¹ Yeso yarula elwanyi welitembeli naye yali natsitsanga khunjila ye. Abechibe bamwitsila okhumumanyia amombakho kelitembeli. ² Nebutwsa yabakalusia khulokhubaboolela mbu, "Shimulolanga efindu fino fioosi tawe? Obwatoto emuboolela, lichina kata elala shiliakhalekhwekhwo khulindi elilanyalilwa okhukwisibwa hasi tawe."

³ Shinga olwa yali yekhaale khushikulu shiemiseyituni, abeechi bamwitsila mumasilisi nibaboola, "Khuboolele, efindu fino filikholekha lina?" Shilolelo shina shilimanyia okhwitsa khukhwo nende obumalilishilo bweyindukho?"

⁴ Yeso yabakalusia nababoolela, be meso mbu abuleho mulala yesi amwimilile nywe okhurula khunjila. ⁵ Okhuba abanji bakhetse mulira lianje. Bakhanyalilwe okhuboola, 'Nesie Kristo,' nabo bakhemilile abanji okhutsia elubeka. ⁶ Mulihulila okhulondokhana nende amahe. Lole mbu muleshe okhunyasibwa, okhuba efindu fino okhuula fikholeshe; nebutswa induukho yishili okhuula. ⁷ Okhuba buli eshibala shilibukha shibeka neshibala shindi, nabwo obwami shibeka nobwami buundi. Khulibaho neyinzala nokhutechela khweshialo mutsimbali tsiahukhane. ⁸ Nebutswa efindu fino fioosi nokhwanza khwokhulumwa khweyinzibulo. ⁹ Mana balamuhananywe muminyakhano nokhumwira. Mwakhasilwe nefibala fiosi khulokhubeela elira lianje. ¹⁰ Mana abanji balekumula, nokhukhobana okhusilana halala nende okhusilana mulala khuhundi. ¹¹ Abaroobi bobubeyi balebukha nokhurusia abanji khunjila. ¹² Shichila obufinachi bwamalako bulametekha, obuheeli bwabanji bwitsa okhunyira. ¹³ Nebutswa wulia wulefwila okhuula khundukho alahonibwa. ¹⁴ Amacheni amalayi kano kobwami bwomwikulu kalanyalilwa okhuyalwa mushialo shioosi shinga nobukobosheli khufialo fioosi. Mana induukho inyalilwe okhwiitsa.

¹⁵ "Khulwako olwamulilola eshifwabi shiokhulela omwahukhano eliabolwa nende omuroobi Danieli, nasinjile habundu aholo" (leshe omusomi amanyilisie), ¹⁶ "Leshe balia bali muYudea belushile mufikulu, ¹⁷ leshe yesi uli khushisuli yeshe haasi arusie shioosi shili munzumwe, ¹⁸ naye uli mumukunda alakalukha okhubukula eshifwalo shie tawe. ¹⁹ Nebutswa wuwi khubalia bali tsinda nende balia balindanga tsindana mutsinyanga tsienetso! ²⁰ Saaye mbu oluchendo lwenyu lulekholeshekhwo mumunyiri nomba khunyanga yomwihonga tawe. ²¹ Okhuba okhusandibwa okhukhongo khulibaho, khushili okhubakhuho tawe okhurula obuchachilo bweshialo okhutukha bulano, tawe, noho bulinyalilwa okhubaho khandi. ²² Nomba kali tsinyanga tsienetso tsiakhanyalilwe okhwimbitisibwa kuhumaho omubili kwoosi kwakhahonokosibwe tawe. Nebutswa khubalia abarobole tsinyanga etso tsiakhembichitibwe. ²³ Mana kakhaba mulala yesi amuboolela, 'Henje, Kristo ngwohuno hano!' Noho, Kristo ngwoyo yaho!' Mulalisubile tawe. ²⁴ Okhuba Kristo bobubeyi nende abaroobi bobubeyi balanyalilwa okhwibuukha nokhumanyia efilolelo efikhongo namangalimwa, kho bemilile mukhukosia, kata kanyalikha kata balia abarobole. ²⁵ Lole, emuboolele imbeli wefise. ²⁶ Khulwako nibamuboolela nywe, 'Henje, ali mushiangalamwe; mularula mutsie elwanyi mushiangalamwe tawe. Nomba, lole, ali mufikoro fiomukari,' mulalisuubilile tawe, ²⁷ Okhuba shinga na olwa oluhenu lwakhanga okhurula ebukwe mana lwang'ang'a munjila yoosi okhula mumbo, nalwo lulwakhabe khukhwitsa khwomwana womundu. ²⁸ Habundu hoosi weisolo yifwilile habwene yaho tsingosia nitsikhung'anilaho.

