¹ Yeso yaboola khandi ninabo mu tsinjelo, naboolanga, ² "Obwami bwomwikulu buli shinga na omuruchi wundi wakasia eshiselelo shiomusianiwe. ³ Yaruma omukholiwe okhutsia okhulanga balia bali balanjilwe khushiokhulia shieshiselelo shienesho, nebutswa shibakhanyalilwe okhutsa tawe. ⁴ Omuruchi khandi yaruma abakholi bandi naboolanga, 'Bolele benanjile, "Lole, engasiye shiokhulia shiokhukoloba. Esinzile eheyi nende emiruko chianje emikhomelu nabo efindu fiosi firechekhwe. Yitse mundia yeshiselelo.'" ⁵ Nebutswa shibahulisia tawe nibatsia, mulala munzu yiye naye oundi mubukhala bubwe. ⁶ Abandi batafia abakholi bomuruchi nokhubakholela eshifimbia murwe, nokhubeera bo. ⁷ Omuruchi oyo yasinyikha po, mana naruma abeliye bebe nibabasasia aberi benabo nokhusamba litookho liabo. ⁸ Mana naboolela abakholibe, 'Eshiselelo shimalile okhwirechekha, nebutswa balia balangwa shibali bobukhala tawe. ⁹ Khulwako tsie wemihanda emikhongo chibukanilanga mana mulanje abandu mubunji shinga olwa munyala okhubanyoola.' ¹⁰ Abakholi bamala batsia khumihanda mana nibakhung'asia abandu boosi ababanyoola, ababi nende abalayi bombi. Kho inzu yeshiselelo yetsula nabacheni. ¹¹ Nebutswa olwa omuruchi yenjilamwo okhuhenga abacheni, yalolamwo omusatsa mulala owali nalafwalile tsingubo tsieshiselelo tawe. ¹² Omuruchi namuboolela, 'omwitsa, witsile oriena muno buchila tsingubo tsieshiselelo?" Nebutswa omusatsa oyo yoma omunwa. ¹³ Mana omuruchi naboolela abakholi, 'Bohe omukhono nende eshilenje shiomundu wuno, mana mumusukune elwanyi mushilima ewa khuliba nende okhwikhula nokhusia ameno.' ¹⁴ Okhuba abandu abanji balangwa, nebutswa abatiti nabo baulungwa."

¹⁵ Mana abafarisayo nibatsia nibapanga shinga olwabetsa okhumunyoola Yeso mukhuboolakhwe khwene. ¹⁶ Mana bamurumila abeechibe, halala nende abaherodia. Baboolela Yeso, "Omwechesia, khumanyile mbu oli wobwatoto, ne khandi wechesinjia injila yaNyasaye mubwatoto. Shohendelangakhwo amaparo komundu wundi yesi tawe, ne khandi shoyeshelangakhwo abandu elubeka lwoosi tawe. ¹⁷ Kho khuboolele fwe, oparanga orie? Nobulayi okhurunga emisololo khu Kaisare nomba tawe?"

¹⁸ Nebutswa Yeso yamanyilisia obubi bwabo ne naboola, "Shichila shina mundemanga sie, enywe abekaati? ¹⁹ Manyie ling'ondo liobusololi." Mana bamurelela itinari. ²⁰ Yeso nabareba, "Eshifwanani nende elira lino nefiawina?"

²¹ Nibamuboolela, "Nefia Kaisare." Mana Yeso nababoolela, "Kho helesie Kaisare efia Kaisare naye Nyasaye muhelesie efia Nyasaye." ²² Olwa bahulila lino, bachenya. Mana nibamulekha nibarula nibatsia.

²³ Khunyanga yeneyo abandi khubasadukayo, ababoolanga okhusumulukha khubulaho, beetsa ewa yali. Bamureba, ²⁴ baboolanga, "Omwechesia, Musa yaboola, 'Kakhaba omusatsa afwa, buchila omwana, omusiani wabo okhuula ayile omukhasitsana mana yebulemwo abana khulomusiani wabo.' ²⁵ Khwaliho nabasiani bomundu mulala musafu. Wokhuranga yayila ne nafwa. Nalaleshilekhwo omwana yesi tawe, yalekha omukhasiwe khumusiani wabo. ²⁶ Mana omusiani wabo wakhabili yakhola eshindu shilala shienesho, mana wakhataru okhutsia endio okhula khumusiani wabo wamusafu. ²⁷ Olunyuma lwabo boosi, omukhasi oyo nafwa. ²⁸ Bulano mubusulumushi, omukhasi wuno aliba wawina khubasiani musafu bano? Okhuba boosi bali bamuyila ye."

²⁹ Nebutswa Yeso yabakalusia nababoolela mbu, "Mwakosibwa shichila shimumanyile amahandiko noho obunyali bwa Nyasaye tawe. ³⁰ Okhuba mubusulumushi shibayilanga noho okhuhanwa mulukhasi tawe. Halali, babetsanga shinga na abamalaika mwikulu. ³¹ Nebutswa okhutsiana nende obulamushi bwabafuu, shimwasomakhwo eliamwaboolelwa nende Nyasaye, naboolanga, ³² Nisie Nyasaye wa Abrahamu, Nyasaye wa Isaka, nende Nyasaye wa Yakobo'? Nyasaye shali Nyasaye wabafwa tawe, nebutswa abamenyanga." ³³ Olwemikanda chiahulila lino, chiachenyesibwa khumechesioke.

³⁴ Nebutswa olwa abafarisayo bahulila mbu Yeso wusimiye abasadukayo, bekhung'asia halala. ³⁵ Mulala wabo, wechela amalako, yamureba lirebo khulokhumutema ye- ³⁶ "Omwechesia, nililako shina likhongo mumalako?"

³⁷ Yeso namuboolela, "'Heera Omwami Nyasayewo nomwoyokwo kwoosi, nomubilikwo kwomukari kwoosi nende amakaniko koosi.' ³⁸ Lino nalio lilako likhongo mana liokhuranga. ³⁹ Nalo lilako liakhabili lili shinga nalio- 'Heera omurende wo shingana yiwe omwene.' ⁴⁰ Khumalako kano kabili kasinjilekhwo amalako koosi nende abaroobi."

⁴¹ Bulano olwa abafarisayo bali bashikhung'anile halala, Yeso yabareba lireebo. ⁴² Yareeba, "Shina shiomuparanga okhulondokhana nende Yeso Kristo?" Bamuboolela ye mbu, "Nomwana wa Daudi."

⁴³ Yeso nababoolela, "kali kariena Daudi muRoho namulanga ye Omwami naboolanga, ⁴⁵ Kakhaba Daudi anyala okhulanga Kristo 'Omwami, 'ali ariena omwana wa Daudi?" ⁴⁶ Abulaho mulala yesi wamukalusiakhwo likhuwa lioosi tawe, naye abulaho omundu yesi weteya okhumurebakhwo lirebo lindi lioosi okhurula inyanga eyo okhutsililila imbeli.