¹ "Okhuba obulamu bwomwikulu buli shinga mwene mukunda owarula natsia elwanyi okhukhaba abakholi mumukunda kwemisabibu chichie. ² Olunyuma lwokhwiyamana nabakholi khulwa etinari ndala khunyanga, yabaruma batsie mumukunda kwemisabibukwe. ³ Yatsia elwanyi khandi mumakha kola amasa kakhataru ne nalola abakholi bandi basinjile mushiiro eshikhaya. ⁴ Khubo yaboola, 'Enywe khandi, tsie mumukunda kwanje kwemisabibu, ne ndalamuhelesia eshili shiobwatoto!' Kho batsia okhukhalabana. ⁵ Khandi yarula elwanyi mufise fiamasa kakhasasaba, khandi mufise fia shienda ne nakhola ario. ⁶ Khandi mufise fiekhumi nende lulala yarula natsia elwanyi nanyoola abandi basinjile eshikhaya. Yababoolela, 'Shichila shina musinjile hano eshikhaya inyanga yoosi?'

⁷ Bamuboolela ye mbu, "Shichila omundu yesi ashilikhwo okhukhusamusia tawe,' "Yababoolela, 'Enywe mwesi khandi tsie mumukunda kwemisabibu.' ⁸ Olwa khukoloba khwoola, mwene mukunda kwemisabibu yaboolela omusinjililiwe, 'Langa abakholi obarunje emirungo chiabo, wanzanga nende wokhumalilikha khuwokhuranga.'

⁹ Olwabakholi beetsa mufise fia ekhumi nende lulala betsa, buli mulala wabo yanyoola itinari. ¹⁰ Lwomukholi wokhuranga yeetsa, bapara mbu balanyalilwa okhunyoola okhushilakhwo, nebutswa boosi khandi banyoola etinari ndala buli mulala. ¹¹ Olwa buli mulala banyoola emirungo chiabo, banyunyia okhulondokhana nende mwene mukunda oyo. ¹² Baboola, 'Abakholi betsile lwokhumalilikha bano bamalile lisa elala khubukholi, nebutswa ebahelasiye ninefu, efwe khuchinjile obusiro bweyinyanga noluya lululile.'

¹³ Nebutswa mwenekwo nakalusia naboola khumulala wabo, 'Omwitsa, shekhukholile obubi bwoosi tawe. Shikhurechelesaniye ninawe khutinari ndala tawe? ¹⁴ Bukula shili eshishio mana otsie. Erobole okhuhana khubakholi besamusiye bokhumalilikha bano okhuhelana tsa nende nywe. ¹⁵ Shikhuli khwilako khusie okhukhola shinga olwa ndenyile nende shili eshianje tawe? Nomba okhalishilwe shichila endi omulayi?' ¹⁶ Kho abokhumalilikha baliba bokhuranga, nabo bokhuranga bokhumalilikha. Abanji balilangwa nabo batiti balirobolwa."

¹⁷ Shinga olwa Yeso yali natikulukhanga natsitsanga Yerusalemu, yabukula abeechi ekhumi nende babili nabara elubeka, nakhwo khunjla yababoolela, ¹⁸ "Lole, khulatikulukhanga okhutsia Yerusalemu, naye omwana womundu alahaanwa khubakhulundu betini nende abahandichi bamalako. Betsa okhumukhalachila eshiina shiokhufwa. ¹⁹ Nabo balamura mumakhono kabamahanga okhumutseshelela, okhumushutula, nokhumubamba. Nebutswa khunyanga yakhataru alilamusibwa."

²⁰ Mana nyinamwana abasiani ba Sebedayo yamwitsila Yeso nabanabe abasiani. Yenama imbeliwe namureeba eshindu okhurula khuye.

²¹ Yeso namureeba, "Elienya lio nishina?" Namuboolela, "lachilisia mbu abasiani banje babili bano banyalilwe okhwikhala, mulala khumukhonokwo omusatsa naye oundi khumukhonokwo omukhasi."

²² Nebutswa Yeso yakalusia naboola, "Shomanyile shiorebanga tawe. Onyalilwa okhunywa eshikombe shendi ahambi okhunywelamwo?" Nibamuboolela mbu, "Banyala," ²³ Nababoolela  mbu, "Mushikombe shianje toto mulanywelamwo. Nebutswa okhwikhala khumukhono kwanje omusatsa nende omukhono kwanje omukhasi shinesie wokhuhana tawe, nebutswa nibalia abaPapa amalile okhurechekha." ²⁴ Olwa abechi bandi balia ekhumu bahulila lino, basinyisibwa po nende banabo babili yabo. ²⁵ Nebutswa Yeso yabalanga nibetsa ewa yali ne naboola, "Mwamanya mbu abaruchi ba bamahanga babekhalakhwo, nabo abandu babo beyimoni ndafu bakholanga kobunyali bwabo khubo. ²⁶ Nebutswa shikenyekananga okhuba kario ebuleka wenyu tawe. Halali wikombanga okhuba omukhongo hakarikari wenyu okhuula abe omurumishi, ²⁷ naye wikombanga okhuba wokhuranga okhuula abe omukholi wenyu, ²⁸ shinga tsa omwana womundu shiyetsa okhurumishilwa tawe, nebutswa okhurumikha, nende okhuhaana obulamubwe shinga nomusango khubanji."

²⁹ Shinga olwa bali barulanga Yeriko, omukanda omukhongo kwamulondakhwo. ³⁰ Khwaliho nabasatsa babili bekhale khundulo khwomuhanda. Olwabahulila mbu Yeso yali nabirilangaho, bayula, "Omwami, Omwana wa Daudi, khubeele tsimbabasi." ³¹ Omukanda kwabakondoshela kubaboolelanga baholele, nebutswa bayula ikulu kata okhushilakhwo, "Omwami, Omwana wa Daudi, khubeele tsimbabasi."

³² Yeso yasinjilaho nabalanga nokhubareeba, "Nishina shiomwikombanga omukholele nywe?"

³³ Nibamuboolela mbu, "Omwami, mbu tsimoni tsiefu tsinyalilwe okhwikulwa." ³⁴ Mana Yeso niyetsulwemwo neshibeela, natila tsimoni tsiabo. Mubwangu bwenobo banyoola okhulola nokhumulondakhwo.