia eGalilaya."

³³ Nebutswa Petero namuboolela, "Kata kakhaba boosi balakhulekha khulokhubeela yiwe, Esie shindalanyalilwakhwo okhukhulekha tawe."

³⁴ Yeso namuboolela, "obwatoto ekhuboolela yiwe mbu, eshilo shia lelo, etayiwa nishili okhukholiokha olanzikana amakhabi kataru."

³⁵ Petero namuboolela, "Kata kakhaba nokhufwa okhuula efwe ninawe, shindalakhwikanakhwo tawe." Abeechi bandi boosi baboola eshindu shilala shienesho.

³⁶ Mana Yeso natsia ninabo habundu halangwa mbu Ketisimane naye naboolela abeechi be, "Ikhale hano lemba nenzia halia okhusaya." ³⁷ Yabukula Petero nabasiani ba Zebedayo babili natsia ninabo naba wokhwibelelela nokhunyakhana. ³⁸ Mana nababoolela, "Omwoyo kwanje kubelele okhushila, kata okhutukha khukhufwa. Tonye hano mube meso nende sie." ³⁹ Yatsia ehale khwo, nakwa hasi khubwenibwe nasaya, Naboola, "Papa wanje, kakhaba kanyalikha, lekha eshikombe shino shimbirekhwo. Shikali khulienya lianje tawe, nebutswa shinga olwa wenya. ⁴⁰ Yetsa wabeechi bali nabanyoola bakonanga, mana naboolela Petero, "Nishina, shionyala okhuhenga ninasi khusa ndala tawe? ⁴¹ Henga mana osaye mbu olenyoola mumatemo tawe. Omwoyo kwenyanga, nebutswa omubili nomuteshele." ⁴² Yatsia narulaho lwakhabili nasaya. Naboola, "Papa wanje, kakhaba lino shilinyala okhubila tawe mbu okhuula ekanywe, elienya lio linyalilwe okhwikholekha." ⁴³ Yetsa khandi nabanyoola bakonanga, okhu tsimoni tsiabo tsiali tsisitohe. ⁴⁴ Kho nabalekhanga khandi, yatsia narulaho nasaya lwakhataru, naboolanga amakhuwa malala kene yako. ⁴⁵ Mana Yeso niyeetsa wabeechi bali mana nabareba, "Mushili mukonanga mubukula obuhulushi bwenyu? Henje, efise fiulile, naye omwana womundu alakhobungwa mumikhono chiabononi. ⁴⁶ Buushe, chende khutsie. Henje, wulia wukhobanga sie ali ahambi."

⁴⁷ Olwa yali nashiboolanga, Yuda mulala khwekhumi nababili, yetsa. Omukanda omukhongo okhurula khubakhulundu babakuhani nabasakhulu babandu beetsa ninaye. Beetsa netsinganga nende efikong'o. ⁴⁸ Bulano omusatsa wali natsitsanga okhukhoba Yeso yali nabahele eshilolelo, naboolanga, Wulia wenditsa okhutsunzuna naye omwene. Mukwekhu ye." ⁴⁹ Mulwangu lwenolo yeetsa nautushila Yeso mana naboola, "Emilembe omwechesia!" Mana namutsunzuna.

⁵⁰ Yeso namuboolela, "Omulina, kholaa likhulelile okhukhola." Mana nibeetsa, nibara ebikhono khuYeso, mana nibamutila. ⁵¹ Mubwangu bwenobo, mulala khubali nende Yeso yanyiila omukhonokwe, natsomola olukanga lwe, nakhalaka eshirwi shiomukholi womukhulundu wabakuhani, nokhushirusiayo. ⁵² Mana Yeso namuboolela, "Ra olukangalwo habundu walwo, okhuba balia boosi babukulanga olukanga balinyalilwa okhumululwa khulukanga. ⁵³ Oparanga mbu shindakhanyalile okhulanjilila khuPapa wanje, naye yakharumile abamalaika amakhongo ekhumi nababili tawe? ⁵⁴ Nebutswa amahandiko kakhosibwe kariena mbu okhula lino likholeshe?" ⁵⁵ Efise fienefo Yeso nareeba omukanda, "Murulile ne tsinganganga nende efikong'o okhundiila shingana omunuuli? Buli nyanga ndekhalanga okhwechesia mulitembeli, obulandiila tawe. ⁵⁶ Nebutswa kano koosi kekholeshe kho mbu amahandiko kabaroobi kanyalilwe okhuusibwa." Mana abeechi boosi nibamulekha nibelukha.