²⁹ Nebutswa amateemo likaliba kakhawa  khutsinyanga tsienetso eliuba liakhelimibwe, omwesi shikulihaana obulafu bwakwo tawe, tsing'ining'ni natsio tsilikwa okhurula khwikulu, natsio obunyali bwefinekulu  bulitechesibwa. ³⁰ Mana eshilolelo shiomwana womundu shilolekha ikulu mwikulu, natsio tsimbia tsiosi tsiomushialo tsiakhabelele. Tsiakhalole omwana womundu niyetsanga khumaleesi komwikulu halala nende obunyali noluyali olukhongo. ³¹ Yakharume abamalaika ke nomwoyo omukhongo kwetarumbeta, ne balinyalilwa okhukhung'asia halala abarobole be okhurula tsimbeka tsioosi, okhurula elubeka lulala lwelikulu okhuula eundi.

³² Yeche elieko okhurula khumusala kwomukhuyu. Mubwangu bwamasaka kabetsanga nikarusiye amasafu, mumanyanga mbu tsinyanga tsieyifula tsili ahambi. ³³ Kho khandi, olwa muba mulola efindu fino fioosi, kenyekha mumanye mbu ali ahambi, hafiribwa hene yaho. ³⁴ Obwatoto emuboolela nywe, olwibulo luno shilwakhaweho tawe okhuula olwa efindu fino fioosi filiba fikholeshe. ³⁵ Likulu nende eshialo filiwaho, nebutswa amakhuwa kanje shikaliwaho tawe. ³⁶ Nebutswa okhutsiana neyinyanga eyo nefise habulaho yesi wumanyile tawe, kata abamalaika akomwikulu, noho omwana, nebutswa Papa yenyene. ³⁷ Shinga olwa tsinyanga tsia Noha tsiali, nalwo shinga khuliba okhwitsa khwomwana womundu. ³⁸ Okhuba lwali mutsinyanga tsienetso oluhembo lushili okhwitsa bali balitsanga nende okhunywa, bayilananga nokhuhana mukhuyilana okhuula khunyanga ya Noha yenjila musafina, ³⁹ ne shibamanyakhwo eshindu tawe okhuula olwa oluyembo lwetsa nokhubabukula nokhubarusiaho- nalwo luliba khulokhwitsa khwomwana womundu. ⁴⁰ Mana abasatsa babili baliba mumukunda- mulala alibukulwa, naye mulala alilekhwa. ⁴¹ Abakhasi babili baliba basietsanga muluchina- mulala alibukulwa naye mulala alilekhwa. ⁴² Khulwako mube meso, okhuba shimumanyilekhwo khunyanga yomwami wenyu alitsa tawe. ⁴³ Nebutswa manye lino, mbu kakhaba omukhulundu mwene inzu yakhamanyile nifise shina fiomushilo fiomwifi alaba yetsanga, yakhanyalilwe okhuba meso naye shiyakhaleshile inzuye yipomolwe nokhwinjilwamwo tawe. ⁴⁴ Khulwako okhuula mube aberecheshe, okhuba omwana womundu yakhetse mufise fiamwakhabe mulaparanga shiyetsa okhwitsa tawe.

⁴⁵ "Kho nimukholishina ouli omusubilwa khandi omusitse owomukhulundu alara okhulinda inzu yiye nende abalimwo munjila mbu abahelesie  efiokhulia fiabo mufise fienyeshe? ⁴⁶ Weyikhabi nomukholi ulia womukhulunduwe alimunyoola nakholanga akenako lwalitsa. ⁴⁷ Obwatoto emuboolela mbu omukhulundu alimura asinjilile emianduchie chiosi. ⁴⁸ Nebutswa omukhalabani womwoyo omubi naba naboola mumwoyokwe, 'Omukhulundu wanje wushindile okhuula,' ⁴⁹ mana yanze okhupa abakhalabani bashie, nokhulia nokhunywa nabameesi, ⁵⁰ kho mana omukhulundu womukhalabani oyo alanyalilwa okhwitsa khunyanga yomukhalabani oyo aparanga shiyetsanga tawe nende efise fialamanyile tawe. ⁵¹ Omukhulunduwe alimutonya mufitonye nokhumura halala nende abekaati, ewakhwakhabe nokhwikhuula nokhusia ameno.