¹ Kamala kekholekha mbu, olwa Yeso yali namalile okhuboola amakhuwa kano, yarula Galilaya niyeetsa mulihanga lia Yudea elili imbeli womuchela kwa Yorodani. ² Emikanda emikhongo chiamulondakhwo, namala nabahonilia habwene yaho.

³ Abafarisayo bamwitsila ye, bamurebanga, "nelilako omundu okhulekhana nomukhasiwe khulweshifune shiosi?"

⁴ Yeso yabakalusia ne nabareeba, "Mushili okhusomakhwo mbu wulia wabalonga okhurula mukhuchaka yabalonga omusatsa nomukhasi tawe? ⁵ Wulia wabalonga bo yaboola khandi, 'Okhubeela eshifune shino omusatsa alalekha samwana nende nyinamwana mana yeyunje nomukhasiwe, nabo babili balaba omubili mulala.' ⁶ Kho shibashilinji babili tawe, nebutswa omubili mulala, Khulwako eshia Nyasaye alimasiye halala, aumao mulala yesi oulakabukhasia tawe."

⁷ Bamala bamuboolela bamureeba, "Mana shichila shina Musa nakhulachilisia efwe okhuhana lilako liokhulekhana nokhumulonda atsie?"

⁸ Nababoolela bo, "Okhubeela obumu bwemioyo chienyu, Musa yamwiyamila okhulekhana nende abakhasi benyu, nebutswa okhurula mubuchachilo shifialinji firio tawe. ⁹ Emuboolela nywe mbu, wulia yesi wulekhana nomukhasiwe, bulali khulokhubela obuyilani tawe, nende okhuyila oundi, akhola obuheyi. Naye khandi omusatsa wuyiranga omukhasi wulekhane nomusatsawe yesi akhola obuheyi."

¹⁰ Abeechi baboolela Yeso, "Kakhaba kali kario khumusatsa nomukasiwe, shinobulayi okhuyira tawe."

¹¹ Nebutswa Yeso yababoolela bo mbu, "Shikali buli mulala anyala okhwiyama obubooli buno tawe, nebutwsa khubalia bonyene bwahebwa khubo. ¹² Okhuba khuli nende abalate bebulwa bario okhurula munda mwa banyinamwana ne khandi khuli nende abalate bandi bakholwa bario nende abandu, nende khandi khuli nende abalate bandi bekhola abene bario khulokhubela obwami bwomwikulu. Wulia wunyalilwa okhwiyama eliechesio lino, leshe ye aliyame."

¹³ Mana yamala nalelelwa abaana bandi abatiti kho mbu anyalilwe okhubarakhwo amakhono nokhusaya, nebutswa abeechi bamukondoshela. ¹⁴ Nebutswa Yeso yaboola, "Lekhule abana abatiti ne mulakaye bo okhwitsa khwisie tawe, okhuba obwami bwomwikulu bubetsanga khu bandu barinangwa." ¹⁵ Yara amakhono khubana, mana natsia narulaho.

¹⁶ Lola, omundu yetsa khuYeso namureba, "Omwechesia, nishindu shina eshilayi shikenyekha okhuula ekhole kho mana enyalilwe okhuba nobulamu bweyinziayo?"

¹⁷ Yeso namukalusia namureba, "Shichila shina wurebanga nishina shili eshilayi?" Shilala shionyene neshilayi, nebutswa kakhaba wenya okhwinjila mubulamu, bikha amalako."

¹⁸ Omundu oyo yamureba, "Malako shina?" Yeso naboola, "Oleera tawe, olaheya tawe, oleeba tawe, olayinia obukobosheli bwobubeyi tawe, ¹⁹ Ria so nende mao mana oheele omurende wuwo shinga olwa weheela omwene."

²⁰ Omubukha oyo yamuboolela, 'Efindu fino fiosi ndabilonda. Nishina eshindi sheshienyanga?"

²¹ Yeso namuboolela ye mbu, "Kakhaba wenya obe omulayi okhushilakhwo, tsia, okusie emianduchio chioosi, mana ohane khubamanani, mana olaba nelibishilo mwikulu; mana itsa wunondekhwo." ²² Nebutswa olwa omubukha oyo yahulila aka Yeso yali naboolile yarulaho natsia nabelele okhushila, okhuba yali nemiandu eminji.

²³ Yeso yaboolela abeechibe, "obwatoto emuboolela nywe mbu, nobutinyu omundu omuyinda okhwinjila mubwami bwomwikulu. ²⁴ Khandi emuboolela nywe mbu, nobwangu khulwa ingamia okhubira mutundu mweyisindani okhushila omundu omuyinda okhwinjila mubwami bwa Nyasaye" ²⁵ Lwa abeechi bahulila lino, bachenyesibwa po mana baboola khulokhureba mbu, "Wina mana wunyala okhuhonibwa?"

²⁶ Yeso yabahenga nababoolela, "Khubandu lino shilinyalikha tawe, nebutswa khuNyasaye linyalikha."

²⁷ Mana Petero namukalusia nokhumureeba ye mbu, "Lola, efwe khwalekha buli shindu nokhukhulonda yiwe. Nishina mana shiokhulinyoola?"

²⁸ Yeso nababoolela bo mbu, "Obwatoto emuboolela nywe mbu, mundukho imbia lomwana womundu yekhala mushifumbi shie shioburuchi shioluyali, enywe munondakhwo sie mulinyalilwa khandi okhwikhala khufifumbi fioburuchi ekhumi nende fibili muyalanga tsimbia ekhumi nende tsibili tsia israeli. ²⁹ Buli mulala walekha tsinzu tsiabo, abasiani babo, abakhana babo, samwana, nyinamwana, abana noho omukunda khulwa elira lianje alinyoola efikhumila ekhumi (100) nokhunyoola obulame bweyinziayo. ³⁰ Nebutswa abanji bali bokhuranga balinyalilwa okhuba bokhumalilikha, nabo bokhumalilikha balinyalilwa okhuba bokhuranga.