¹ Kolei Yesus kole bana bewe hatakkiwe tangage haneweNa inna, Nyi linage tabara ana hakodoNa. ² “Mi um tadawe duda laddo moge lado madakka Paskah diki dage, mono Anana Kadadi ata enga yidani ba kadailoni.”

³ Bewalge, tangada rato kapala mono tua-tua kabihhu ata rada kahhayi tangada ta Hadau Rato Madakka, ka ngaranai Kayafas. ⁴ Mono, yidda da woroge ka yappayi Yesus waige ma tipuda mono hamateyi Nyi. ⁵ Ta nyiduwe yidda lidage, “Illa dakage kawih haka batamrage kakoge lado madakka dajalage illa dage kawihhaka ta jonga ata buta.”

Yesus Da Lewuyi Lawai

⁶ Batauge, kolei Yesus ba dani ta Betania, ta ummanai Simon katobi, ⁷ wu lawai ammini tabaraNa wu gori kadehi kamarraha ngihina we bau mumra hada bikta hina, mono lawai nada na burru nage ta ka takku nai Yesus kole Nyi ba tamrana yayo. ⁸ Kole anaha kodoNa etawe, yidda da bani mon lidage, “Ahha ma wala waige inna? ⁹ Oro, we bau mumra inna dadiwe ba malajage oro hige bikta lawe mono kayiki dage tabarada ata milla.”

¹⁰ Tabolo, Yesus, na tadawe hadada inna, linage tabarada yidda, “Ahha mamu hama yillayi lawai nadde? Oro, nyi rayi nage wu harayi kadahha tabaraGu. ¹¹ Oro, mi dau midi ata milla ka olegimi, tabolo mi walem ole hangattak maga Nauwa. ¹² Kole lawai nada bana buru gage we bau mumra inna ta tauGu, nyi na rayige tutu ha iyaka ba taniga Nauwa. ¹³ Nauwa luguge katau takkana tabarami ba langka gika li ege ate inne ba talarage ta hagala panu tana, agawe harayi bena nadde lawai enga dulka dummo dage kawuwe li hanamu tubana nyi.”

Ha Iyaka Tutu Kobo Ateni

¹⁴ Bewalge, wuyo wali kabulu dudana ana hakodoNa, ka ngaranai Yudas Iskariot, kako ta rato-rato kapala, ¹⁵ mono linage, “Mi enga agana ha yimuga bago yikagimini Nyi tabarami?” Mono, yidda da pohtawe tallu kabulu arpiyo amaha kaka tutuna. ¹⁶ Mono, wale neda, nyi na mayegage mahiggo kadahha ki bana yiyi Yesus.

Ha Inyaka Tutu Paskah

¹⁷ Batauge, ta laddo ka wungana Kababa kabba, ana hakodo amamidi tabaranai Yesus mono naka nukka, “Giyo hadau kabu atemu hadau ha inya kamage khakulla Paskah tubaMu?”

¹⁸ Yesus na balehawe, “Tamami taha rona, tabarana wu ata, mono taknage tabaraNa, ‘Guru linage, “Rahigge na dahhe kawe. Nauwa ug raya ramege Paskah ta ummamu oledi anaha kodoG.” ¹⁹ Anaha kodo da rayige katauna Yesus paha nauna ta barada yidda, mono paha inyaka Paskah inna.

²⁰ Batauge, kole manari gak nage, Yesus ngodo yayo ole dangadi kabulu duda ana hakodo. ²¹ Mono, yidda tamrada yayo Nyi linage, “Nauwa ug takkiwe katau takkana tabrami inna wu wali ta jongami dani kama lajaga Nauwa.” ²² Yidda nama ropoyi ateda mono dihha-dihha kapudage hanewe tabaraNa, “wale nauwag na Mori?”

²³ Mono, “Nyi, ka yaklani limmana lari ta koba weha enu olega Nauwa, yikna kama lajaga Nauwa. ²⁴ Anana Kadadi ata enga kakoNa tujjawe kama tolha tutuna Nyi. Tabolo, li lokowela halina ata nada, orona nyi Anana Kadadi ata ba malajani! Atna rehi dahha hoge ata nada nyi aina dadi memahe.”

²⁵ Bege Yudas, kama lajanai Yesus, linage tabaraNa “Walle nauwagna, Rabi?” Yesus linage tabarana, “Yau um takki wikki dauwe.”

Liha Namu Tutu Tauna Mono Ranai Kristus

²⁶ Kole yidda tamrada yayo, Yesus na ngalayi kababa. Mono, kole bana hamaringiyi, Yesus na hibiyi mono na yiyi ta anaha kodo lohho linage, “Ngala yila mono yagela, inne tau Guge.”

