¹ Mwekuume obutakoleranga bigambo byanyu eby'obutuukirivu mu maiso g'abantu, era bababone: kubanga bwe mwakolanga mutyo temwaweebwenga mpeera eri Itawanyu ali mu igulu. ² Kale, bw'ogabiranga abaavu, teweefuuwiranga ŋombe mu maiso go, nga bananfuusi bwe bakola mu makuŋaaniro no mu nguudo, abantu babawe ekitiibwa. Mazima mbakoba nti Bamalir okuweebwa empeera yaabwe. ³ Naye iwe, bw'ogabiranga abaavu, omukono gwo omugooda gulekenga okumanya omuliiro bye gukola: ⁴ okugaba kwo kubbenga kwe kyama: kale Itaawo abona mu kyama alikuwa empeera.

⁵ Era bwe musabanga, temubbanga nga bananfuusi: kubanga bataka okusaba nga bamereire mu makuŋaaniro no ku mambali kw'enguudo, era abantu bababone. Mazima mbakoba nti Bamalire abo okuweebwa empeera yaabwe. ⁶ Naye iwe bw'osabanga yingiranga mu kisenge mukati, omalenga okwigalawo olwigi kaisi osabe Itaawo ali mu kyama, kale Itaawo abona mu kyama, alikuwa empeera. ⁷ Mweena bwe musabanga, temwiriŋananga mu bigambo, ng'ab'amawanga bwe bakola: kubanga balowooza nga bawulirwa olw'ebigambo byabwe ebingi. ⁸ Kale, temufaanana nga ibo: kubanga Itawanyu amaite bye mwetaaga nga mukaali kumusaba. ⁹ Kale, musabenga muti, nti, Itawaisu ali mu igulu, Eriina lyo litukuzibwe. ¹⁴ Kubanga bwe mwasonyiwanga abantu ebyonoono byabwe, Itawaisu ali mu igulu yabasonyiwanga mweena. ¹⁵ Naye bwe mutaasonyiwenga bantu ebyonoono byabwe, no Itawanyu taasonyiwenga byonoono byanyu.

¹⁶ Ate bwe musiibanga, temubbanga nga bananfuusi, abalina amaiso ag'enaku: kubanga beeyonoona amaso gaabwe, era abantu bababone nga basiiba. Mazima mbakoba nti Bamalire okuweebwa empeera yaabwe. ¹⁷ Naye iwe bw'osiibanga, osaabanga amafuta ku mutwe, onaabanga no mu maiso; ¹⁸ abantu balekenga okubona ng'osiiba, wabula Itaawo ali mu kyama: kale Itaawo abona mu kyama alikuwa empeera.

¹⁹ Temwegisiranga bintu ku nsi kwe byonoonekera n’enyenje n'obutalage, n’abaibbi kwe basimira ne babba: ²⁰ naye mweterekeranga ebintu mu igulu, gye bitayonoonekera n'ennyenje waire obutalagge, so n'abaibbi gye batasimira; so gye bataibbira: ²¹ kubanga ebintu byo we bibba, omyoyo gwo gwoona gye gubba. ²² Etabaaza y'omubiri niilyo liiso: eriiso lyo bwe ribona awamu, omubiri gwo gwonagwona gwabbanga n'okutangaala. ²³ Naye eriiso lyo bwe libba eibbiibi, omubiri gwo gwonagwona gwabbanga n'endikirirya. Kale okutangaala okuli mukati mu iwe bwe kubba endikirirya, endikirirya eyo eyenkana waina obunene! ²⁴ Wabula muntu ayinza kuweereza baami ababiri: kuba oba yakyawanga omumu, n'ataka ogondi; oba yagumiranga ku mumu, n'anyoomanga ogondi. Temuyinza kuweereza Katonda no mamona. ²⁵ Kyenva mbakoba nti Temweraliikiriranga bulamu bwanyu, nti mulirya ki; mulinywa ki; waire omubiri gwanyu, nti mulivaala ki. Obulamu tebusiinga mere; n’omubiri tegusinga byokuvaala? ²⁶ Mubone enyonyi egy'omu ibbanga, nga tezisiga, so tegikungula, tezikuŋaanyirya mu mubideero; era Itawanyu ali mu igulu agiiriisya egyo. Imwe temusinga einu egyo? ²⁷ Yani mu imwe bwe yeeraliikirira, asobola okweyongeraku ku bukulu bwe n'akaseera akamu? ²⁸ Naye ekibeeraliikirirya ki eby'okuvaala? Mulingirire amalanga ag'omu itale, bwe gamera; tegakola mulimu, so tegalanga lugoye: ²⁹ naye mbakoba nti no Sulemaani mu kitiibwa kye kyonakyona, teyavaairenga ng'erimu ku igo. ³⁰ Naye Katonda bw'avaalisya atyo omwido ogw'omu itale, oguliwo atyanu, ne izo bagusuula mu kyoto, talisinga inu okuvalisya imwe, abalina okwikirirya okutono? ³¹ Kale temweraliikiriranga nga mutumula nti Tulirya ki? Oba tulinywa ki? Oba tulivaala ki? ³² Kubanga ebyo byonabyona amawanga bye gasagira; kubanga Itawanyu ali mu igulu amaite nga mwetaaga ebyo byonabyona. ³³ Naye musooke musagire obwakabaka bwe n'obutuukirivu bwe; era ebyo byonabyona mulibyongerwaku. ³⁴ Kale temweraliikiriranga bye izo: kubanga olunaku olwe izo lulyeraliikirira ebyalwo. Olunaku olumu ekibbiibi kyalwo kirumala.