¹ Mana Yeso naboola khumukanda nende khubeechibe. ² Naboola, "Abahandichi bamalako nende abafarisayo bekhalanga mushifumbi shia Musa. ³ Khulwako shilia shioosi shibamulachilisia mukhole nywe khole efindu fino nokhufihenjelesia fio. Nebutswa mulalonde efikhole fiabo tawe, okhubeela baboolanga efindu nebutswa shibafikholanga tawe. ⁴ Toto, babohanga emitumba emisiro chili emitinyu okhuchinga, ne mana bachira chio khumabeka kabandu. Nebutswa bo shibanyalilwa okhusutia eshitere okhuchinga tawe. ⁵ Bakholanga efikhole fiabo khulokhulolwa nende abandu. Okhuba babambulanga amakhono ketsingubo tsiabo nokhukaliyia amachemo kefifwalo fiabo. ⁶ Baheela habundu woluyali mumilukha nefifumbi efikhongo mutsisinakoki. ⁷ Nende okhushesibwa khumanyishe mufiiro, nende okhulangwa 'Abeechesia' nabandu. ⁸ Nebutswa shikali okhuula olangwe 'Omwechesia' tawe, okhuba muli nende omwechesia mulala yenyene, nenyu enywe mwesi muli banabwe. ⁹ Ne mulalanjekhwo omundu yesi mushialo mbu Papa wenyu tawe, okhuba muli nende Papa mulala yenyene, naye ali mwikulu. ¹⁰ Nenyu khandi shimukhoyile okhulangwa 'omwechesia' tawe, okhuba muli nende omwechesia mulala mbu Kristo. ¹¹ Nebutswa wulia uli omukhongo hakarikari wenyu alaba omukhalabani. ¹² Wulia yesi wichingula omwene alatutuyibwa, naye yesi witutuyia omwene alachingulwa.

¹³ Nebutswa namatinyu khunywe abahandichi bamalako nende abafarisayo abekaati! Mwikalanga obwami bwomwikuli okhurula khubandu. Okhuba enywe abene shimwinjilamwo tawe, nende kata shimusubilanga balia bali ahambi okhwinjilamwo okhukhola endio tawe. ¹⁴ Namatinyu khwinywe abahandichi bamalako nende abafarisayo, okhuba mutsitsanga nimwinjila mutsinzu tsiabalekhwa nimwimanyia khulokhukasia amasayo amarambi. Mulinyalilwa khulwako okhunyoola eshinyasio eshikhongo." ¹⁵ Namatinyu khunywe abahandichi bamalako nende abafarisayo abekaati! Okhuba mutsitsanga munyanza nende khwiloba okhukalukhasia omundu mulala, ne lwaba yakhaba mulala, mumukhola ye okhuba khabili omwana wemakombe shinga tsa enywe.

¹⁶ "Namatinyu khunywe, abacheli ababofu, enywe muboolanga, 'Wulia witsubanga okhubilila khwitembeli, neshikhaya. Nebutswa wulia witsuba okhubilila khutsahabu yomwitembeli, akhoyile okhusinjila neshitsuboshie.' ¹⁷ Enywe ababofu abasilu! Nishilena eshikhongo, etsahabu nomba litembeli likasinjia etsahabu shili eshiholo? ¹⁸ Naye wulia yesi witsuba okhubilila khubwali, neshikhaya. Nebutswa wulia yesi witsubanga okhubilila khushihanwa shili khubwo asinjila neshitsuboshie.' ¹⁹ Enywe abandu ababofu! Nishilena shili eshikhongo, neshihanwa nomba obwali bukasinjia eshihanwa okhuba eshiholo? ²⁰ Khulwako wulia yesi witsubanga okhubilila khubwali, yetsubanga okhubilila khubwo nende buli shindu shili khubwo. ²¹ Wulia naye witsubanga okhubilila khwitembeli yetsubanga okhubilila khulio nende wulia umenyaga mulio. ²² Naye wulia witsubanga okhubilila mwikulu yetsubanga okhubilila khushifumbi shioburuchi shia Nyasaye nende wulia wikhalanga khushio.

