¹ Olunyuma lwetsinyanga tsisasaba tsiwele Yeso yabukula Petero, Yakobo nende Yohana omusiani wabo, nabaninia hekulu weshikulu bo bene. ² Niyekalukhasia imbeli wabo. Obwenibwe bwakha shingana eliuba, nabio efifwalofie fiang'ang'a shingana obulafu. ³ Lole, Musa nende Eliya balolekhaho baboolanga ninaye. ⁴ Petero yakalusia naboolela Yeso, "Omwami, nobulayi khulwa fwe okhuba hano. Kakhaba wikomba, ndalanyalilwa okhukaasia hano amatili kataru- elala elilio, elala lia Musa, nalo elala lia Eliya."

⁵ Olwa yali nashiboolanga, lole, lilesi lilafu tswe liabafunikha bo, nekhandi lole, khwali nomwoyo okhurula mumalesi, kuboolanga, "Wuno niye omwana wanje omuheelwa owandachamisibwa ninaye mumurechelesie ye."

⁶ Olwa abeechi bahulila lino, bakwa mafumama ne bali noburi okhushila. ⁷ Mana Yeso niyeetsa nabatilakhwo ne naboola, "sinjile mana mulaba noburi tawe." ⁸ Mana bahenga ikulu nebutswa shibalola yesi tawe halali Yeso yenyene.

⁹ Shinga olwa bali bekhanga okhurula khushikulu, Yeso yabalachilisia naboolanga, "Amalolo kano mulamanyiekhwo omundu yesi tawe okhuula lwomwana womundu aliba nasulumushe okhurula mubafu."

¹⁰ Abeechibe bamureeba ye, nibaboolanga," Shichila shina mana abahandichi bamalako baboolanga mbu Eliya okhuula aranjilile okhwitsa mbelio?"

¹¹ Yeso yakalusia naboola, "Eliya toto alitsa nokhura efindu fiosi ewa fiali. ¹² Nebutswa emuboolela nywe, Eliya wamala khale okhwitsa, nebutswa shibanyala okhumumanyilisia tawe. Habula bakhola shilia shiosi shibenya okhukhola khuye. Munjila ndala yeneyo, omwana womundu alinyakhana khandi mumikhono chiabo." ¹³ Mana abeechi bamanya mbu yali naboolanga okhulondokhana khu Yohana omubatisia.

¹⁴ Olwa bali bolile khumukanda, omusaatsa yamwitsila, nasikama imbeliwe, ne naboola, ¹⁵ Omwami, ba netsimbabasi khumusiani wanje, okhuba noweindulume mana anyakhananga okhushila. Okhuba akwitsanga buli khase mumulilo noho mumatsi. ¹⁶ Emulelire khubechibo, nebutswa shibanyalilwe okhumuhonia tawe."

¹⁷ Yeso yakalusia naboola, "Oluyia lulasubilanga tawe, nokhuhela okhukhola amakhuwa kalachamisinjia Nyasaye tawe, niluhoono shina lwekhoyile okhumenya ninenyu? Niluhono shina luli mbu okhula emwifwile? Mundelere sie hano." ¹⁸ Yeso yakondoshela litimoni, nalio nilitsa elwanyi okhurula muye, naye omusiani oyo nahona okhuchaka efise fienefo.

¹⁹ Mana abeechi nibeetsa khuYeso mumefiswi nibaboola, "Shichila shina fwe khukhayilwe okhufiyiniamwo?"

²⁰ Yeso nababoolela, "Ne shichila obusubili bwenyu obutiti. Okhuba emubolela obulamba mbu, kakhaba munyala okhuba nobusubili obutiti kata shinga akhafwa khelisatsi, onyala okhuboola khushikulu shino, 'Rula hano otsie halia; ne shinyala okhusuta, ne shibulabakhwo eshitinyu khwinywe tawe." ²¹ Nebutswa litimoni lie imbia yino shilinyala okhurula litsie, khulali okhubirila khukhusaya nende okhufunga tawe."

²² Olwa bali bashimenyile Galilaya, Yeso yaboolela abeechibe, "Omwana womundu alanyalilwa okhuhanwa mumakhono kabandu, ²³ nabo balanyalilwa okhumwira ye, nakhwo khunyanga yakhataru alilamusibwa." Abeechi babelela po.

²⁴ Olwa bali bakheetsa  Kaparinaumi, abasololi bobushuru betsela Petero nibamureeba, "Omwechesia wenyu alipanga obushuru nomba tawe?"

²⁵ Yeyama, "Hee," Olwa Petero yeetsa munzu, Yeso yaboola ninaye mbelio ne naboola, "Oparanga oriena, Simioni? Ni khubena babaruchi bieshialo babukulanga khubo obushuru? Khubana babo nomba khubandi?"

²⁶ "Okhurula khubandi," Petero nakalusia. "Mana abaana nabalakhule," Yeso naboola. ²⁷ Nebutswa okhubula okhulerela abatooyi bobushuru okhwikumula, tsia munyanza, sukunamwo olulobo, mana oyiniemwo inyeni iranjilila okhurula. Loba wakhasamia omunwa kwayo, olanyoolamwo ifetsa. Chibukule ne ochihane khubatooyi bobushuru khulwa yiwe nende sie."