²⁷ Bewalge, Nyi na ngalayi koba weha enu, na takki lima waina, mono na yidi tabarada yidda linage Nyi, “Tangama, enumla wali tabarna. ²⁸ Oro, inne raguGe, ra hajaji, kama joku tutu ata buta ka pawalidi jalana. ²⁹ Nauwa luguge tabaramu inna Nauwa walegu hilu enu magela wu puyo anggur nadde, wali batauge kahha laddo nimmi, kole Nauwa bagu enu anggur ka beru bagu ole gimi ta Kalingora AmaGu.”

³⁰ Kole manyanyini wu manyanyi, yidda kako dage ta lete Zaitunna.

Petrus Na Kabaluni Yesus

³¹ Bege Yesus linage tabarada ana hakodoNa, “Mi tangamienga widdami gaddi nehhe orogu Nauwa. Oro dage kama tolha,

‘Nauwag ug paluyi kajawa bebbe, mono bebbe rada hai-hai da wali ta oleda.’

Zakaria 13:7

³² Ta nyiduwe, kole Nauwa kaddewa, Nauwa enga ulugimi mi ta Galilea.”

³³ Petrus linage, “lokko tangada bada widdakna oroMu, nauwa enga walegu widak mawa.”

³⁴ Linagei Yesus tabarana, “Nauwa luguge katau takkana tabarami tagadi inne mema, manu aina kuku hoyi, yau um kabaluga Nauwa hadallu wudana.”

³⁵ Petrus linage tabaraNa, “Lokko nauwa bagu mate dangaGu, nauwa walegu kaballuk magu Yau!” Tangada ana hakodo wadeka lida kahha jalage.

Yesus Na Sembayangna Ta Getsemani

³⁶ Bege Yesus dikki oledi ana hakodoNa tahha dau ka ngarana Getsemani mono Nyi linage ta ana hakodoNa, “Ngodomila inne, tamaragu Nauwa banedaga bali bagu sembayangna.” ³⁷ Mono, Nyi nangidiyi Petrus mono kadudana anai Zebedeus oleni Nyi, mono Nyi kapu nage maropowe atena. ³⁸ Bege, Nyi linage tabarada yidda, “AteGu marabeha hinguwe, bagu padage mera nage mate. Engamila inne mono engamila ha inyaka bamu olega Nauwa.”

³⁹ Mono, Nyi na marau hodi, lohho na kawojo mataNa jojawe tana mono sembayang, linage Nyi, “AmaGu, palele gani koba wepa enu nade wali tabaraGu. Ta nyiduwe, illa hakabu ate dagu kadadi, tabolo hakabu ateMu.” ⁴⁰ Bewalge, Nyi na hagga ta ana hakodoNa mono na dikkidi yidda tamrada dura. Nyiwe, Nyi linage tabrai Petrus, “Nyi mi walem tah hing mage pa inyajka ole dangaga Nauwa ka dihha Jam kina? ⁴¹ Inyamge mono sembayangnala dajalage mi ilam monumi lari ta kama kaba. Waddi naha doku tabolo kanada na lojawe.”

⁴² Yesus kakol nage hadu waina mono sembayan gna, linaGe, “AmaGu, nyi nade koba weha enu aina lelega dukka dahege Nauwa bagu enuni, hakabu ateMu kana dadi kawe.”

⁴³ Hadakka pinage, Nyi ammini dikidi yidda dura oro matada bikta hinguyi. ⁴⁴ Nyiwe, Nyi na tanadi yidda, mono Nyi kakol nage, lohho na sembayangna hadallu wuda waina, na takkiyi hannewe kaha tujja.

⁴⁵ Begge Yesus hagga nage ta ana ha kodoNa mono linage, “Duramige batauge mono ngahumila. Etawege, rahige kiki dahe kanage mono Anana Kadadi Ata ba yiyi ta limada ata kajala. ⁴⁶ Kademge, maida yitta kada kako. Etaige, ata ka yiwa Nauwa na dahekabe.”

Yapayi Yesus

⁴⁷ Batamranai Yesus bana hanewe, Yudas, wu wali ta kabulu dudana ana hakodo nada ammini. Ka oleni nyi, butala ata kawaina katopo mono palu todo, wali rato-rato kapala mono bai ata kabihu ata rada. ⁴⁸ Batauge, nyi ka yiyi Yesus na yidi tadka yidda, linage, “Iya dahingkayi nauwa ha ngak hagu Nyiknala, yappayi Nyi.” ⁴⁹ Yudas geha nage daheka tabarai Yesus mono linage, “Maringina Rabi!” Monoi, Yudas ngakhanani Nyi.

⁵⁰ Yesus linage tabarana, “ole, rayigege hakabu atemu bamu mai.”

Bege ata buta rada dahe kadage, narroni Yesus, mono yappayi Nyi.

⁵¹ Mono, etawe, wu ata wali ta yidda olenai Yesus naha joladi limmana, na lahhuwe katopona, na kadukani ata paha lewana rato madakka nada, mono lakatani katilluna.

