¹ "Mana obwami bwomwikulu buliba shinga abakhaana abashisila ekhumi babukula tsitaha tsiabo batsia okhubukanila omusiani weshiselelo. ² Barano khubo bali abasilu nabandi barano bali abasitse. ³ Okhuba olwabashisila abasilu babukula tsitaha tsiabo, shibatsiakhwo namafura koosi mutsitaha tsiabo tawe. ⁴ Nebutswa abashisila abasitse babukula tsindabu tsiamafura nibatsia ninatsio halala netsitaha tsiabo. ⁵ Bulano lwomusiani weshiselelo yashinda okhuula, boosi banza okhurenjetsa nibakona. ⁶ Nebutswa hakarikari weshilo khwaliho nokhwayula, 'Henje, omusiani weshiselelo! Rule elwanyi mumubukanile.'

⁷ Mana abashisila balia boosi nibabuukha nokhurechekha tsitaha tsiabo khulokhutsiashia. ⁸ Abasilu bamala baboolela abasitse, 'khuwekhwo amafura kenyu matiti shichila tsitaha tsiefu tsisimanga.'

⁹ "Nebutswa abasitse babakalusia nibababoolela, 'Okhuba shikalakhuhela kata fwesi tawe, bukhala bwenobo tsie khubakusinjia mwikulile khulwa nywe beene.' ¹⁰ Olwa bali barulile batsile okhukula, omusiani weshiselelo yetsa, nabo balia bali niberecheshe batsia ninaye mushiokhulia shiokhuteshania, nakwo omuliango nikwikalwa.

¹¹ "Olunyuma  abashisila bandi yabo betsa khandi nibaboola, Omukhulundu, Omukhulundu khwikulile nefu.'

¹² Nebutswa yabakalusia nababoolela, 'Obwatoto emuboolela  mbu, shemumanyilekhwo tawe.' ¹³ Khulwako be meso, okhuba shimumanyilekhwo inyanga nomba efise tawe.

¹⁴ Okhuba kali shinga omundu yali ahambi okhutsia mushibala shindi. Yalanga abakhalabani be omwene ne nabara okhusinjilila emianduchie. ¹⁵ Khu mulala yamuha tsitinari tsirano, khuhundi yamuha tsibili, naye ohundi namuhelesia itinari ndala. Buli mulala yanyoolanga okhulondokhana nende obunyali bwe omwene, naye omundu oyo natsia khuluchendolwe. ¹⁶ Wulia wanyoola tsitinari tsirano yarulaho lwangu nahenga okhukhola obukhala ne nanyoola tsitinari tsindi tsirano okhumeta khu tsiyali nahebwe. ¹⁷ Munjila yeneyo, wulia wali nanyoolile tsitinari tsibili yanyoola obukhala bwetsindi tsibili. ¹⁸ Nebutswa omukhalabani wali nanyoolile itinari ndala yarulaho natsia khululwe, nayaba elina hasi, nafisaho amang'ondo komukhulunduwe kano. ¹⁹ Bulano olunyuma lwoluhoono olurambi omukhulundu wabakhalabani yabo yakalukha nakhola obubali ninabo. ²⁰ Omukhalabani wali nanyoolile tsitinari tsirano yetsa narera etsindi tsirano. Yaboola, 'Omwami, wamba esinjilile nende tsitinari tsirano. Lola, engasiye obukhala bwetsindi tsirano ikulu watsio,' ²¹ "Omukhulunduwe namuboolela, 'Obulayi okhushila, omukhalabani omulayi khandi omusubilwa! Obeele omusubilwa khufindu fititi. Ndalakhura okhusinjilila efindu efikhongo. Injila mumwikhoyo kwomukhulunduwo,' ²² "Omukhalabani wali nanyoolile tsitinari tsibili yetsa naboola, 'Omukhulundu wambelesia tsitinari tsibili. Lola, enyoolile obukhala bwetsitinari tsindi tsibili okhumetakhwo.'

²³ Omukhyulunduwe yamuboolela, 'Obulayi okhushila, omukhalabani omulayi khandi omusubilwa! Obeele omusubilwa khufindu efititi. Ndalakhura osinjilile efindu efinji. Injila mumwikhoyo kwomukhulunduwo.'

