Kawukku 22

Hatujja Tutu Ata Paha Lehu Ta Ha Ummana

1 Yesus naha newe piwalge tabarada yidda lari ta wu hatujja, linaGe, 2 “Kalingora Surga dadiwe baha tujjage tujana wu raja karayige ha ulla ha umma aana kabanina. 3 Mono, nyi naha lewayi ata paha lewana kamai kadi ata pa halehu be ta haulla inna, tabolo yidda wale da auma mai. 4 Nyiwe, raja naha lewa waliyi ata paha lewana wadeka, linage, ‘Takki dage ata paha lehu, Etayige, nauwa ug ha iyaka beyi hayayo. Hapu mane mono ranga kamarha tangadi ropo beyi, mono tangadi na ha iya beyi. Maim ge ta ha ulla yayo dabba ha ummana inna.’

5 Ta nyiduwe, yidda da bai halawe mono kako, wuyo ata kako nage ta omana, wadeka ta ha ulla hekada, 6 mono wadeka yappa dadi ata paha lewana raja nada, hamayillayi, mono hamateyi yidda. 7 Nyiwe, nada raja bani nage, mono naha ngididi tentarana, puda hayi kaha mateyi rada, mono tunu dage harona da yidda.

8 Bege, nyi linage tabara ata paha lewana, ‘Ha ulla ha ummana ha iya bewe, tabolo ata paha lehu rada wale da tubak ma. 9 Nyi batauda gege, kakom ge ta ngali tana madaka mono kalehudi langka piradi ata ha dikkimi ta ha ulla ha ummana inne.’ 10 Nyiwe, ata paha lewa rada kako ta kangali tana mono kahha yi tangadi ata yidda ha tabo kada, ka dahha mono kajapata. Mono, hadau ha ummana inna da panuwe kulla.

11 Ta nyiduwe, kole raja bana tama bana tabo kayi kullana, nyi na etayi wuyo ata neda bali, aika waina kalabe ha ulla haummana. 12 Nyi linage tabarana, ‘Ole bai, ahha yau mana dadi kawe tama taha dau inne aim wai mona kalabe ha ulla haummana?” Mono, ata nada kadanna. 13 Bege raja nada linage ta ata paha lewana, ‘Katti nadi limmana mono leduna, bai tani nyi lari ka pagtana kahada huna. Neda bali, enga dage hoyo mono ha ngaktana nguddu,’

14 Oro, buta ha maika, tabolo hodiki ha pede.”
Harayida Pa Ama Yahudi Kapiku Rayini Jiwa Tanai Yesus

15 Bege, ata Farisi kako mono da wuna daja lage yidda dadiwe rayini jiwatana Yesus waige haneweNa. 16 Mono, yidda ha lewayi anaha kododa yidda tabarai Yesus, oledi ata Herodian, Yidda lidage, “Guru, nami matadawu Yau lurhawu monom halarayi laranai Allah lari katena. Yau walem madautak mani langka iya hing kayi oro Yau walem etak maw hada hedda. 17 Nyi bataudage, tak holawe ha kabu ateMu tabarama nami. Appa na tenakwe bayarana walu katakku ta Kaisar mono aina dai kawe?”

18 Ta nyiduwe, Yesus na tadawe japata da yidda mono linage, “Ahha mi mam kaba ga Nauwa, ta ata dahha dete? 19 Ha tingo hola gani tabaraGu amaha tanga ge bayarana wallu katakku inna. Nyiwe yidda da yiyi walla dinar tabaraNa. 20 Mono, Nyi linage tabarada yidda.” Hada mono iya nadi hatolha rade?” 21 Yidda da bale hawe, “Kaisar.”

Bege, Yesus linage tabarada yidda, “Nyi oroge innage, bayaradi tabarana kaisar hadauna kaisar, mono hadu nai Allah tai Allah.”

22 Kole bada rangewe, yidda dahha ngatara, mono da tanani Nyi mono kako dage.
Harayi Ata Saduki Bada Rayini Jiwatanai Yesus

23 Ta lado neda mema, ata Saduki, ka yakki wale lakmage kadde hagga, ammidi tai Yesus mono da kanukawe tabraNa. 24 Yidda lidage, “Guru, Musa linage nada wu kabani mateka mono ai daka anana, angu wuna na diki dahoni ole ummana mono kana hakitage ana huhuna angu wuna kamate be nada. 25 Batauge, pituma kaha angu wuna nami. Ana bodi haha umma bena, mono mate lakma anana, mono tanani ole ummana tutu angu wuna. 26 Tauda dum nage ha duda wai, ha tauda wai, kahha ha pitu wai. 27 Duka ge tangage, lawai nada mate. 28 Ta lado rahi kadde, lawai nada iya ole umma nani wali ka pituna kaha ole baina rada? Oro, yidda tangada da ole umma beni.”

29 Ta nyiduwe, Yesus na bale hawe tabarada yidda, “Miyo jalorami, walem yapak mawe hatakki jurata bihha waleka dummu kawaha nai Allah. 30 Oro, ta lado rahi kadde, yidda wale dahha ole umma mana, tabolo malaikay-malaijat ta surga. 31 Tabolo, tutu kadde hagga ata kamate, walem bahhak mahowe miyo agawe hatakna tabarami Allah, 32 ‘Nauwak nala Allah Abraham, Allah Ishak, mono Allah Yakub? Nyi walei Allah ata matek mayi, tabolo Allah ata ka morhayi.”

33 Kole ata buta rangewe inna, yidda daha ngatara dangage inna hanuana Nyi.
Gidi Ukku Pareha Ka Hada Banningna?

34 Tabolo, kole ata Farisi rangewe inna rayidi ata Saduki kadanna, ma ubbla dage yidda. 35 Bege, wu ata wali ta yidda, ahli Ukku Taurat, kanukka tabranai Yesus bana kabani Nyi, 36 “Guru, aga pareha dahoyi kahada banningna lari ta Ukku Pareha Taurat?”

37 Mono, Yesus linage tabarana, “Yau um manawara dahoni Mori Allamu waige kalaki atemu, mono waige urra dewamu, mono paha ndamu ka bannuna. 38 Inne nyiwe pareha kahadda madakka mono ka wungana 39 Ha duda ka wai katujalana rade, ‘Yau um manawara dahoni ole atamu katujana tau daumu.’ 40 Kadudana pareha rada, na gau bedi tangadi Ukku pareha Taurat mono jurata Nabi.”
Kanukkawe Tutu Nai Mesias

41 Batauge, tamrada ata Farisi makahha, Yesus naka nukkayi yidda, 42 “Aga linawe paha ngadamu tutui Kristus? Iya anani Nyi?” Yidda lidage tabaraNa, “Anai Daud.”

43 Nyi linage tabarada yidda, “Bataudage, aga lina dai Daud, lari ta Waddi, na kamai kani Nyi'mori, ‘linage,
44 ‘Mori naha newe tabara morigu,
“Ngodowu tabbara lima kawanaGu,
kahha Nauwa bagu ha yannadi muhuMu ta kabu leduMu.’?
Mazmur 110:1


45 Nyi Daud bana kamai kani Kristus ba ‘Mori nani, ‘aga lina dawe Nyi ba ana nani Daud?” 46 Wale lakma wuak ata kabaleha langka wuka hanewe tabaraNa. Mono, wali laddo inna, lakma wu ata kabattona hilu kanukka waliyi tabaraNa.