²³ Wowe khwinywe, abahandichi bamalako nende abaFararisayo, abekaati! Okhuba muyininjia shielikhumi shiamasafu keshing'ari efilangwa mbu eminana, efinzari nende chiira, nebutswa mwalekha okhukhola amakhuwa kali kobusiro kamalako-okhubula okhuyekha elubeka lulala neshisa nende obusubili. Nebutswa kakhoyile mube mwakakhola buchila okhulekha akandi kalakholilwe tawe. ²⁴ Enywe abacheli ababofu, enywe mumalanga mwinyasia okhurusia eshikukule nebutswa mumila ingamia.

²⁵ Wuwi khunywe, abahandichi bamalako nabaFarisayo, abekaati! Okhuba mwosinjia yikulu weshikombe nende olutabo, nebutswa mukari mwabio mwetsulamwo obunuli nokhwiyenyela. ²⁶ Enywe abaFarisayo ababofu! Ranjilile mwosie mukari mweshikombe nende mwolutabo, kho mbu elwanyi yoosi yinyalilwe okhuba indafu khandi.

²⁷ Wuwi khwinywe, abahandichi bamalako nende abaFarisayo, abekaati! Okhuba muli shinga na efilindwa fibashilwe olufuye olulafu, eshia elwanyi wafio filolekhanga efilayi okhushila, nebutswa mukari mwetsulamwo efikumba fiabandu bafwa nende efindu efinji filali efieleleshe tawe. ²⁸ Munjila ndala yeneyo, elwanyi mulolekhananga abalunjishi, nebutswa mukari mwetsulamwo obwikaati nende obufunachi bwamalako.

²⁹ Wuwi khwinywe, abahandichi bamalako nende abaFarisayo abekaati! Okhuba mulonganga efilindwa fiabaroobi nokhung'ola efilindwa fiabalunjishi. ³⁰ Muboolanga, 'Kakhaba khwali khwamenya mutsinyanga tsiabaPapa befu, shikhwakheyunganekhwo ninabo khulokhuratsia amatsayi kabaroobi tawe.' ³¹ Khulwako mwiyininjiakhwo obuloli mbu muli abana bo balia beranga abaroobi. ³² Mwesi khandi mwitsusinjia eshichelo shiabaPapa benyu. ³³ Enywe tsinzukha, enywe aboluyia lwetsinzukha, mwakhebalule muriena okhurula mubukhalachi bwokhutsia emakombe? ³⁴ Khulwako, lole, emurumanga enywe abaroobi nende abandu abasitse nabahandichi bamalako. Mleera balala babo nokhubabamba, khandi balala babo mulabashutula mutsisinakoki tsienyu nokhubalonda mwitookho okhutsia mulindi. ³⁵ Amakalusio kalaba mbu amatsayi koosi karatsibwa khushialo kalaba khwinywe, okhuchachila khumatsayi kaAbeli okhuula khumatsayi kaZakaria omwana wa Berekaya, wamweera hakarikari womuse nende obwaali. ³⁶ Obwatoto emuboolela mbu, efindu fino fioosi filiba khwilwibulo luno.

³⁷ "Yerusalemu, Yerusalemu, ewe wiranga abaroobi nokhubalasa amachina balia barumungwa khwinywe! Nibuli khubise shina olwandekomba okhukhung'aasia abaana benyu halala, shinga nolwa ingokho ikhung'aasinjia efiminywi fiayo hasi wetsimbaha tsiayo, nebutswa shimwali bokhwiyama tawe! ³⁸ Lole, muleshelwe inzu yenyu yikoyanile. ³⁹ Okhuba emuboolela, shimulanyalilwakwo okhundoola sie okhurula bulano okhutsia imbeli tawe okhuula olwa muboola, 'Weyikhabi ne ulia witsa mulira lioMwami.'"