⁵² Begge, Yesus linage tabarana, “Hope haggawe katopomu, oro tangana ata ka waina katopo enga lilokona oro katopo. ⁵³ Waleka, yau bamu hangadage nauwa walena dadik mawe bagu karaiwa wali ta amaGu, mono Nyi, batauge dummoge rehi wali kabulu duda ditra malaikat bada tulga Nauwa? ⁵⁴ Tabolo, aga lian dawe Jurata Bihha enga pannu howe katakkiwe inna bana dadi howe?

⁵⁵ Ta mahiggo neda Yesus linage tabarada ata buta, “Appa natujawe gabana parampok mi mamu ngidmi katopo mono palu todo bamu yapawa Nauwa? Diha lado-dihha lado, Nauwa ug ngodowa ta Umma Allah mono mi walem yapak mawa Nauwa. ⁵⁶ Ta nyiduwe, tangage inna na dadiwe kana banuge hatakki ta jurata nabi.” Bewalge, tangada ana hakodo tanani Nyi mono malai dage.

Tangada Pa Ama Yahudi Da Hokuni Yesus

⁵⁷ Yidda ka yappayi Yesus da ngidiyi Nyi tai Kayafas, ka Rato Madakkana, hadauda ahli-ahli Taurat mono tangada bai ata da makahha. ⁵⁸ Lohho, Petrus dokuni Yesus wali kamarau kahha ta aro ummana Rato Madakka. Mono, Petrus tama, ngodo ole dangadi tangada ka irruyi kapiku etawe dukkage.

⁵⁹ Batauge, tangada rato kapala mono tangada Samhedrin mayegana hanewe paleka tabarai Yesus dajalage kana dadiwe ba hoku mateni Nyi. ⁶⁰ Ta nyiduwe, yidda wale dadik mawe taboka loko buta duyi kabaige hanewe paleka ka maiyo. Bege, dadi duda ata ka hudda, ⁶¹ mono lidage, “Ata nade linage, ‘Nauwa dadiwe bagu ha bohtage Ummanai Allah mono hakadde haggawe katauda laddona.”’

⁶² Bewalge, Rato Madakka na dede mono linage tabarai Yesus, “Appa wale lakma balehamu Yau? Agawe rade ata pa takkida tabaraMu?” ⁶³ Tabolo, Yesus enga kadanna. Mono, Rato Madakka nada linage tabarai Yesus, “Nauwa ug hauragu Yau waige ngarai Allah ka morha inna yau kamu takkiwe tabarama nami, appa Yau Mesiasuwu, Anai Allah?”

⁶⁴ Yesus linage tabarana Nyi, “Yau um takki daubewe. Ta nyiduwe, Nauwa luguge tabaramu wali inna batauge mi enga etamini anana Kadadi Ata ngodo tabara limma kawanana Ka hada bikta parehana, mono ammini ta panu karabba ta langta.”

⁶⁵ Bewalge, Rato Madakka hirrawe kalabbena mono linage, “Nyi naha palle bewe! Agak hoyi hama yega dangada saksi? Etawe, mi um range dau bewe hanewe pallekana Nyi. ⁶⁶ Aga linawe paha ngadmu?”

Tangada pa ama Yahudi rada da balehawe, “Nyi na marakawe ba hoku mateni.”

⁶⁷ Begge, yidda da tarum nage mataNa mono da jurrayi Nyi. Mono, wadeka da kapokayi Nyi. ⁶⁸ Yidda lidage, “Hurru balewuge tabarama nami, ta Mesias; iyayi ka paluwu Yau?”

Petrus Na Kaballuni Yesus

⁶⁹ Batauge, Petrus ngodo ta bali haddu aro umma mono wu lawai amini tabarana linage, “Yau jala ole muni Yesus, ata Galilea nada.” ⁷⁰ Tabolo, Petrus naka balluni ta aro matada yidda tangada, linage, “Nauwa walegu tadak mayi iyayi ha takkimu.”

⁷¹ Kolei Petrus huna ta binna kalla, dani lawai wadeka etayi nyi mono linage tabrada ata kadana taha dau neda, “Ata nadde ole nani Yesus wali ta Nazaret.”

⁷² Mono, hadakka piwalnage Petrus kaballuni bana haura, “Nauwa waleg tadak mayi ata nada.” ⁷³ Walena mojage, ata kadede taha dau neda dahekayi Petrus mono linage, “Yau jala dummu wu wali ta jongada yidda oro hada hanewemu na hirawe.”

⁷⁴ Bege, Petrus halege nage katukku mono haura linage, “Nauwa waleg tadak mayi ata nada.” Mono, kadadaka ngidiwe, manu kuku nadi. ⁷⁵ Mono, Petrus apewe hataknai Yesus. ‘Aina kuku hoyi manu, yau bada hadallu wudamu kaballuga Nauwa.”