¹ Abafarisayo nende Abasadukayo betsa nibamutema ye khulokhumureeba ye okhubamanyia bo eshilolelo okhurula khwikulu. ² Nebutswa nabakalusia nababoolela, "Nikhuli khukolooba, muboola, 'Obwiile bulaba obulyayi, okhuba likulu nelitsayi.' ³ Nalwo lwoluba mumabwebwe, muboola, 'Bulaba lifumbi, okhuba likulu nelitsayi namalesi.' Mwamanya okhukalula obuloleshi bwelikulu, nebutswa shimunyala okhukalula efilolelo fiefise tawe. ⁴ Olwibulo lwabononi nende abaheyi bakhabanga eshilolelo, nebutswa shibulaho eshilolelo shiabakhahesibwe tawe shilali eshilolelo shia Yona." Mana Yeso nabalekha natsia khululwe.

⁵ Olwa abeechi batukha elubeka lundi olo, bali bebilile okhubukula omukaati. ⁶ Yeso nababoolela, "Henjelesie mana mube meso khulwa limela liaBafarisayo nende abaSadukayo."

⁷ Abeechi baparirisia abene mubo nibaboola, "Nilwokhubeela shikhubukule omukaati kwoosi tawe."

⁸ Yeso yali namanyile lino ne naboola, "Enywe abobusubili butiti, shichila shina muparirisinjia hakari wenyu mana muboola mbu nilwokhubera shimuchinjile omukati kwosi tawe? ⁹ Shimuhulilanga tawe? Shimwitsulilanga emikati chirano khubandu efikhumila amakhumi karano (5000), nende efimwelo efinji fiakhung'asibwa tawe? ¹⁰ Nomba emikaati musafu khubandu efikhumila amakhumi kane (4000), nende efimwelo efinji fiamwakhung'aasia tawe? ¹¹ Kakhaba kariena mbu shimwamanya mbu shindaboolanga khunywe okhulondokhana nemikaati tawe? Henjelesie mana mube meso khulimela liaBafarisayo nende abaSukayo." ¹² Mana bamanya mbu shiyali nababoolelanga okhuba meso khulwa limela mumukaati tawe, nebutswa okhuba meso okhurulana namechesio kabaFarisayo nabaSadukayo.

¹³ Bulano olwa Yeso yoola baboomumahanga Kaisari yebuFilipo, yareba abeechibe naboolanga, "Abandu baboolanga omwana womundu niwina?"

¹⁴ Baboola, "Balala baboolanga Yohana omubatisia; abandi, Eliya nabo abandi Yeremia, nomba mulala khubaroobi."

¹⁵ Yababareba bo mbu, "nebutswa nenyu muboolanga nisie wina?"

¹⁶ Khukhukalusia Simioni petero yaboola, "Niwe Kristo, omwana waNyasaye wumenyanga."

¹⁷ Yeso yakalusia namuboolela, "Oweyikhabi niyiwe, Simioni owana wa Yona, okhuba omubili namatsayi shibikhufwimbulile lino khuyiwe tawe, nebutswa Papa wanje ouli mwikulu. ¹⁸ Khandi siesi ekhuboolela yiwe mbu oli Petero, Nakhwo khulwanda luno ndalombakhakhwo ehekalu yanje. Efilibwa fiemakombe shifiakhabekhwo nende amani khuko tawe ¹⁹ Ndilikhuhelesia tsifunguo tsiobwami bwomwikulu. Shilia shiosi shioboha khushialo shibohwa mwikulu, ne shilia shiosi shiobolola khushialo shilibololwa mwikulu." ²⁰ Mana Yeso nalachilisia abeechibe okhulekha okhuboolelakhwo mulala yesi mbu ye niye Kristo.

²¹ Okhurula efise fienefo Yeso nachaka okhuboolela abeechibe mbu okhuula atsie Yerusalemu, anyakhane mufindu efinji hasi wamakhono kabakofu nabakhulundu betini nende abahandichi bamalako, yerwe, mana asulumusibwe akalushe mubulamu khunyanga yakhataru."

²² Mana Petero namukhwesa namuyila elubeka namuboolelanga, Omwami! Lino shilienyekha likhwikholeshekhwo tawe!"

²³ Nebutswa Yeso yeshebukha mana naboolela Petero, "Kalukha inyuma wanje, Eshishieno! Khulwanje oli lichina lwokhwikumulakhwo, khulwa shoparangakhwo efindu okhulondokhana nende Nyasaye tawe, nebutswa efindu filondokhana nende abandu." ²⁴ Mana Yeso naboolela abechibe, "Kakhaba mulala yesi yenya okhunondakhwo sie, okhuula yekane omwene, abukule omusalabakwe, mana yanondekhwo sie. ²⁵ Okhuba wulia yesi wenya okhuhonia obulamubwe yetsa okhubukosia bwo, naye wulia yesi wukosia obulamubwe khulokhubela sie alanyalilwa okhubunyoola bwo. ²⁶ Okhuba nishina shiobukhala khumundu kakhaba anyoola eshialo shiosi khulokhukosia obulamubwe? Nashio nishina shiomundu anyala okhuhana elubeka womulamu bubwe? ²⁷ Okhuba omwana womundu alinyalilwa okhwiitsa muluyali lwasamwana halala nende abamalaika keke. Mana anyalilwe okhuhana eshihanwa buli khumundu okhulondokhana nebikholebie. ²⁸ Akatoto emuboolela, khuli nende balala mwinywe basinjile hano balalitsamakhwo lifwa tawe okhuula balole omwana womundu niyetsanga mubwamibwe."