¹ Bulano olunyuma shinga olwa isabato, bwanza okhushia okhuhenga munyanga yokhuranga yelihonga, Maria Magadalena nende Maria wundi oyo beetsa okhulola eshilindwa. ² Wuwi, khwaliho nokhurenga kheshialo okhukhongo okhushila, okhuba omu malaika wOmwami yeekha okhurula mwikulu, niyeetsa nakolongomia nokhurusiaho lichina, mana nalikhalakhwo. ³ Okhulolekhana khwalio khwali shinga na oluheni, natsio tsingubotsie tsiali shinga na eparafu. ⁴ Abalindi beyuuya noburi nokhuba shinga na abandu bafwile. ⁵ O (mumalaika) yaboolela abakhasi yabo, "Mularie tawe, okhuba emanyile mbu mukhabanga Yeso, oubambilwe. ⁶ Shali hano tawe, nebutswa wusulumushe, shinga tsa yaboola. Yitse mulole ewa omwami abeele niyeyalisiye. ⁷ Tsie lwangu muboolele abeechi bebe, "Wusulumushe okhurula mubafu. Henje, atsitsanga imbeli wenyu eGalilaya. Ebweneyo mulamulola.' Henje emuboolele enywe."

⁸ Abakhasi barula hashilindwa mubwangu halala noburi nomwikhoyo omukhongo okhushila, nokhwilukha okhuboolela abeechibe. ⁹ Lole, Yeso yabukana ninabo nababoolela, "Emileembe!" Abakhasi beetsa nibatila efilenjefie nibamwinamila. ¹⁰ Mana Yeso nababoolela, "Mularie tawe. Tsie muboolele abaana befu barule batsie Galilaya. Ebweneyo balandola."

¹¹ Bulano olwa abakhasi bali batsitsanga, lole, balala khubalindi batsia mwitookho nibaboolela abakhulundu babesaaliisi efindu fiosi fiali fikholeshe. ¹² Olwa abesaaliisi bali babukanile nende abasakhulu nokhuboolakhwo likhuwa lino ninabo, bahelesia abelihe balia amang'ondo mubunji. ¹³ Nokhubaboolela, "Boolele abandi, 'Abeechi baYeso betsile eshilo mana nibeba omubilikwe lokhubeele khukonanga.' ¹⁴ Kakhaba oburume buno bulila kafuna, khwitsa okhumulunyilisia nokhumuyiniakhwo obuhendi okhurula khwinywe." ¹⁵ Kho abelihe babukula amang'ondo mana bakhola shinga olwa bali balachilisibwe. Oburume buno bwalanda mutsimbeka tsioosi mubayahudi mana butsilililanga kata inyanga yino.

¹⁶ Nebutswa abeechi ekhumi nende mulala batsia eGalilaya, khushikulu shia Yeso yali nabachomiye okhutsia. ¹⁷ Olwa bamulola ye, bamwinamila nebutswa abandi bali nende obubeyibeyi mumioyo. ¹⁸ Yeso yebetsela ne nababoolela, "Obunyali bwoosi bwahanwa khwisie mwikulu nende khushialo. ¹⁹ Khulwako tsie mufibala fioosi mukasia abeechi. Babatisie mulira lia Papa, nende liomwana nende lioMwoyo omutsienukhu. ²⁰ Bechesie okhulonda efindu fioosi efiandamulachilisia. Henje, endi halala ninenyu buli lwoosi kata khunyanga yeyinduukho."