¹ Batauge, kole kokokawe, tanngada rato kapala mono bai ata kabihhu ata rada ngalawe pohtada tutu nai Yesus kapiku hoku mateni Nyi. ² Mono, yidda da kattini Yesus, lohho dangidiyi mono yiyi Nyi tabaranai Gubernur Pilatus.

³ Kolei Yudas, kama lajani Yesus, etawe Yesus ba hokuni, nyi pah haweatena mono na pahaggadi tallu kabullu amaha kaka tabarada Rato-rato kapala mono tangada bai ata, ⁴ linage, “Nauwa ug rayige jala oro bagu yiwe rayo aika jala.”

Ta nyiduwe, yidda lidage, “Lakma pa orhama nami? Inna ha orhamuge!”

⁵ Mono, Yudas na baitadi amaha rada lari ta Umma allah mono na tanadi. Lohho, nyi na kako mono dairo wikina.

⁶ Ta nyiduwe, rato-rato kapala da ngalayi amaha rada mono lidage, “Walena dahha hak maw ba ijalayi lari hadau amaha oro rade hiyo rayi.” ⁷ Nyiwe, yidda da ngalawe pohta mono waidi amaha rada, yidda da hiyo tana pepe yarro hadau rate ata li pallaka. ⁸ Nyiwe oroge, tanah inna ha ngarage ‘Tanah rayo’ kahha lado nehhe. ⁹ Waige bataudage, bannu nage agawe hatakna Nabi Yermia: ¹⁰ Yidda da waidi tallu kabullu amaha kaka bad hiw tana pepe yarro, katauna pahareha benai Mori tabaragu.”

Yesus Mono Gubernur Pilatus

¹¹ Batauge, Yesus na dede ta arona Gubernur mono Gubernur nakanuka tabaraNa, “Apa Yaukna Raja ata Yahudi?”

bale hawe Yesus, “Ngo, katauna hatakki daumu.”

¹² Ta nyiduwe, kole Nyi bada tutrayi rato-rato kapala mono tangada bai ata, Nyi walena bale hakma hodi ak.

¹³ Begge, Pilatus linage tabrana Nyi, “Apa Yau walem rangek mawe ba hadda butayi yidda pa hawau dagu Yau?”

¹⁴ Tabolo, Yesus walena bale hakmayi Pilatus, lohho dummo tutu wuyo ha wau dani dajalge Gubernur nada naha ngatara.

Pilatus Wale Na Dadik Mawe Pahilpani Yesus

¹⁵ Batauge, nahiyi laddo madakka, Gubernur na dadiwe pahudi tubada ata buta, wu ata ta gallu ha kabu ateda yidda. ¹⁶ Ta mahiggo neda, yidda dani ata hatama ta gallu kaha ngarana, ka ngaranai Barabas. ¹⁷ Nyiwe, kole ata buta makahha, Pilatus nakanukayi yidda, “Iyayi ha baimu papahalagu, Barabas walekai Yesus, pahha ngarai Kristus?” ¹⁸ Oro, Pilatus tadawe oro kawida, yida mada ngidiyi Yesus tabarana.

¹⁹ Kole Pilatus ngodo ta kursi dau matijana, ole ummana naha nau tabarana, “Ilam rayi kage aga ka hingna tabara ata katena nada. Oro, nauwa buta bewe bagu mayillawa tanga ngara hada laddo nehe ta naga nippi orona Nyi.”

²⁰ Ta nyiduwe, rato-rato kapala mono bai ata da rayidi pahatena dangada ata buta kapikku karayi dani Barabas mono hamateyi Yesus.

²¹ Gubernur naka nukka tabarada yidda, “Gidi walikadudana ata ha labu atemi pa pahalagu tubami? Mono, yidda lidage, “Barabas!”

²² Pilatus linage tabarada yidda, “Batau dage, aga dahona harayi guni Yesus, pa hangarai Kristus?”

Yidda tangada liadge, “Kadiloni Nyi!”