²⁴ "Mana omukhalabani wali nanyoolile etinari ndala yetsa naboola, 'Omukhulundu, ndamanya mbu oli omundu omuumu. Ochesanga owolamitsile tawe, khandi ofinanga owolasalasiye tawe. ²⁵ Ndaria, kho ndarula nenzia nembisa etinari yiyo hasi mwiloba. Lola bukula shino shili eshishio.'

²⁶ Nebutswa omukhulunduwe yamukalusia namuboolela, 'Eyiwe omukhalabani omwoni mana omutofu, wamanya mbu ndiyanga welamitsile tawe nokhufuna welasalasiye tawe. ²⁷ Khulwako wakhahanile amang'ondo kanje mumabishilo, ne mukhwitsa khwanje ndakhanyalilwe okhunyoola khulokhukalusilibwa kali akanje nobukhala. ²⁸ Khulwako munuule etinari okhurula khuye mana muhelesie wulia uli netsitinari ekhumi. ²⁹ Okhuba wulia yesi uli ninafio mubunji alahebwa, naye alaba ninafio mubunji. Nebutswa okhurula khu ulia oubulakhwo eshindu shiosi tawe, kata shilia shiaba nali ninashio shilabukulwayo. ³⁰ Sukuna omukhalabani omukhaya wuno elwanyi mushilima, ewa khuliba nende okhwikhuula nokhusia khwameno.'

³¹ "Olwa omwana womundu yetsa muluyalilwe halala nabamalaika bebe, mana yekhale khushifumbi shishie shioluyali. ³² Efibala fioosi fiakhakhung'aane imbeliwe, naye yakhaukhasie omundu okhurula khuhundi, shinga nolwa omwayi yaukhasinjia amakondi okhurula mutsimbusi. ³³ Yakhare amakondi khumukhonokwe omusatsa, nebutswa tsimbusi khumukhono omukhasikwe. ³⁴ Mana omuruchi naboole khubomukhono musatsa, 'Yitse, enywe baheelwe ikhabi nende Papa wanje, nyoole obulaame bwobwami bwarecheshelwa nywe okhurula okhurelwaho amasiinji kweshialo. ³⁵ Okhuba ndali inzala mana mumbesia shiokhulia; Ndali nobuloho nimumbesia shiokhunywa; ³⁶ Ndali eshiekenyi nimufwala sie; Ndali omulwale nimuninda; Ndali mumbohe nimunzitsila.'

³⁷ Mana abalunjishi balikalusia nokhuboola, 'Omwami, nelina lwakhwakhulola noli inzala nikhukhulisia? Nomba noli nende obuloho nikhukhuhesia shiokhunywa? ³⁸ Nilina lwakhwakhulola okhuba omundu omucheni nikhukhwinjisia? Nomba noli eshiekenye nikhukhufwala? ³⁹ Nilina lwakhwakhulola omulwale noho noli mumbohe nikhukhwitsila?

⁴⁰ "Mana omuruchi alibakalusia nokhubaboolela bo mbu, 'Obwatoto emuboolela nywe mbu, akamwamukholela ulia wali wahasi khubana befu bano, mwakholanga khwisie.' ⁴¹ Mana aliboola khubalia bali khumukhonokwe omukhasi, 'Rulekhwo enywe balamwa, mutsie mumulilo kweyinziayo kwamala okhurecheshelwa omusuku nabamalaika be, ⁴² Okhuba ndali inzala shimwahambakhwo shiokhulia tawe; ndali nobuloho nebutswa shimwahambakhwo shiokhunywa tawe; ⁴³ Ndali omucheni nebutswa shimwayinzishisia tawe; ndali eshiekenye nebutswa shimwayafwala tawe; omulwale nende okhuba mumbohe, nebutswa shimwayangonya tawe.'

⁴⁴ "Mana balikalusia nokhuboola, 'Omwami, niliina lwakhwakhulola noli inzala nomba nobuloho, nomba omucheni nomba eshiekenye nomba omulwale nomba mumbohe mana khulekha okhukhurumishila?'

⁴⁵ Mana alibakalusia nokhubaboolela, 'Obwatoto emuboolela nywe mbu, shilia shiomwalekha okhumukholela mulala wahasi khubano, shimwayakholela sie tawe.' ⁴⁶ Bano balitsia mushinyasio shieyinziayo, nebutswa abalunjishi mubulamu bulawayo tawe."