¹ Yesu nabhabhirikira abheigisibhwa bhae ekumi na bhabhili nabhayana obhuturo inguru ya misambwa emijabhi okujikemera nokujibhirimya no kukuosha okurwararwara na marwae gone. ² Amasina ga jintumwa nigo ganu owokwamba ni Simon (unu atogwaga petero) Andrea wabho, Yakobo wa Zebedayo na Yohana wabho. ³ Philipo, Bartelemayo, Thomaso, Matayo mtoza ushuru, Yakobo omwana wa Alfayo, na Tadeo, ⁴ Simoni nomukananayo na Yuda Isikariote (unu amuromee iniku).

⁵ Bhanu ekumi na bhabhili Yesu abharagirie ati, musige kugenda munjira ja abhecharo musige kwingira mumusi ja abhasamaria. ⁶ Mugende, kunama jinu jibhurire eja inyumba ya Israel. ⁷ Anu muraje, murashega mwaika, obhukama bhwa mu-rwire bhwafugee.' ⁸ Muoshe abharwae, muoniege abhafue, muoshe abhabhigenge na umubhirimye emisambwa. Mwayanwa kutyo na muoshe kutyo. ⁹ Mutagega dhahabu, almasi, au shaba muswaga jemwe. ¹⁰ Msige kugega swaga mulugendo lwemwe ama mwenda gundi au birato au simbo, kwokubha unu kakora emirimu eire kuyanwa ebhiryo. ¹¹ Musi gwone gwone ama kijiji chonechone chinu omwingira muronda ronda unu eire na mwikare ao mpaka runu murisokao. ¹² Murengira mumusi mukeshega, ¹³ Ikabha inyumba irya ina omurembe, omurembe gurya ogusigara, ikabha itana murembe, omurembe gwemwe ogubhasubhira emwe. ¹⁴ Na kubharya bhatakubharamira emwe ama kubhongwa mang'ana gemwe, omwanya gunu omusoka munyumba ama mumusi guyo mkunune oruteri rwe ebhigere bhymwe hao. ¹⁵ Chimari enibhabhwira, ati iribhao bhwekisi iguru yo musigwa Sodoma na Gomora kurusuku rwo bhuramusi kukira omusi guyo.

¹⁶ Ambe enibhatuma rwa matama agati ya jimbhwa jo musega, ila mubhebhenge rwechisoro na mubhe bhafura rwe chiguti. ¹⁷ Mwikenge kubhanu bharibhasira mbiyanjo na bhari bhabhuma (mmasinagogi) gebhwe. ¹⁸ Murisirwa imbere ya bhakuru na bhakama kurwanye, kubha risingiro kwebhwe na kubhecharo. ¹⁹ Runu bharisira mutaribha na bhubha echikora kutiki ama echija kwaikaki, kokubha ehinu cho kwaika muriyanwa kumwanya guyo, ²⁰ Kokubha atariimwe bhanu muryaika, kwokubha omoyo gwe somwana nigwo guryaikira emwe. ²¹ Owabho ari mukira owabho okwita nesemwene kumwana waye abhana bharimuka kubhebhusi bhebhwe nibhabheta. ²² Abhanu bhone bhari bhasoka emwe kurwarisina ryani unu alikomesha okukinga niwe ariona. ²³ Omwanya gunu bhari bhanyasha mumusi gunu mubhirime mumusi jone efaisrael omwa omunu achari kuja.

²⁴ Omwiigisibhwa atari mukuru kuriko omwiigisha waye, wala mugaya unu ariiguru esebhugenye. ²⁵ Eitura okubha omwiigisibhwa okubha rwo muigisha waye, nomugaya rwa esebhugenyi, bhakabha bha torere omwene musi Berzebuli, nikwakutiki abha okubhafuma abha munyumba yaye!

²⁶ Ambe mwasiga okubhobhaya kokubha ritario eng'ana ritari fundukurwa ama rinu riibhisire rinu tarimenywa. ²⁷ Chinu enibhabhwira muchisute, muchaike kubhweru, chinu enibhawewera mumatwi gemwe, muchirashe murinyire kunyumba inguru. ²⁸ Musige kubhaya bhanu abheta mubhili bhatana bhuturo bhwakwita moyo mubhaye unu katura okwita omubhili no moyo bhyone mumuriro bhyone bhitarisima. ²⁹ Angu kasuku ebhili jitakugusibhwakwera noto? Atario unu katura kugwaasi bire esemwane kumenya. ³⁰ Najifiri jakumitwe jemwe jibharirwe jone. ³¹ Mwasiga kubhaya, kokubha mukirire muno bhashomoro bhafu. ³² Mbe unu arinyikirisha imbere ya bhanu anone ndimwikirisha imbere ya Rata wani wa murwire. ³³ Naunu kanyigana imbere ya bhanu, anone ndimwigana imbere ya Rata wani wa murwire.

³⁴ Musige kwitogera ati nijire kureta murembe mucharo. Nitejire kureta murembe nawe nijire kureta chinyambutu. ³⁵ Kokubha nijire kutanya omwana nesemwene, omuyara na nyiramwene, omukamwana na nyabhuko waye. ³⁶ Abhabhibhi bho munu nibharya bhamunyumba yaye. ³⁷ Unu kenda esemwene amwi nyiramwene kukira anye anyakire na unu kenda omumura amwi muyasha kukira anye anyakire. ³⁸ Naunu atakugega omusaraba nandubha anye anyakire. ³⁹ One unu kaenja obhuwanga kabhubhusha. Naunu kabhubhusha obhuwanga kurwanye kabhona.

⁴⁰ Oneone unu aribhakuma emwe akumire anye, na unu akumire anye akumire unu antumire anye. ⁴¹ Naunu arimukuma omuragi kwokubha ni muragi karamira echibharo cho muragi. Na unu arikuma omurengeresi kwokubha ni murengeresi aribhona echibharo cho bhurengeresi. ⁴² Oneone unu ariyana umwi wa bhatoto bhanu ata chikombe cha manji gakunywa manyirie, kwokubha ni mwiigisibhwa, chimari enibhabhwira uyo atakubhurwa kwa njira yoneyone chibharo chaye.