²³ Mono, Pilatus naka nukayi, “Ahha? Nyi japata agawe haryina?”

Ta nyiduwe, kiki wangta dage kawula wali, “Kadailoni Nyi!”

²⁴ Kolei Pilatus etawe ba aina mukkage pohtawe, tabolo kawihha dawe kadadi, nyi ngala nage weyo baha yi limmana ta aro ata buta rada mono lidage, “Nauwa walegu jalak mawa rana nadde ata. Inna ha orha dau mige!”

²⁵ Mono, tangada ata rada, “Rana Nyi dage tabarama nami mono anama nami!”

²⁶ Begge, Pilatus pahallayi Barabas tubada yidda mono paluyi Yesus, Pilatus na pahalayi Nyi kapiku kadailoni.

Tentara Pilatus Tere Kayi Yesus

²⁷ Bewalge, tangada tentara gubernur ngidiyi Yesus ta tahha dauna gubernur mono kahhayi tangada tentara Romawi kilorani Nyi. ²⁸ Yidda da lai dadi kalabenai Yesus mono da tauni kalbbe madakka malli melo tabaraNa. ²⁹ Mono, kole bada mayanana wu kataupa tara warri tangada, yidda da taunage ta katakkunai Yesus, gayu kadogi ta limma wanana Nyi, mono kawojo ta aroNa, mono ter kayi Nyi, lidage yidda, “Maringna, Raja ata Yahudi!”

³⁰ Yidda da tarummiyi Nyi, da ngalayi kadogi nadda, lohho palu nani ta katakku Na. ³¹ Kole yidda tere kayi Nyi, yidda da lainage kalabe madakka malli melona wali tai Yesus, mono da tau hagga nadi kalabbe dauna Nyi, monno da Ngidiyi Nyi kako ba kadiloni Nyi.

Yesus Kadailoni

³² Kole tangada tentara rada huna, yidda da tabo kayi wu kabani wali ta Kirene ka ngaranai simon. Yidda da karuhhuyi Simon kada ditayi kadailonai Yesus. ³³ Mono, kole yidda dikki ta wuha dau ka ngarana Golgota, ngara wadekage “Hadau Katakku,” ³⁴ yidda da yini Nyi anggur bana enu paha kahha wai kapddu, mono kole bada hajola nage Nyi walena auma enuge. ³⁵ Kole yidda kadailoni Yesus, yidda daha bawe nadi kalabbeNa ta jongada yidda waidi mowala. ³⁶ Begge, yidda ngode dage mono torroyi wali neda. ³⁷ Mono, ta panu katakkuNa, yidda da tauni hatolha tabaraNa, “Nadde Yesus, Raja Ata Yahudi.” ³⁸ Ta mahiggo neda, dadi duda ata japata pahha dailo ole dangani Yesus. Wuyo tabara kawanana mono wu wali tabara kalina. ³⁹ Mono, ata kapalaka da tere kayi Nyi hagapege kikkage katakkuda, ⁴⁰ mono lidage, “Yau kaha tabohtage umanai Allah mono hakadde hagawe katuda laddona, pahoilage tau dauMu! Nyi Yau Ana Allahwu, burru holawu wali taka dailo nada!”

⁴¹ Tauda dummo nage rato-rato kapala, oledi ahli-ahli Taurat, mono bai ata terekayi Yesus, lidage yidda, ⁴² “Nyi pahoilayi ata wadeka, tabolo Nyi wale na dadik mawe pahoilage tau dauNa. Nyi Nyiyo ba Raja Israel, pahai holani Nyi kana burru wali taka dailo inna batauge mono yitta kada hatenayi tabaraNa. ⁴³ Nyi naha tena tabaranai Allah, nyi pahai kani Allah pahoilayi Nyi batauge, nyi Allah bana kabu ateni Nyi. Oro Nyi wiki dau linage, ‘Nauwa anai Allah.”’ ⁴⁴ Rada ata japata pahha dailo ole dangani Nyi na tereka jalayi.

