¹ Omwanya gwa katondo gwejire gwakinga, abhatangasha bha yidini na bhakuru bhanu bhariye Yesu yintebha bhabhone okumwita. ² Bhamubhoyere, nibhamusira, nibhamukingya ku Pilato omulamusi.

³ Nigubhao omwanya Yuda, unu aliga omusaliti arorere ati Yesu bhamuramura kubha mukayi, (alijuta) no kusubhya masinja makumi gasatu ga jiyera kumutangasha omukuru na abhakaruka, ⁴ Nayika, “Nakaya okusaliti amanyinga ganu gatari na chikayo” Nawe abhene nibhamusubhya, “Ejichisakiraki eswe? Garingire gayo omwene.” ⁵ Niwo nesa amasinjo gajipirye mwisangisho, nemuka jaye nenyiga omwene.

⁶ Abhatangasha abhakuru nibhagega amabhara ga jipirya nibhayika, yitari kisi okutura jipirya jinu mchibhikiro chejindi, kwokubha ni nengo ya manyinga. ⁷ Bheromereye amwi jipirya njibha ja kugura lisambu lyo mumogi ryo kusika abhagenyi. ⁸ Kulinu lisambu liyo eribhirikirwa na rero eribhilikirwa “lisambu rya manyinga.

⁹ Niwo lingana rirya ryaga ryayikirwe no omuragi Yeremia nirikumira, okwayika, “wagegere amabhara ga jipirya, yinengo yinu yatewewo na abhanu bha Israeli kuliyo, ¹⁰ Bhayiguliye lisambu ryo mumogi, rya kutyo Omukama aliga anyeresishe.”

¹¹ Wori Yesu nemereguru yimber yo mramusi, Omuramusi namubhusha, “awe nawe Omukama wa bhayawudi? Yesu namsubhya “awe owayika kutyo.”

¹² Mbe omwanya gunu asitakibhwe nabhakuru bha makuhani nabhakaruka, hatasubhishe chone chone.

¹³ Niwo Pilato namubhwira, “wuchari kungwa amashitaka gone garya kwemwe?” ¹⁴ Nawe atamusubhishe ng'ana na yimwi, omuramusi narugura muno.

¹⁵ Musukukuru bhwaga bhulio obhwisomboro bhwo mramusi okwigulila omubhoywa umwi unu kendwa na abhafu. ¹⁶ Omwanya guyo bhaga bhali nomubhoywa umwi unu aga atamishe nabhirikirwa Baraba.

¹⁷ Bhejire bhukumanya amwi, Pilato nabhabhusha, “Omwenda nibhegulirega? Baraba au Yesu unu kabhilikirwa Kristo?” ¹⁸ Kwo kubha amenyere ati bhamgwatire kwo kusinwa.

¹⁹ Omwanya gunu aga ekaye kuchitebhe chaye cha okuramurira, omugasi waye amutumiye ying'ana nayika, “Usige kurora ng'ana yoyone kumunu unu atana chikayo. Kwo kubha nanyasibhwa muno muchiroto yinguru yaye.”

²⁰ Abhakuru bha abhatngasha bha yidini na abhakaruka nibhakomeresha abhanu bhasabhe Baraba, Yesu etwe. ²¹ Omuramusi abhusishe, ni wuya kubhabhili omwenda nimusige kweme? Wayikire, “Baraba.”

²² Pilato nabhabhwira, “nikore kutiki Yesu unu kabhilikirwa kristo?” Bhone nibhamubhya, “Munyashe.” ²³ Omwene nayika, “kwaki, akorere chikayoki?” Nibhamwaya obhuraka bhwa yinguru muno, “Mnyashe.”

²⁴ Pilato ejire arora atakutura kukora chochone, bhaga bhambire okusamba, agegere amanji nesabha amabhoko yimbere ya abhanu bhone, nayika, “Anye nitali na cikayo yinguru ya amanyinga go munu wunu atali na chikayo. Mgarore abhene.”

²⁵ Abhanu bhone mbaika, “Amanyinga gaye gabhe yinguru yeswe na abhanu bheswe.” ²⁶ Niwo nabhegurira Baraba, nawe nabhuma Yesu emijeredi nokubhayana bhaje okumunyasha.

²⁷ Abhasirikare bho muramusi mbagega Yesu mbamukingya mnyumba ya yindamu lifuta tya abhasirikare nibhakofibhwa. ²⁸ Nibhamufura jingubho mbamufwafya yikanju yinkangaru. ²⁹ Mbarosha yingofira ya mawa mbamutera kumutwe kwaye yinguru nibhamutera yisimbo mkubhoko kwaye kwobhuryo. Bhwamifukamiye mbamusanyaga, mbayika, “Omukama wa abhayawudi yikesha?” ³⁰ Mamfubhuriye amajwata, bhagegere yisimbo mbamubhumira kumtwe. ³¹ Bhunu bhaga mbamsang'aya, bhamufurire yikanju yilya mbamufwafya emyenda jaye, mbamsira okunyasibhwa.

