¹ “Bewalge Kalingora Surga na tujja dawe kabulu bau winne kangidi lat wena mono kako tabo kayi kabani kaha ummana. ² Limma ta jongada yidda kabanga, mono limma wadeka maniwola paha ngadda. ³ Kole kabanga rada ngidiyi latti weda, yidda wale da ha gannak mana we latti heka. ⁴ Tabolo, kama niwola paha ngadana da ngidi we latti ta gori marraha paha inyakana yidda. ⁵ Batauge, kole kabani kahha ummana dikki hodiwe ammini, yidda tangada dura ngodo dage mono dura.

⁶ Tabolo, tillu gaddi hewe dadi kawula, ‘Kabani kaha ummana ammini! Hunage kam tabokayi!’

⁷ Bege, tangada bau winne radda kadde dage mono hamap pahadi latti weda yidda. ⁸ Mono, kabanga lidage tabarada kama niwola paha ngada, ‘Yiki gama hodi we latimi oro latti wema hodi moyi badda nadi.’

⁹ Ta nyiduwe, kama niwola paha ngadana bale hawe, ‘Walekma, walna tutuk mawe nami mono miyo. Rehi naha dahha dahoge, kakomge ta kama lajana we latti mono kam hiyo tangami.’

¹⁰ Tamrada yidda kako hiyo we latti, kabani kaha ummana nada ammini, mono yidda kahha iyaka, tama ole dangani nyi taha kulla ha ummana, mono binna toniyi.

¹¹ Kole innage, ammi jaladi bau winne wadeka mono liadage, ‘Mori-mori! Bugerak gama binna dimma.’

¹² Ta nyiduwe, nyi na bale hawe, ‘Tau takka nage, nauwa lugugimi tabrami, nauwa wale gu tadak mami.’

¹³ Nyi oro bataudage inna, pa inya kami la oro aim tada mowe ladoge waleka rahige.”

Hatujja Tutu Tauda Kahha Nukku Ha Ulla

¹⁴ “Oro, Kalingora Surga tuajwe wu ata ka kako ta bali bannu, kamai kadi ata paha lewana mono bana yiyi hadauna tabarada yidda. ¹⁵ Tabarana wu ata, nyi na yini limma ammaha. Tabarana wu wali, duda ammaha tabarana wu walli, wuyo ammaha. Dihha-dihha dokuge kulahada. Bege, nyi kako nage. ¹⁶ Ata kahibba limma ammaha nada wing kako nage, mono na bungayi limma ammaha wali. ¹⁷ Tauda dummo nage ka hibba duda ammaha, nyi na bungayi duda ammaha wali. ¹⁸ Ta nyiduwe, ata ka hibba wuyo ammaha nada kako nage kojani tana, mono kabunyini ammaha morina nada.

¹⁹ Moja hege innage, mori da rada ata paha lewa ammini mono kamai kadi yidda. ²⁰ Ata kahibba limma ammaha nada ammini ngidyi limma wali ammaha, linage, ‘mori, yau um yigadi ammaha limma tabaragu. Etayige, nauwa ug bunga beyi limma ammaha wali.’

²¹ Morina nada linage tabrana, ‘Dahha dahingge, ata halewagu ka dahha atena mono ka mikku. Yau um mikkuwu ta hada kamarrahaki, nauwa ug keke tawu yau kabutala kama hada, tamawula lari ta laga hara morimu.’

²² Mono, ata kahibba duda ammaha dummo ammini mono lonage, ‘Mori, yau um yigadi duda ammaha tabaragu. Etawege, nauwa ug bunga beyi duda ammaha wali.’

²³ Morina na bale hawe, ‘Dahha da hingge, ata paha lewagu kadahha moono kamikku. Yau um mikkuwu ta hada kamarraha, nauwa ug keketawu yau kabuta hada, tamawuge lari ta lagahar morimu.’

²⁴ Bege, ata ka hibba wu ammaha ammi jalani ta morina mono linage, ‘mori, nauwa ug tadawu ba ada kabokalawu, kamangatti taha dau ai dau habbaramu, mono bamu kahhawu ta hadau ai dau habaramu winni. ²⁵ Oroge inna, nauwa ug madautawa, mono ug kakowa kabunyini ammaha nada lari ta tana. Etayige, yau um dauni aiha daumu.’