Matenai Yesus

⁴⁵ Batauge, wali jam anni, kapagtage ktangage hadau inna, kahha ja bani dihha. ⁴⁶ Ba katutu kawe, ta jam kabani dihha, Yesus na kawula waige liNa kama wangta, linaGe, “Eli, eli, lama sabakhtani?” ka ngihi dana, “AllahGu, AllahGu, ahha Yau mamu tanaga Nauwa?”

⁴⁷ Mono, kapirana wali ta yidda kadede neda bali, kole yidda bada rangewe inna, yidda liadage, “Ata nadde kamaika nani Elia.”

⁴⁸ Hayaddawe, wu wali tajongada yidda malai, mono ngalayi lumta watu, ha maglage waige anggur mayege, mono katige ta wu kaito, mono yiwe tabaranai Yesus kana enuge. ⁴⁹ Ta nyiduwe, wadeka lidage, “Maida kada etayi, appai Elia enga ammini bana pahoilayi Nyi.”

⁵⁰ Mono, Yesus na kawulla hadaka piwali waige lina kama wangta mono na yiwe NgahuNa.

⁵¹ Mono, etawe, kaba lari ta umma Allah majiraka dadi dudawe wali dete kahha bawa, mono panu tana gedowe, mono watu wakkayi. ⁵² Tangadi rate ma bugerayi, mono butayi tau ata langna ka matebe kadde hagga. ⁵³ Mono, kole bada huna wali ta rateda, ba beyo kadde haggai yesus, yidda tama ta harona langna mono da hatingo wikina ta ata buta.

⁵⁴ Batauge, kapala tentara, mono yidda kaoleni hamatarani Yesus, kole bada etawe yidda epu mono tangage ka dadi inna, da madauta mono liadage, “Tenawe, Nyi Ananani Allah!”

⁵⁵ Neda bali, butayi lawai katorro marauyi, kadokuni Yesus wali ta Galilea bada hanukkuyi Nyi. ⁵⁶ Ta jongada yidda dani Maria Magdalena, Maria inyai Yakobus monoi yusuf, lohho inyada wali ananai Zebedeus.

Yesus Tanini

⁵⁷ Kole mata laddo manari gaknage, ammini wu ata pote wali ta Arimatea ka ngaranai Yusuf, nyi dummo na dadi ana hakodo beni Yesus. ⁵⁸ Nyi na kako tai Pilatus karayiwe karaogonai Yesus. Lohho, Pilatus nahalewayi kana haburruge karogonai Yesus mo yiwe tabaranai Yusuf. ⁵⁹ Mono, Yusuf na ngalawe karogonai Yesus, mono kaboroNi Nyi waini kaba talujjana kamurraha, ⁶⁰ mono naha baikani Nyi tarate kaberu, rate dauna, pa koja bena ta lete watuna. Lohho, Yusuf na koglani wu watu madakka ta binna rate nada mono kako. ⁶¹ Mono, neda bali, dadi Maria Magdalena mono Maria wadeka ka ngodo ta aro rate inna.

Ratenai Yesus Da Jawawe

⁶² Damma hege tana, ta laddo ha inyaka ngahu, rato-rato kapala mono ata Farisi da kahhayi ta aronai Pilatus. ⁶³ Yidda lidda ge, “Mori, nami ma apewe kole ka palekka nadda badda morhaho, Nyi linna mema, ‘Kole tauda laddoge, Nauwa enga kadde haggaGu. ⁶⁴ Oro inna, parehayi kadda jawayi rate kahha tauda laddo, ba ragga ammi kadi ana hakodoNa bad kedu kani karogoNa, mono lidage ta ata buta, ‘Nyi na kaddebe wali at ata mate.’ Mono, matipu kamurri inna enga na rehi ai tidda hoge wali ka ullu.”

⁶⁵ Pilatus linage tabrada yidda, “Yau dadi kajaga. Kakowu, jawayi tauna hatada bemu.” ⁶⁶ Lohho, ydda da kako mono da jawayi rate nada oledi kalibbo jaga, lohho da kuhiyi toni watu nada.