¹ Musige kuramura, korereki musige kuramurwa. ² Kokubha okuramura kunu omuramura one oja kuramurwa. Naindengo inu ourenga nawe one niyo urirengerwamo. ³ Kubhaki ourora akabhambo kanu kari muriso ryo wanyu, nawe utakurora riti rinu riri muriso ryao? ⁴ Utura okubhwira owanyu siga nikusoshe akabhambo kanu kali muriso ryao, kumbe riti riri muriso ryao? ⁵ Rurimi awe sosha riti rinu riri muriso ryao, niwe outura okurora kisi nokusoshamo akabhambo kanu kari muriso ryo wanyu.

⁶ Mwasiga kuyanambwa chinu cheru, na musige kwesera ngurubhe Jiruru imbere yajo. Kutyo abhajinyamura nokujitajataja kwa makuru nejikusubhira awe nokukuruma bhisinjasinja.

⁷ Sabhwa, nawe uyanwe. Muronde, omubhona. Mwibhure murigurirwao. ⁸ Kuoneone unu kasabhwa, kayanwa. Ku oneone unu karonda, kabhona. Na kumunu unu kebhura, kegurirwa.

⁹ Au ario wonewone kwemwe unu, omwana waye akasabha ribhara ryo mukate kamuyana ebhuyi? ¹⁰ Amwi akamusabhwa iswi, omwene namuyana chisoro? ¹¹ Ikabha emwe bhanu muri bhabhibhi omumenya okuyana abhana bhemwe ebhinu bhyekisi, mbe esomwana unu ari murwire ayakura muno okubhayana ebhyekisi muno bhanu abhamusabhwa.

¹² Rwa kutyo ukenda okukorerwachiu chonechone nabhandi, awe one ubhakorere kutyokutyo kwokubha nibhyo ebhiragiro bhya bharagi.

¹³ Mwingire kwakutura omurwango omutoto, kokubha omurwango omugari nainjira ingari egenda mubhubhibhi na bhanu bhafu abhatura kunjira iyo. ¹⁴ Injira ni tiru, injira inu eigenda kubhuwanga na bhanu abhatura okuirora nibhatoto.

¹⁵ Mwiyangalire na bharagi bhorurimi bhanu abhaja bhafwaye orugoji rwaritama, kumbe ni mbwa nduru ya misege. ¹⁶ Kumatwasho gebhwe muribhamenya. Angu abhanu abhatura okunogora amatwasho kumawa, au chitii kumatobhoro? ¹⁷ Kwokubha kira riti rijomu eriturako maywasho majomu, na riti ribhibhi eriturako amatwasho amabhibhi. ¹⁸ Riti rijomu ritakutura kutwasha amatwasho mabhibhi, na riti ribhibhi ritakutura kutwasha matwasho majomu. ¹⁹ Eti ryone rinu ritakutwasha matwasho majomu eritemwa na ndyeswa mubhisa mumuriro ²⁰ Niko chiribhamenya okusokana na matwasho gebhwe.

²¹ Tari ati munu wonewone unu kambirikira, 'Rata, Rata', ati kengira mubhukama bhwa murwire, ni unu kakora ebhikorwa bhya Rata wani unu ari murwire. ²² Abhanu abhafu abhambwira kurusuku rurya ati, 'rata, rata' chitakukoraga obhuragi mwi sina ryao, no kuirisya emisabhwa kwesina ryao, na kwesina ryao chakorere mang'ana mafu makuru? ²³ Mbe ndibhabhwira ati, nichariga kubhamenya emwe! Musoke kwanye emwe bhau omukora amang'ana amabhibhi.

²⁴ Mbe unu one oumwi uu kongwa amang'ana gani no kugakora kasusana no munu mwenge unu ombakire inyumba yaye inguru ya ribhuyi, ²⁵ Ing'ubha niigwa emigeresi njija, nomuyaga nguja, ngubhuma inyumba hiyo nirema okugwa asi, kokubha yaga yumbakirwe kwitare. ²⁶ Nomunu unu kongwa omusango gwani narema okugukora, kasusana no munu mtamutamu unu ombakire inyumba yaye inguru yo musenyi, ²⁷ Ingubha niigwa, emigeresi njiurura, nomuyaga ngututa, ngubhuma inyumba hiyo. Niigwa, no bhunyamusi bhwaye mbuwa.”

²⁸ Gwakingire omwanya gunu Yesu amarire okwaika amang'ana ganu, ebhise mbarugura okwiigisha kwaye. ²⁹ Kwokubha eigisishe rwo munu unu amenyere na atari rwo mwandiki webhwe.