⁵⁷ Balia bali nibamuhambile Yeso bamuyila ewaKayafa omukuhani omukhongo ewa abahandichi nende abakhulundu bali nibekhung'asiye halala. ⁵⁸ Petero yalondakhwo Yeso hanyuma okhutsia halwanyi ewabakhundu babakuhani wobuyaasi bwekholeshelanga. Yatsia mukari niyekhala hasi halala nende abakhongo okhulola akali kenyanga okhurulila. ⁵⁹ Bulano abakuhani abakhongo halala nende omuse kwoosi bali nibakhabanga obuloli bwoosi obwobubeyi okhumukiya kachile bamure mulifwa. ⁶⁰ Shibanyoolakhwo lioosi lioosi tawe, kata nikakhaba abakobosheli bobubeyi berusia. ⁶¹ Mana nibaboola, "Omundu wuno yaboola, 'Enyala okhusasia litembeli lia Nyasaye mana eliumbashe khandi khutsinyanga tsitaru."'

⁶² Omukuhani omukhongo yasinjila mana namureeba, "Obulakhwo likalusio? Nishina eshiabakoboshelanga shibeka ninawe?" ⁶³ Nebutswa Yeso yaholela. Omukuhani omukhongo yamuboolela, "Ekhulachilisia khulwa Nyasaye oumenyanga, khuboolele nikakhaba oli Kristo, omwana wa Nyasaye."

⁶⁴ Yeso namukalusia namuboolela mbu, "Omalile okhuliboola yiwe mwene. Nebutswa ekhuboolela, okhuchaaka bulano okhutsililila nolole omwana womundu niyekhale khumukhono musatsa okwobunyali, niyekhanga okhurula ikulu mumaleesi."

⁶⁵ Mana omukuhani omukhongo yarandula tsingubo tsitsie ne naboola, "Wuboolile obuchaayi! Shichila shina khushienyanga abakobosheli? Henje, mwakhahulila obuchaayi. ⁶⁶ Shina shiomuparanga?" Bakalusia nibaboola, "Akhoyele lifwa." ⁶⁷ Mana nibafutsa mumonimwe nende okhumukhupa efifuusi, nabandi khubo nibamusaamula ⁶⁸ khandi nibamuboolela, "Eyiwe Kristo khuroobele. Niwina wukhupile?"

⁶⁹ Bulaano Petero yali yekhale mulwanyi lwobuyasii, naye omukhalabani weshikhana niyetsa khuye khandi naboola, "Wesi khandi wali nende Yeso weGalilaya."

⁷⁰ Nebutswa yekana imbeli wabo boosi nende okhuboola mbu, "Shemanyile eshiamuboolangakhwo tawe."

⁷¹ Olwa yatsia elwanyi khushilibwa, omukhalabani wundi weshikhana yamulola khandi naboolela balia abaliho, "Omundu wuno khandi abeele nende Yeso waNasareti."

⁷² Khandi niyekana nende eshitsubo," Shemanyile omundu yo tawe!"

⁷³ Olunyuma lwefise fititi okhubila, balia abali nibasinjiile halubeka betsa nibaboolela Petero, "Obulamba wesi khandi oli mulala khubo, okhuba injila yoboolelangamwo yimanyinjia."

⁷⁴ Mana niyanza okhulaama nokhwitsuba, "Omundu yo shemumanyile tawe," habwene nahabwene itaywa nikholiokha.

⁷⁵ Petero niyetsulila kalia akaYeso yali naboolile, "Itaywa niyishili okhukholiokha niwunzikane amakhabi kataru." Mana natsia elwanyi mana nalila obululu po.