¹ Habise bwenaho abeechi beetsa khuYeso nibamureeba, "Niwina omukhongo mubwami bwomwikulu?"

² Yeso yalanga omwana omutiti, namura imbeli wabo, ³ ne naboola, "Toto emuboolela, kalali shimulakalukhana mufwane shinga omwana omutiti wuno tawe, yibulakhwo injila yimulinjililamwo mubwami bwomwikulu tawe. ⁴ Khulwako, yesi witutuyia ye mwene shinga omwana omutiti wuno niye omukhongo mubwami bwomwikulu. ⁵ Yesi winjisia omwana omutiti shingana wuno muliira lianje yanzinjisiye sie. ⁶ Nebutswa yesi wuchilanga mulala khubatiti bano owusubilanga musie okhwikumula, bwakhabele obulayi khuye mbu lichina likhongo libe linyala okhwelesibwa mwikosi lie, ne mbu abe wunyala okhwinikhwa mulusuba lweyinyanza.

⁷ "Wuwi, khushialo shichila amachina kokhwikumulakhwo! Okhuba likhoyilwe okhwenyekha mbu amachina kokhwikumulakhwo yako ketse, butswa ni wuwi khumundu wamachina kokhwikumulakhwo yako ketsa okhubirilakhwo! ⁸ Kakhaba omukhonokwo nomba eshilenjeshio fikhukhola yiwe okhwikumula, shikhalache oshirusieho mana oshisukune ehale shikhurulekhwo. Nobulayi khulwa yiwe okhwinjila mubulamu buchila amakhono nefilenje nomba nolemile okhushila okhusukunwa mumulilo kweyinziayo nolinji nemikhono chibili nomba efilenje fibili. ⁹ Kakhaba imoni yo ilakhukhola wikumule, chikhunyuleyo mana osukune ikhurulekhwo. Nobulayi khuyiwe okhwinjila mubulamu neyimoni ndala okhushila okhusukunwa emakombe imbalaba noli netsimoni tsiosi tsibili. ¹⁰ Lole mbu mulalechekhwo mulala yesi khubaana abatiti bano tawe. Okhuba emuboolela nywe mbu mwikulu abamalaika kabo buli shise kahenganga mubweni mwa Papa ouli mwikulu. ¹¹ Okhuba omwana womundu yeetsa okhununula balia bakora. ¹² Mupara muriena? Kakhaba mulala yesi aba namakondi efikhumila likhumi elala (100), nalo lilala khuko, ahata, shamalanga alekha kalia amakhumi shienda hashikulu okhutsia okhukhaba elala likorile elo tawe? ¹³ Kakhaba alinyoola lio, emuboolela obwatoto mbu, yekhoyanga okhubeela lio okhushila kalia amakhumi shienda kalahatile kalia tawe. ¹⁴ Munjila yeneyo, shinelienya lia Papa wuli mwikulu mbu mulala khubatiti bano bakore tawe.

¹⁵ Kakhaba omusiani wenyu akhukholela yiwe obwononi, tsia mana omukondoshele, hakarikari wuwo nende ye mwenyene. Kakhaba alakhuhulisia, olaba nomukalusiye omusiani wenyu elubeka wuwo. ¹⁶ Nebutswa nalakhuhulisia tawe, bukula oundi mulala nomba babili olondokhane ninabo kho mbu okhurulana nende omunwa kwabakobosheli babili nomba bataru bataru okhuula likhuwa libe linyalilwa okhusibwa. ¹⁷ Ne kakhaba aloba okhumuhulisia nywe, boolele ehekalu amakhuwa kene yako. Kakhaba khandi aloba okhuhulilisia ehekalu, lekha abe khuyiwe shinga na omundu weshibala nomutooyi wobushuru. ¹⁸ Emuboolela obwatoto, filia efindu fioboha khushialo filanyalilwa okhubohwa mwikulu, nashio shiosi shiobolola khushialo shilabololwa mwikulu. ¹⁹ Khandi emuboolela obwatoto bundi, kakhaba babili benyu beyamana khushialo okhulondokhana khushindu shiosi shiobareba, balakholelwa nende Papa wanje wuli mwikulu. ²⁰ Okhuba halia wababili nomba bataru bakhung'anile mulira lianje, habwene yaho endi hakarikari wabo.

²¹ Mana Petero niyeetsa nareeba Yeso, "Omwami, omwana wefu akhoyile okhungosela amakhabi kanga mana emubeele ye? Okhula amakhabi musafu?"

²² Yeso namuboolela ye mbu, "Shekhuboolelanga amakhabi musafu tawe, nebutswa amakhabi amakhumi musafu okhutukha musafu (70 x 7). ²³ Khulwako obwami bwomwikulu buli shinga omuruchi wundi wenya mbu abakhalabanibe bamurunje eshiali nababanzanga. ²⁴ Ne shinga olwabanza okhurunga yarelelwa omukhalabani mulala owayali nabanzanga tsikilo tsietsahabu efikhumila amakhumi kataru nende amakhumi karano (350,000). ²⁵ Nebutswa shichila shiyali nende injila yokhurunjilamwo tawe, omukhulunduwe alacilisia mbu akusibwe, halala nende omukhasi nabanabe nende efindu fiosi biayali ninabo, mana omurungo kukholwe. ²⁶ Kho omukhalabani nakwa hasi imbeli wuwe, naboola, 'Omukhulundu, nzifwile, ne ndalanyalilwa okhukhurunga buli shindu.' ²⁷ Kho omukhulundu womukhalabani oyo, khulokhubeela yetsulwamwo neshibela, yamulakhula namubela ye omurungo kwene yuko. ²⁸ Nebutswa omukhalabani oyo yarula elwanyi nanyoola mulala khubakhalabani bashie, owayabanzanga tsikilo tsietinari efikhumila likhumi elala (100). Yamukwakhwo namutila, niyanza okhumumika ye, ne naboola, 'Runga sie liekhubanzanga.'

²⁹ Nebutswa omukhalabani washie yakwa hasi namwisaya, naboolanga, 'Nzifwila, ne ndalakhurunga.' ³⁰ Nebutswa omukhalabani wokhuranga oyo yaloba. Halali, yatsia namusukuna mumbohe okhuula olwamurunga eshiayali namubanzanga. ³¹ Olwa abakhalabani bashie balola shiali shikholeshe, babelesibwa okhushila. Betsa nokhuboolela omukhulundu wabo buli shindu shiali shikholeshe.

³² Mana omukhulundu womukhalabani oyo namulanga ne namuboolela, 'Eyiwe omukhalabani omubi, ekhubelele omubanzo oko kwosi shichila wusayile sie. ³³ Shiwakhabelekhwo neshisa khumukhalabani washio shinga kata embele ninashio khwiwe tawe?" ³⁴ Omukhulundu wuwe oyo yetsulwamwo neliruma ne namuhana ye khubokhumusandia okhuula olwa alinyalilwa okhurunga filia fiosi fiyali namubanzanga. ³⁵ Kho khandi Papa wanje womwikulu alimukholela enywe kakhaba shilimubela abashenywe okhurula mumioyo chienyu tawe."