¹ Mafarisayo na Masadukayo garubhire Yesu ng'enda agereshe ebhijekekanyo bhinu ebhisoka kuryire.

² Nawe Yesu nabhasubhya nabhabhwira ati, ikabha ili kegoro omwaikati iyari yo muyaga ni njomu kwokubha orwire ndukangaru. ³ Ikabha ni katondo omwaikati iyari yo muyaga rero ilitari njomu kwokubha orwire ndukangaru na mere gaswikiye orwire rwone. Mumenyere okweresha obhweru bhworwire nawe mtakumenya okweresha ebhijekekanyo chomwanya. ⁴ Oruganda orubhibhi noryo bhusimbe ndwo orwagara ebhijekekanyo, nawe chitariwo chijekekanyo chone chone kinu bhariyanwa, Tari ilya ya Yohana. Mara Yesu nabhasiga nagenda jae.

⁵ Abheigisibhwa bhaye bhejire orwakabhili nawe bharabhiwe okuja ne mikate. ⁶ Yesu nabhabhwira, “mwiyangarire na mubhe bhenge na mubhe bharuru kumafarisayo na kumasadukayo.”

⁷ Abheigisibhwa mbebhushanya abhene kwa bhene nokwaika nikubhaki chitagegere emikate.

⁸ Yesu amenyere riyo nokwaika emwe abhobhwigumya obhutoto kubhaki mwabha na bhwiganilisha muwewetana abhene kwa bhene mwaikati kubhaki mtagega emikate? ⁹ Kumbe mchari kumenya noro kwituka, mikate etanu jirya kubhanu bhiumbi bhitanu ne bhikapo bhakumanyishe bhiringa? ¹⁰ Mikate etau nebhili kubhanu ebhiumbi bhina mwagegere ebhikapo bhilinga? ¹¹ Yabha kutiki mwarema kumenyati anye ntaromaga nemwe inguru ye mikate? Mwirere na mwiyangarire na maruru ku mafarisayo na masadukayo.” ¹² Bheire mbamenyati ariga atakubhabhwira inguru yo kwiyangarira ne mikate jinu jigagire, kwokubha nkwiyangarira ne meigisho ga Amafarisayo na masadukayo.

¹³ Omwanya gunu Yesu akingire orubhara rwa kaisaria ya Filipi, nabhabhusha abheigisibhwa bhaye, naika, “abhanu abhaikati omwana wa Adamu ni uya?

¹⁴ Bhaikire, “abhandi mbaikaga ati ni Yohana omubhatizaji, abhandi ni Eliya, abhandi ati ni Yeremia kamwi ni umwi wendeko omuroti.”

¹⁵ Abhabhwiriye emwe omwaikati nanye ni undi?

¹⁶ Namusubhya, Simoni Petro naika, awe ni kristo omwana wa Nyamuwanga unu uli muoru.

¹⁷ Yesu namusubhya ati, namubhwira nawe omuyanwa Simoni Bar Yona, kwokubha orwamba ni inyama bhitakufumburiye rinu ni rata wani unu ali murwire. ¹⁸ Anye none ekubhuila ati awe nawe Petro, na inguru kwitare kunu enumbakako rikanisa ryani emiryango gya bhwikaro bhwa shetani gutakuritura. ¹⁹ Enikuyana jifungujo jo bhukama bhwa murwire. Chone chone chinu oubhoya mucharo echibha chibhoerwe murwire wone, chone chone chinu ousurumura mcharo, murwire one echisurumurwa. ²⁰ Mara Yesu naragirira abheigisibhwa bhaye bhasige kubhwira munu wone wone ati umwene ni mukristu.

²¹ Kwambira omwanya guyo, Yesu namba okubhwira abheigisibhwa bhaye ati, ni bhusi bhusi kagenda Yerusaremu. Kunyasibhwa mang'ana mafu mumabhoko ga bhakaruka na bhakuru bha bharefi na kubhandiki bhwokwita no kusurura orusuku rwa kasatu. ²² Mara Petro nagega Yesu kumbari namubhwira, ring'ana rinu ribhe kura nawe Mkama, rinu ryasiga kusoka kwawe.

²³ Nawe Yesu echusishe nabhwira Petro, subha inyuma wani, nyakusheta awe! Ulichijingiti kwanye kwokubha utakungorya amang'ana ga Nyamuwanga tari mang'ana ga bhanu.

²⁴ Mara Yesu nabhwira abheigisibhwa bhaye rabhe ariyo pmunu wone wone kenda kundubha anye, ni bhusi bhusi areme omwene, agege omusarabha gwae omwene anyijeko. ²⁵ Kwokubha unu kenda okuturya obhurame bhwaye, kajookubhusha na wone wone unu arabhushe obhurame bhwaye kwokundubha kaona. ²⁶ Nifwaidaki inu omunu kaja okubhona akayanwa orwire rwone nanabhusha obhurame bhwaye? Na nikinuki kinu omunu katura okusosha okuing'yanya na bhurame bhwaye? ²⁷ Kwokubha omwana wa Adamu arija nobhukuru bhwesemwene waye no bhwa malaika waye. Wone ariripa bhuri munu kuring'ana na bhikorwa bhyae. ²⁸ Obhuaki mbabhwireko bhario abhandi bhanu mwimereguyu anu bhario bhanu bhatari bhona rufu mpaka bharirora omwana wa Adamu naja ori mubhukama bhwaye.