Kawukku 19

Ajara Tutu Pahewa

1 Kolei Yesus bana bewe hatak na inna, Nyi na kako wali ta Galilea mono dikki ta kalingora Yudea, ta bali lai we Yordan. 2 Mono, ata buta ka ma ubla ata kadokuni Nyi, mono Nyi naha tagahayi yidda neda bali. 3 Kapirana ata Farisi amidi tabarai Yesus kabani Nyi mono da kanukawe, “Appa na tenakwe wu kabani pahewa dangani ole ummana waige taboleha hanewena?”

4 Lodoge, Yesus na balehawe mono linage, “Walem bahhak mawe inna Nyi, kahha dadidi yidda wali puge, hadadi yidda kabani mono lawai, 5 mono Nyi na yiwe lina, ‘Oroge inna, kabani na tana dahodi amana mono iyana, mono ha wu dangani ole ummana, mono kaduda kana wuwe tauda? 6 Nyiwe, yidda wale hil dudak mada, tabolo wuyi tauda. Oroge inna, agawe paha wunai Allah, kadadi ata ilna hewa dal kawe.”

7 Yidda lidage tai Yesus, “Lohho, ahai Musa mana harehawe yiyo jurata pahewa mono pahewa dangani ole ummana?”

8 Yesus linage tabarada yidda, “Oro kawtoge atemu, Musa mana pahaigimi mi pahewa dangani ole ummami, Ta nyiduwe, ta puge wale taudak mage. 9 Mono, Nauwa luguge tabaramu iyayi kaha hewa dangani ole ummana, dukkage oro jala atana, lohho ha umma dangani lawai wadeka, nyi na jala ata nage.”

10 Ana hakodona lidage tabaraNya, “Nyi batauda dage hada inna kaha lai mono ole ummana ilda ha ummana.”

11 Tabolo, Yesus linage tabarada yidda, “Wale tangak mana ata hibawe hatakki inna, dukka dahege yidda pa yiyo angta. 12 Oro, dadi ata aika ha ummana oro batauda memage hadana wali dadina loho wali ta tiyo inyana, mono dadi ata aika ha ummana oro aina dadi harayi ole atana wadeka, mono da dummodi ata aika dadi bana aiha dadi dauge tau dauna oro Kalingora Surga. Ba iyayi ka hibawe hada inna, nyamani kana hibawe.”
Yesus Mono Lakawa Marraha

13 Bege, kapirana lakawa maraha ngidiyi ta baraNa dajalage Nyi kana ijalayi limmaNa ta katakkuda lakawa rada moo kana sembayang ngudi yidda. Ta nyiduwe ana hakodoNa da bani di ata arada.

14 Tabolo, Yesus linage, “Pahaidi lakawa maraha rada. Ilam pade kayi yidda mai tabaraGu oro Kalingora Surga daudage ata katujana lakawa maraha rade.” 15 Kolei Yesus bana ijalayi limaNa ta katakkuda lakawa rada, Nyi kako nage wali taha dau neda.
Aga Lina Dawe Kolege Morha Aika Dukana?

16 Bege, amini wu ata tabarai Yesus mono naka nukawe, “Guru, hada kadahha aga da hona ha rayi dahogu nauwa kagu kolege morha aika mangu dukkana?”

17 Mono, Yesus linage tabara ata nada, “Ahha yau mamu kanuka taudage tabaraGu tutu agawe kadahha? Dukka wu daheyi kadahha. Tabolo, nyi yau bamu aukawu tama lari ta morha, dokudi tangadi paha reha rada.” 18 Ata nada na kanukawe tabaranai Yesus, “Gidi pareha?”

Balehawe Yesus, “Ilam hamatewu ole atam, ilam rayi kana jala ta ole atamu, ilam kedu kawu, ila ngidi kawu hanewe paleka,

19 ha aka kidi amamu mono inyamu, mono manawaradi olem ata tauna mbamu manawarage tau daumu.” 20 Bau mane nada linage tabaraNa, ‘Tangadi rada uggu doku kahha bedi, agak hoyi kadabbo?”

21 Yesus linage tabrana, “Nyi yau bamu bai kage kabanuna, kakowu mono kamau malajadi tangadi hadumu. Lohho, yidadi tabarada tangada ata milla, mono yau enga kole muge ngawu ta Surga, mono um mai dokuga Nauwa.”

22 Tabolo, bau mane nadda rangewe hatak inna, nyi kako mayilla ate nage oro nyi ata hada poteyi.

23 Lohho, Yesus linage tabara ana hakodoNa, “Nauwa takki guge kaha tau takkana tabaramu, hada biktawe ata pote tama ta Kalingora Surga. 24 Hadakka piguge, Nauwa luguge tabaramu na rehi na lewara dahoge wu unta tama ta kabonga kariha wali nada ata pote tama ta kalingora nai Allah.”

25 Kole ana hakodoNa rangewe hatakki inna, yidda na dadiwe hangatara, mono linage, “Batauda dage, iya dayi paha mane mara?”

26 Na torroyi yidda, Yesus linage, “Kadadi ata hada inna wale na dadik mawe, tabolo Allah tangage inna na dadiwe.”

27 Bege, Petrus linage tabaraNa, “Etawege nami ma tanadi tangadi mono dokugu Yau, Nyiwe, aga duyi pahibama?”

28 Mono, Yesus linage tabarada yidda, “Nauwa luguge kaha tau takkana tabarami inna mi, kadokuga Nauwa ta panu tana kaberu, kole Anana kadadi ata ngodo taha dau ngodo kama dakkala Nyi, mi dummo enga ngodomi ta kabulu duda hadau hpkudi kabulu dudana kabihhi Israel. 29 Mono, tangada ata katanage ummana, angu wuna, wattona, amana, inyana, anana waleka omana oro ngaraGu enga hiba nadi ngahu ma lapta mono enga dau nage morha aika dukana. 30 Ta nyiduwe, butayi ata ka ullu enga dadige bada murri, mono kamurri enga dadige bada ullu.”