¹ Temusalanga musango, muleke okusalirwa. ² Kubanga omusango gwe musala gulibasalirwa mweena: era ekigera kye mugereramu, ekyo kye muligererwa mweena. ³ Ekikulingirirya ki akantu akali ku liiso lya mugande wo, naye notofaayo ku ekisiki ekiri ku liiso lyo iwe? ⁴ Oba olimukoba otya mugande wo nti Leka nkuggyeko akantu akali ku liiso lyo; naye bona, ekisiki kikaali kiri ku liiso lyo iwe? ⁵ Munnanfuusi iwe, sooka otooleku ekisiki ku liiso lyo iwe; kaisi obone kusa okutoolaku akantu ku liiso lya Mugande wo. ⁶ Temuwanga embwa ekintu ekitukuvu, so temusuulanga luulu gyanyu mu maiso ge mbizzi, gireke okuginiinirira n'ebigere byagyo, ne gikyuka okubaluma.

⁷ Musabe, muliweebwa; musagire, mulibona; mukonkone, muligulirwawo: ⁸ kubanga buli muntu asaba aweebwa; asagira abona; ekonkona aligulirwawo. ⁹ Oba muntu ki mu imwe, omwana we bw'alimusaba emere, alimuwa eibbaale; ¹⁰ oba bw'alisaba ekyenyanza, alimuwa omusota? ¹¹ Kale imwe, ababbiibi, nga bwe mumaite okuwa abaana banyu ebintu ebisa, Itawanyu ali mu igulu talisinga inu okubawa ebisa abamusaba? ¹² Kale byonabyona bye mwagala abantu okubakolanga imwe, mweena mubakolenga bo mutyo: kubanga ekyo niigo amateeka na banabbi.

¹³ Muyingire mu mulyango omufunda: kubanga omulyango mugazi, n'engira eira mu kuzikirira nene, n'abo ababitamu bangi. ¹⁴ Kubanga omulyango mufunda n'engira eira mu bulamu ya kanyigo, n'abo abagibona batono.

¹⁵ Mwekuume banabbi ab'obubbeyi, abaizira mu bivaalo by'entaama gye muli, naye mukati niigyo emisege egisikula. ¹⁶ Mulibategeerera ku bibala byabwe. Abantu banoga batya eizabbibu ku busyoono, oba eitiini ku munyaale? ¹⁷ Bwe kityo buli musaale omusa gubala ebibala bisa; naye omusaale omubbiibi gubala ebibala bibbiibi. ¹⁸ Omusa tegusobola kubala bibala bibbiibi, so n'omusaale omubbiibi teguyinza kubala bibala bisa. ¹⁹ Buli musaale ogutabala kibala kisa bagutema bagusuula mu musyo. ²⁰ Kale mulibategeerera ku bibala byabwe. ²¹ Buli muntu ankoba nti Mukama wange, Mukama wange, ti niiye aliyingira mu bwakabaka obw'omu igulu, wabula akola Itawange ali mu igulu by'ataka. ²² Bangi abalinkoba ku lunaku ludi nti Mukama waisu, Mukama waisu, tetwalagulanga mu liina lyo, tetwabbinganga dayimooni mu liina lyo, tetwakolanga bya magero bingi mu liina lyo? ²³ Kaisi ne mbatulira nti imwe: muve we ndi mwenamwena abakolere eby'obujeemu.

²⁴ Buli muntu awulira ebigambo byange ebyo, n'amala n'abikola, kyaliva afaananyizibwa n'omusaiza ow'amagezi eyazimbire enyumb ye ku lwazi: ²⁵ emaizi n'egatonya, mukoka n'akulukuta, kibuyaga n'aikunta; ne bikubba enyumba eyo; so n'etegwire; kubanga yazimbiibwe ku lwazi. ²⁶ Na buli muntu awulira ebigambo byange ebyo n'atabikola, alifaananyizibwa n'omusaiza abula magezi, eyazimbire enyumba ye ku musenyu: ²⁷ amaizi n'egatonya; mukoka n'akulukuta, kibuyaga n'aikunta; ne bikubba enyumba eyo; n'egwa: n'okugwa kwayo kwabbaire kunene.

²⁸ Awo olwatuukire Yesu bwe yamalire ebigambo ebyo, ebibiina ne byewuunya okwegeresya kwe: ²⁹ kubanga yabegereserye nga mwene w'obuyinza, so si ng'abawandiiki baabwe.