²⁶ Tabolo, morina bale hawe mono linage tabrana, ‘Yau ata paha lewa ka japata mono ma yau kahoki! Yau tadawe inna nauwa bagu mangattiwa taha dau ai habaragu mono bagu kahha wa taha dau ai habaragu winni. ²⁷ Oroge inna, doku dage yau um ijala dahoyi ama hagu ta dau ijala amaha mono kole bagu haggawa enga hiba guni amma hagu lohho bungana.

²⁸ Ngalayi wuyo ammaha nada tabarana mono yinani tabarana nyi, kabuluna amma hana nada. ²⁹ Oro, tangana ata kamanguna enga yiwalidi, mono nyi enga majabolana. Ta nyiduwe, wali ta ata ai kamanguna, lohho dummo agayi hadauna nyi enga ngala nadi. ³⁰ Baitani ata paha lewa nade ai ka mangu gauna lari taka pagtana kahada kikka. Taha dau nedda dage hoyo mono hangaktana ngudu.”’

Yige Rakage Anana Kadadi Ata

³¹ “Kole Anana Kadadi ata ammini tama nadaNya, mono tangada malaikat bana oledi Nyi, lohho Nyi enga ngodona ta hadau manadaNa. ³² Tangadi ata enga makahada ta aroNa, mono Nyi enga ha watte nadi yidda wali ta oleda, katujjana kajawayi kaha wattedi bebbe wali taka meme. ³³ Mono, Nyi enga na tauyi bebbe ta bara limma wanaNa, mono kameme ta limma kali.

³⁴ Bege Raja enga lidage tabarada yidda tabbarra kawanaNa, ‘Maimge, mi paha nyurruna AmaGu, dau gege Kalingora parehana paha inyaka tutumi wali kawungage panu tana. ³⁵ Oro kole Nauwa kalabawa, mi yiga Nauwa hayayo. Nauwa ug mariwa mono yau um yiga ha enu. Nauwa, ba ata li palakawa, mono yau um kamai kaga Nauwa tama. ³⁶ Nauwa bagu kaloluwa mono yau um tauga kalabbe. Nauwa kalawarawa mono mi um elowa Nauwa. Nauwa ba ta galluwa mono yau um mai dikkiGa.

³⁷ Lohho, ata katena rada da balehayi Nyi, ‘Mori, pirra nami bama etawu Yau kalabba mono yigu Yau hayayo, waleka mariyo mono bama yigu Yau ha wenu? ³⁸ Pirra nami bama etawu Yau ba ata li pala kaWu mono bama kamai kagu Yau tama, waleka kalolu mono bama taugu Yau kalabbe? ³⁹ Pirra nami etawu Yau kalawara waleka bata galluwu mono mai tabaraMu?’

⁴⁰ Raja nada na balehawe, ‘Nauwa tau guge katau takkana tabaramu, tau miyo bamu rayige tabarada wu wali ta ole baiGu kahadda marraha nade, miyo rayikmige tabraGu.

⁴¹ Bege, Nyi linna jalage tabarada yidda tabara kaliNa, ‘Yelana wali tabaraGu, miyo ha haurabe, lari ta latti aika badda paha iyabe tutunai Kabalka mono malaikatna. ⁴² Oro, Nauwa kalabawa mono mi walem yikmaGa hayayo. Nauwa bagu mariwa mono Nauwa walem yik maga Nauwa weha enu. ⁴³ Nauwa ata li palakawa mono yau walem kamaikak maga Nauwa tama; kalolu mono mi walem tauk maga kalabbe Nauwa; kalawara mono ta gallu, mono mi walem elok mawa Nauwa.

⁴⁴ Bege, yidda dummo da bale hawe, ‘Mori, pirrawe nami bama etawu Yau kalabba waleka mariyo, waleka wu a ata li palaka, waleka kalawara, waleka kalolu, waleka tagallu, mono aima hanukkuwu Yau?’

⁴⁵ Bewalge, Nyi na belehayi yidda, “Nauwa ug takki gimige katau takkana tabarami, katauna miyo bamu rayige ta wu wali ta yidda kahadda marraha nade, mi walem rayig mage tabaraGu.

⁴⁶ Mono, yida radde enga kakoda lari ta dau hokuyi aika dukka, tabolo ata katena lari ta morha ai kadukkana.”