³² Bhejire bhauruka anja, bharorere omunu wo kusoka krene nabhilikirwa Simeoni, unu bhasing'irisashe agenda nabho abhature riti ryaye ryo bhukika. ³³ Bhejire bhakinga anu kabhilikirwa Golitota, obhugajuro bhwendemo, “Echiryanga cho mutwe.” ³⁴ Bhamuyaye isiki yinu yisasibhwe na yindurwe anywe, nawe ejire airabha, atayinyweye. ³⁵ Bhejire bhamunyasha, mbagabhana emyenda jaye mbabhuma jikura. ³⁶ Bhekaye mbamuringira. ³⁷ Yingru yo mutwe gwaye bhateyeko amashitaka ngasomeka, “wunu ni Yesu omukama wa abhayawudi.” ³⁸ Bhasakusi bhabhili bhanyasibhwe amwi nawe oumwi kurubhara rwo bhuryo (okuryo) oumwi kurubhara rwo okumosi. ³⁹ Bhanu bhaturaga bhasingishaga emitwe jebhwe mbamujera. ⁴⁰ Mbayika, “Awe unu wendaga okunyamura yikerejia nokuyumbaka kwa nsiku esatu, yiturya omwene! Rabha uri mwana wa Nyamuanga, yika usoke kwiti ryo bhukika.”

⁴¹ Kugayo gayo abhakuru bha abhatangasha bha yidini bhaga nibha mufuma, amwi na bhandiki na abhakaruka, mbayika, ⁴² Aturyaga abhandi, mbe atakutura kwiturya omwene. Omwene ni mukama wa abhayawudi. Eke asoke kwiti ryo bhukika, niwo chiramwikirishe. ⁴³ Kekilisha Nyanuanga. Siga wori Nyamuanga amuturye rabha kenda, kwokubha ayikagati, Anye nili mwana wa Nyamuanga.” ⁴⁴ Abhasakusi bhanu bhanyasibhwa amwi nawe one bhayikire amang'ana gokujera.

⁴⁵ Mbe okusoka saa sita chabheyeo echisute charo chone nikinge saa tisa. ⁴⁶ Yejire yakinga satisa, Yesu nalila kwo bhuraka bhwa yinguru, “Eloi, Eloi, lama sabakithani?” Yiriati Nyamuanga wani, Nyamuaga wani, nikubhaki wansiga? ⁴⁷ Abhandi bhanu bhagabhemereguyu yeyi arya bhonguwe mbayika, “kabhilikila Eliya.” ⁴⁸ Rumwira oumwi webhwe nabhilima okugega isifongo no kuyijusha echinywebhwa echiruru, naitura inguru ya riti namuyana abhone okunywa.

⁴⁹ Bhanu bhasigaye mbayika, “mumusige omwene, msige chirore rabha Eliya kaja okumuturya.” ⁵⁰ Yesu nalila lindi kwo kubha bhwa yinguru omwoyo ngutemya. ⁵¹ Rora, Ripazia rya mkerejia ndyatika mabhara gabhili kusoka yinguru okuja emwaro. Echaro nichiyarara na amatare ngatika mabhara mabhara. ⁵² Jifwa jigukire, ne emibhili emyafu ja b hanu bhafuye bhana bhikayo nijisuruka. ⁵³ Bhasokere mufwa kubhusuruko bhwaye, bhengiye mumusi omweru, mbabhokekana kubha bhafu.

⁵⁴ Omusilikare urya na bharya bhaga mbaringira Yesu bharorere rinyamtikima na amang'ana ganu gakorekere, nibhobhaya muno nibhayika, “chimali unu aga ari mwana wa Nyamuanga.”

⁵⁵ Bhagasi bhafu bhanu bharubhilishaga Yesu okusoka Galilaya (bhamuhudumie) wamuringira kurakura. ⁵⁶ Bharimo bha Mariamu, Magdarena, Mariamu Nyiramwene Yakobo na Yusuph, na nyiramwene abhana bha Zebedayo.

⁵⁷ Yejire yakinga kegoro, ejire omunibhiokusoka Arimathayo, unu kabhilikirwa Yusufu, one agaali mwanafunzi wa Yesu. ⁵⁸ Ajire kupilato namusabha omubhili gwa Yesu. Pilato naramura ayanwe. ⁵⁹ Yusufu agegere omubhiri nagubhoya risanda, ⁶⁰ Nagumamya mufwa yaye yinyaya yinu aga abhajire kwitare. Nasiringisha ribhuyi linene kumlyango gwa yifwa naja jaye. ⁶¹ Mariam Magdarena na Mariamu oundi bhaga bhario bhekaye yeyi na yifwa.

⁶² Orusuku runu rwarubhiye lunu rwagaluli olusuku kabula ya okuroserisha, abhakuru bha abhatangasha bha yidini na mafarisayo amwi na Pilato. ⁶³ Nibhamubhwira, “Mkama, echichuka ati omubheyi urya aga achari kufwa, ayikire, jakatura siku esatu enisuruka. ⁶⁴ Ambe wori ragirisha yifwe yibhone obhurisi bhwakisi siku esatu jiture, abhatura okujo okumwibha no kwa yika kubhanu, 'Asurukire okusoka kubhafuye.' Orubheyi rwo bhutero oruja okubha runene kukira orwokwamba rurya.”

⁶⁵ Pilato namubhwira, “mugege abhalisi. Mugende mujokukora ihali yo bhusalama rwa kutyo omutura.” ⁶⁶ Kutyo bhagendere okukora yifwa yibhe kisi, ribhuyi ryateweko yinab bo no kuturao omrisi